أمـــــــوت واحيــا بــــــك للكاتبه العيناويه

الجزء الرابــــــــــــــــــــــع والثلاثون



في نص الدرب تذكرت فطيم السلسله...طلعتها من شنطتها وعلقتها في منظرة السياره...وسعيد يراقبها بفظول..

سعيد: شو هاي..؟

فطوم: شو رايك انته..؟؟..سلسله نوروه مطرشتنها لك...مب لك....لسيارتك..

ابتسم سعيد..

سعيد: فدييييييييييييييييييييييتها ياربي.... اموت فيها...

فطوم: ههههههههه ويا ويهك...تعال شو سالفه الملجه..؟

اعتفس ويهه وبرطم..

سعيد: ماطاعت نوروه....

فطوم: سمعتها تقول عشان حصه..

سعيد: هي.. بعدها هي حصه مظايقه..؟؟

فطوم: شو تتوقع يعني..؟؟ ريلها ومات...اكيد بتزعل عليه.... وهي ماتقعد تحت وتسولف الا مجامله حقنا وحق اهلها..وهي بعد ترفه عن نفسها شوي.. بس من تدخل حجرتها وتذكر ريلها وتشوف صورته صاحت...

هز سعيد راسه باسف...

سعيد: الله يعينها...والله كلنا على هالطريج... الله يرحمنا كلنا..

تذكر سعيد سيف....تذكره وقت ملجه عبدالله...ووقت الرزفه..واخر مره في ملجته هو نفسه...كيف كان مستانس..الله يرحمه...منو كان يتوقع ان هالانسان بيموت قريب... كان فعز شبابه والحياة جدامه...لكن العمر...والموت ماينسى حد....وتمنى في هاللحظه ان الله يطول عمره عشان نوره ماتمر بموقف مثل هذا... اذا حصه ماتعرف ريلها غير فتره بسيطه تعذبت بهالطريقه...كيف لو صارله اي شي...نوره اللي تحبه وعاشت الحلم وياه من سنين شو بتسوي بعمرها...!!! بسم الله انا ليش افكر بالموت...!! الله يطول بعمارنا كلنا...

حمدان طلع من الميلس ودخل بيت اخته ميره... اللي كانت اطالع التلفزيون وعيالها حمد ومحمد وياها...عاد اونهم كبار ويصومون ويتريون السحور.. اما شما كانت راقده..

حمدان: السلااااااااااااااااااام عليج بنت ابويه..

نشت ميره وعيالها...يسلمون على حمدان...

ميره: هلااا والله بالغالي... شحالك فديتك...

حمدان: الحمد لله شحالج انتي..وشخبااااااااارج...؟

ميرة: بخير وعافيه....اقرب...ايلس بييبلك فواله..

حمدان: لالالا تعالي يلسي...مابغي شي توني زاااط في الميلس.. تعالي حق....مبروووووووووك عالحمل..

ميرة: ههههههه الله يبارك فيك...منو خبرك.؟

حمدان: امايه اليوم تطريج عند ابويه...

ميرة: يعلني ماخلى من ذاك المتغرب ولا يدري بعلووومنا شي...الله يوفقه...

حمدان: افا عليج..(ومسك تيلفونه)..احين بتصله...وبنخبره بعلومنا ليش لا...

اتصل حمدان بخليفه... وكانت ميره تصب له جاهي...

خليفه: آآلووو..

حمدان: السسسلام عليك خلووووف...

خليفه: مرحبااااا الساع..ياحي هالصوت والله...

حمدان: الله يحييييييييييك...وشحااالك ياخووووويه..

خليفه: بخير وعافيه شحالكم انتوا...وشحال امي وابويه والشباب....وعنووود..وميييره...؟

حمدان: ياخي شوي شوي صفيييتهم صف لي...

خليفه: ههههههههه اريحك عشان تعطيني جواب واحد...

حمدان: هههه كلهم بخير وعافيه...شعلومك انته وعلوم ولد عمك..؟

خليفه: بخير وسهاااله...

حمدان: عاد انا عندي لك خبر...يالس عند مييره احين وقاعده تتحسف..تقول خليفه متغرب ولا يعرف بعلوومنا... تعرف عاد شو الخبر..؟

خليفه: شو مستوي خير..؟؟

خليفه قام كله يتشائم..من زود المصايب اللي فيه...

حمدان: ههههههه خير يابوك...اختك حاااامل....

استانس خليفه لانه خبر حلوو...

خليفه: ميييييره...؟؟!!

حمدان: عنبوو ذاك الخشم لك....اكيد ميره يعني عنود بالله..؟؟؟؟؟؟

خليفه: جب...عطني ارمسها...

ظحك حمدان وعطى التيلفون لميره...وسار ويلس عدال ولد اخته حمد يلعب بلاي ستيشن ويشرب جاهي...

وعقب ماخلصت ميرة سوالفها وسكرت قالها حمدان...

حمدان: اخبرج اختي ...ابا اشاورج فسالفه....

فر الايد مالت البلاي ستيشن ويلس عدالها...

ميرة: خير...

حمدان: خير...انا استويت ريال...

على طول تغيرت ملامح ميره ومسكت ايد حمدان وهي ميته من الفرح..وقاطعته..

ميرة: بتعرس...؟؟!!!!

انصدم حمدان...

حمدان: ريلج اللي بيعرس مب انا....

اعتفست ملامح ميره كليااا...

ميرة: ياويلي...احلف.......!!!!!!!!!..

مات من الظحك حمدان عليها...

حمدان: ههههههههههه لالا...الله لا قاااله ان شاء الله... اسولف وياج..

ميرة: يالسبااااااااال روعتني...يالله شو سالفتك قول..

حمدان: ثرج تخلين حد يكمل سالفته...سمعيني....اقولج انا كبرت وصراحه قمت استحي اطلب من ابويه مصروف...صح هو مايقصر وعلى طول يحول الفلوس على حسابي... بس انا مابغي جذه....

ميرة: لا تقولي احين انك بتودر دراستك وبتشتغل...

حمدان: اوهوووووووو علينا...انتي خليني اكمل....!!

ميرة: انزين كمل...

حمدان: عاد انا قلت شوو.... بما ان دوامي يخلص 2 كل يوم.. قلت بشتغل فالشركه مسائي...وانتي تعرفين انها خاصه يعني عادي بعد الغدا اداوم فيها...واستلم معاش حالي حال الموظفين...

ميرة: والله فكره حلوه...على الاقل تحس انك مفيد...بس ماجنه تعب عليك وبياثر على دراستك...؟!

حمدان: بشد حيلي...

ميرة: لا اذا بياثر لا تشتغل...كم باقلك انته..؟

حمدان: بكمل هالسنه..والسنه اللي بعدها....وبس..

ميرة: لالا..ماتروم...

ماقتنع حمدان بشور ميره...

حمدان: انا بشاور ابويه وبشوفه شو يقول....

ظربته ميره على جتفه..

ميرة: شحقه عيل ياي تشاورني يوم مابتاخذ بشوري..؟؟؟

حمدان: ههههههه نسويلج سالفه نعطيج ويه...عاد اونج اختنا العوده ونشاورج بسوالفنا....!!

ميرة: ههههههه خسك الله يالخبل...

في بيت محمد الكتبي...عنود كانت قاعده مع امها وحرمة اخوها منى...

عنود: اماااااااااااااايه...

ام سلطان: عوونج...

عنود: امايه..متى بتوديني السوق...؟؟...ابا اسير اتشرى قطع عشان افصلهن للعرس...

ام سلطان: في رمضان عاد بنتي..؟؟ حد يسير السوق فرمضان..؟؟

عنود: والله عاد رمضان والا غير رمضان...مايخصني...متى تبينا نسير..؟؟ هذيلا كنادير وفساتين ومغربي يبالهن وقت لين مايخلصن..اما الاشياء الجاهزه عقب قراب العرس...

ام سلطان: من العين بنشتري...مب تقوليلي بنسير دبي والا بوظبي...

عنود: القطع من هني...اما الاشياء الجاهزه اسمحيلي....دبي او بوظبي على قولتج...

ام سلطان: ياااااااااامن بلييييييييته...وعاد اشووو فيهن دبي والا بوظبي اكثر عن العين...!!

منى: عمووه صدقها... في دبي وبوظبي تحصلين اشياء احسن بوايد عن العين... الا الحين قاموا يعدلون ويحطولنا محلات سنعه..بس اسعارهم شابه ظو...

ام سلطان: وتراها بوظبي بعد شابه ظو...

عنود: بس دبي والشارجه اسعارهن زينه وايد...وبحصل اللي اباه...

ام سلطان: انزين كل شي في حييينه .....احين انتي شو تبين ..؟؟ بس قطع..

دورت عنود في بالها شي ثاني...

عنود: هممممممممم...هي...حاليا القطع بس...ويوم بحصل شي ثاني بقولج...

ام سلطان: خير ان شاء الله...الحين خميس وجمعه السوق ماينطاح...الا جان السبت والا الاحد..

عنود: تمام... ووين بنفصلهن...؟

ام سلطان: بوديج خياط زين وبتفصلين اللي تبغينه...

سكتت عنود يوم حصلت اللي تبغيه... وتذكرت باسف..انها كانت مخططه يروحن هي وحصه رباعه... بس حصه بالنسبه لوضعها.. ماتقدر حتى تخطط معاها شو تاخذ وشو تسوي...وفجاه وبدون مناسبه..تذكرت خليفه...تذكرت انه كان يبغي حصه...ياترى شو شعوره الحين وقت مازال الحاجز اللي بينه وبينها..؟؟.... ياترى بيخطبها ؟؟ بعده يحبها..؟؟؟....هي تدري ان حصه اذا تزوجت خليفه بترتاح بحياتها معاه..لانهم من نفس الطينه.... ويناسبون بعض ...يارب تكتبها له يااااااااارب تجعلها من نصيبه....وكانت تدعي لاخوها ولحصه بعد....

فطوم اول ماوصلت البيت حصلت منى ومنال في استقبالها ... هالثنتين كانن اكثر حد متوله عليها... سلمت عليهن وهي مستانسه بشوفتهن... اما سعيد فمن وصل البيت وهو معتفس ويهه لانه شاف سيارة قوم خالته واقفه...وخاف انه خوله تكون موجوده... دخل البيت ويا فطيم وشافهم كلهم يالسين...امه وشيخه وخالته وبنتها خوله والبنت الصغيره ميثا... حاول يحافظ على ملامح ويهه عاديه سلم على امه وخالته والبنات بشكل بارد...وبعد ماخلص.. وتريا فطوم تخلص سلامها الربشه هذا...

سعيد: اسمحوولي عاد انا راد تعبان وبسير ارقد...

ام فيصل: وين ابوويه مابتسحر..؟؟

سعيد: لا امايه كلت فبيت عموه شبعان... بس وعوني عند صلاة الفجر...

ام فيصل: ان شاء الله ابويه...

طلع عنهم وسار غرفته... وفطوم يالسه بين خوله وشيخه...وهي متشققه وفرحانه بشوفتهم..

فطوم: ماتولهتوا عليه...؟؟

ام فيصل: والله يابنتي البيت بلاج ناقص....

فطوم: فدييتج يامااايه...شخباركم..؟؟ وين ابوويه..؟؟

شيخه: ابويه رقد...شخبارهم بيت عموه..؟؟

فطوم: كلللللللهم بخير ويسلمون عليكم....

ام فيصل: شو مسويه بدراستج انتي..؟؟

فطوم: الحمد لله امايا... يبت ثلاث امتيازات وجيد جدا وحده...

شيخه: ماشاء الله عليج..مبرووووك...

خوله: مبروووك ثرج كدييده ونحن ماندري..

فطوم: الله يبارك فيكم...عاد هاي الا امتحانات منتصف... ونوره ماتقصر مسكينه تساعدني.. وبعدين لازم اييب امتيازات عشان الكليه تمشيني في التخصص اللي ابغيه بدون مشاكل..

ام فيصل: لالا فديتج حرمه...ماشاء الله عليج...هاجذه اباج...شدي حيلج وخلصي دراستج بسرعه..

فطوم: لا توصييين امااياا....

شيخه: خوله ماخبرتي فطيم عيل بالخبر السعيد....!!

تلفتت فطوم...

فطوم: اي خبر سعييييد...؟؟؟

شيخه: ههههههه خوله انخطبت...

بطلت فطوم عيونها ....ماتخيلت ان خوله تنخطب بهالسرعه...من كثر اللي ردتهم...

فطوم: والله..؟؟؟ مبروووووووووووووك ويا ويهج شحقه ماتتصلين وتخبرين..؟؟

خوله: والله انتي اللي ماتتصلين ولا تتخبرين عني....

فطوم: يااااااالله انزين خيركم من بدأ بالسلام....!!..وانتي كلش كلش...!!..

خوله: ههههههههه المهم دريتي الحين...

وفطوم: ومنوو تعيس الحظ...او اقصد سعيد الحظ...؟؟؟

خوله: معاااااارف....اخو ربيعتي.... هذي كم مره لمحت لي وانا كنت ارفض بشي غير رسمي يعني..بدون ماحرجها... بس اخر مره رمستني بشكل جدي شوي وقتلها حياكم الله الشور شور اهلي وجي...والله ماجذبت خبر...يابت اهلها وخطبوا.....سبحان الله صار نصيب...

فطوم: اهاااااا..زين والله ....الله يوفقج يارب...

فطوم استانست عشان بنت خالتها.... مع انها كانت حاسه ان خطبة خوله مجرد ردة فعل لخطبة سعيد... لكن سبحان الله...الله يوفقها ان شاء الله....وتنسى سعيد وتفكر بخطيبها....يالله ربيعتها بتساعدها على هالشي بعد.... !!..وان شاء الله بتنسى سعيد وبنفتك من هالصدعه...

بالباجر فطوم زجمت... وخمنت ان السبب هو تغير الجو بين العين والشارجه في هالوقت من السنه..وكان في البدايه زجام خفيف...بس يوم يا يوم الجمعه زاد زجامها...وكانت تعبانه وايد منه ..امها قالت لها بتوديها العياده بس فطوم ماطاعت لانه بعد شوي بترجع العين مع سعيد...وفعلا بعد صلاة العصر طلع سعيد مع فطيم اللي تعاطس وحاطه كرتون الكلينكس فحظنها..صوب العين... حتى انه تعب من كثر مايقولها يرحمج الله ويرحمج الله...واخر شي وقف وماقام يقولها...وهو في خاطره يقول هذي ماتنعطى ويه ...!!!... من اقولها ردت تعطس مره ثانيه عيبتها السالفه.....!!... اول مادخل العين مسك تيلفونه واتصل بحمدان... وقاله انه في العين وبيفطر فبيت عمته...ورد عليه هذاك انه بتلاقى وياه في بيت عمه ... لكن يوم وصلوا البيت حصلوا حمدان قبلهم واصل...وتوه موقف سيارته عدال سياره ناصر... وقف مستانس وهو يتريا سعيد ينزل ....وقف سعيد سيارته ونزل... ونزلت فطيم من الصوب الثاني. وهي من حالتها مب منتبه ولامهتمه لحد.... توايهوا الشباب وتوهم بياخذون اخبار بعض الا وفطيم متسانده على مقدمة السيارة وعطست ثلاث عطسات ورا بعض... حمدان عقد حياته واطالعها بفضول... شكلها مب صاحيه... من العادة ان واحد اذا تلاقى ويا ربيعه ومعاه اهله ...لازم مايطالعهم ولا يصد صوبهم لانه مب من الحشمه...لكن حمدان ماقدر يمنع نفسه... هذي فطييم.....الشيخه فطيم... انتبه لسعيد اللي معتفس ويهه من نظرة حمدان لاخته...

سعيد: مزجمه...

تدارك حمدان نفسه وخوز اي اهتمام واضح على ويهه...

حمدان: آآها...حيالله سعيد قم روحنا الميلس...

طنش سعيد الموضوع لانه يدريبه خبله شوي.. ومشا معا حمدان اللي حاط اييده على ظهر سعيد عشان يجدمه.... ويوم اجدمه شوي التفت حمدان لفطيم..وشافها وهي تمش خشمها من تحت الغشوه وتسحب شنطتها وراها....كسرت خاطره...سلامات يافطيم...ماتشوفين شر...فيني ولا فيج... بيقولها هالكلام عقب...اذا شافها...

دخلت فطيم البيت وماشافت حد.. دخلت حجرتها وفرت شنطتها ودخلت الحمام تغسل ويهها..عشان تصحصح شوي... عقت الشيله والعباه ولبست شيلة بيظا وطلعت ادورهم.... في الصاله حصلت عليا اطالع مسلسل مع حصه ومعاها هلال وسلامه..

فطوم: السلام عليكم...

انتبهوا لها ونشوا يسلمون عليها...

فطوم: سوري علايه مابحب عيالج اخاف اعاديهم بالزجام...

حصه: وابوي شياج زجمتي..؟؟؟

عطست فطيم...

عليا: يرحمج الله...اظني الجو تغير عليها...

هزت راسها فطيم كانها فقيييره ....

فطوم: هذا هو..الجو... خاطري جذي اتودن فماي حااااااااااااار...

حصه: ههههههههه اذاترستي الحوظ ماي حار شوي وبيبرد....خليهم يودونج مبزره..

عليا: ههههههه هي والله.. وناسه تصدقين من زمان ماسرت....قالوا عدلوها ولا اعرف كيف شكلها احين..

تلفتت فطوم مستغربه..

فطوم: شو هاي مبزره..؟؟؟

حصه: العين الحاره اللي في يبل حفيت...

فطوم: هييييييي....ماوديتوونا عيل من قبل...

حصه: دخيلج منو يفتكر فينا نحن يودينا..!!!!.. كلن لاهي بعمره حبيبتي..

فطوم: لا اتشكـّين...الا نفس حالتكم ترانا..بس شوي على اخف...شوي بس..

عليا: ههههههههههه هناك عنصر واحد متعصب اللي هو خالي...هني عنصرين ابوي وامي...

حصه: هههههههه الله يطول بعمارهم...برايهم متعصبين ...

دخلت ام خالد وهي تعبانه ..فصخت برقعها وفرته على الكرسي..

ام خالد: ياااحيالله فطيم...يييتي امايه..!!

نشت فطيم وسلمت على عمتها....

فطوم: هي يطولي بعمرج...يسلموون عليج هناك وايد...شحالج عموووه..؟

ام خالد: بخير فديتج... عسى ماشر اسمع الحس خربان...

فطوم: زجااام مسكني الله يبعده عنج ان شاء الله....

ام خالد: واااعلييي ....سرتي العياده..؟

فطوم: لا عمووه الا زجام وبيخوز مايحتاي...استريحي....

يت ام خالد ويلست عدال عليا...

ام خالد: آآآآآآآيه...ياظهري... عنبوو ذيج البشاكير اللي ماتفهم شي...مايسوون شي الا بقول...

عليا: ارووحج يا امايه معثره عمرج والا هم كل يوم يسوون هالشغل وحفظوا مساكين...

ام خالد: لا والله ان ماسرتلهم انا والا وحده من البنات مابيخلصووون الساع... احين الا خليت نوره عندهم مادري شو تسوي في المطبخ ...

حصه: تسوي ورق عنب...

فطوم: سلاااامي عليها...سوت ورق عنب يوم انا ما اطعم شي بسبب هالزجام...فالحه...

عليا: هههههه وحليلها شو دراها فيج... ؟

كملوا سوالف لين قراب الاذان..دخلت نوره على طول ركبت فوق وبدلت ثيابها وتغسلت...ونزلت.. سلمت على فطيم ...وفطروا.... بعد صلاة التراويح رجعن يتيمعن...في الصاله..وعليا معاهن وام خالد وحريم العيال ميرة وحمده....

فطوم: احين شوو بخصوص مبزره هذي....صدقت انا...

ام خالد: شو عندكن...

فطوم:عمووه يقولون عندكم مبزره حلوه اون...

ام خالد: والله يابنتي انا ماشفتها من زمان...احيدها الا يوم اول ما طلعت...كانن الا فوزات وبيبات ...شو تبينها انتي..؟

حصه: تبا تسير تودن في الماي الحار..

فطوم: لا ما بتسبح...الا جان بغط ريولي وبنشوووف....

ام خالد: منو بيوديكن..؟؟؟

فطوم: سعيد....

نورة: حمدان بعد موجود...واخواني موجوودين...

حمده: ناصر ماظني يقول لا... بس اخافه زحمه... !!!

حصه: شو عليكم انتوا انزين من الزحمه...الدوريات هناك تارسه الدنيا ممنوع التحرش...

عطست فطيم ..وقالت

فطوم: خلوونا نسير حراااااااااااااااااام.....ماكد شفتها هذي انا...

نورة: ههههههههههههههههههههههه قسم بالله حاله...تعاطس ومريضه وحالتها حاله وبعد تبا تحوط...

فطوم: ههههه انا يوم ايبون طاري الحواطه والطلعه ماعرف المرض...بس الا هو يتلصق فيني غصب...

ميره: هههههه انزين جي مابتستانسين ...اجلي السيره لين ماتصحين...

فطوم: لالا بسير جان حد بيوديني...شوفووا الجو قسم بالله مايتفوت...براد وكشخه...

ام خالد: مايخالف انزين لاتخلون شي فخاطر فطيم... شاوروا اخوانكم...

حمده: بتصل بناصر بشوفه جان يطيع...

مسكت حمده تيلفونها واتصلت بريلها..

ناصر: هلا ...

حمده: هلا نااصر...شخبارك..

ناصر: بخير..علومكم..

حمده: الحمد لله...انته هني في البيت..؟؟

ناصر: هي نعم في الميلس...خير.؟؟

حمده: مااشي بس البنات يبن يسيرن مبزره جان بتوديهن..

ناصر: الحيييييييين...!!.. ماقلتوا قبل انا عندي رياييل احين ماروم اخليهم واسير...

حمده: هيي...خلاص برايك عيل..

ناصر: فمان الله..

سكرت حمده ..

حمده: ناصر عنده رياييل اون مايروم يخليهم ويسير...

برطمن فطوم ونوره...

فطوم: بتصل بسعيد...

حصه: بتسيرين اروحج ويا سعيد...!!

فطوم: لا انتوا وياي...

ام خالد: البنات مايرومن يركن ويا سعيد بنتي...

ميرة: حمدان انزين...وانا بسير وياكن جان الا تستحن... انا بقول لخالد لكنه معزوم وطلع...

نورة: حلوو...وامايه بعد بتسير...

ام خالد: لالالالالالا...حشى عليه انا مافيني...

فطوم: عمووووه اسميج الا بتسيرين..عشان خاطري...يالله بتسيرين بتفرييين شوي...وبتغييرين جو..وبتشوفين مناظر حللللوه...

ام خالد: والله يابنتي انه مافيني...

عليا: سيري امااايه..بتشوفينها شقى غدت يقولون وايد حلوه....والبنات يبنج تسيرين وياهن...

ام خالد: هممممم..امري لله ...بسير وياكن...

فطوم: ياسلااااااااااااام...خلاص بتصل بسعيد وانتي رمسيه...

اتصلت فطوم بسعيد وعطت التيلفون عمتها...سعيد يوم بترمسه عمته مابيروم يقول لا...وبيستحي منها...وحمدان نفس الشي... وهذا اللي صار..من رمستهم ام خالد قالوا " تـــــــــم"...

على هالحال راحن نورة وفطوم وام خالد وميره وعليا يتلبسن عبيهن... ويوم تجمعوا شافوا حمده وحصه يالسات...فطوم قالت..

فطوم: افااا حصيص....مابتسيرين..؟؟

حصه: وين اروم اسير مكان انا....العده..والا ناسيه..

برطمت فطيم...

فطوم: السيره مب حلوه بلاج...

حصه عرفت ان فطوم انحرجت لانها نست سالفة العده... فحبت تخفف الجو..

حصه: سيري سيري لاتسويلي فلم هندي... وتودني في الماي الحار ...

كان جواب فطوم عطسه...

بعد شوي طلعوا وحصلوا الشباب واقفين جدام السيايير... ام خالد ركبت مع سعيد ومعاها فطوم وعليا اللي خلت هلال عند حصه وشلت سلامه بس وياها..اما نوره راحت مع ميره وعيالها (حمد ومحمد وشما) وحمدان.... الشي اللي خلا سعيد يفور غييظ... حتى سلام ماسلمت الحماره..وفوق هذا راكبه ويا حمدان..!!!. ليش وانا شوفيني...؟؟ ناقص ايد والا ريل وماعرف اسوق..؟؟؟.عقب استهدى بالله وعرف ان هذي وصاة العيوز اللي عداله... اوكي السيره وسارت ويا حمدان وهذي وصاة العيوز...؟؟؟ لكن مايظن ان عمته وصتها تركب ورا حمدان وتلصق في كرسيه و ترمسه....!!!.... ماعليه يانوروه دواج عقب.... وكمل سواقته وهو يفور من الغييره

يتبع ......

الجزء الخامـــــــــــــــــــــــس والثلاثون



وصلوا كلهم مبزره وهم يشوفون المناظر الحلوه والمناطق الخضرا الوسيعه..والنخل والترتيب العدل.. وام خالد الا تبصبص وتذكر الله على حلاة هالمكان وتدعي لابو خليفه اللي موصي علىهالمكان الطيب .... وفطيم تخبلت عالمكان والشلالات الصغيره اللي مسوينها... والخيام والشاليهات... ويوم شافت الجاكوزي صرخت واصرت على سعيد الا يوقف عشان تشوف...ظحك عليها وقالها ان هالجاكوزي مكشوف وللرياييل..وفي احواض خاصه بالحريم...فمكان ثاني....خلاصة القول ان المكان وااايد عيبهم... وقفوا عند واحد من الشلالات الصغيره فمكان بعيد عن الناس شوي..عشان ياخذون راحتهم... نزلوا كلهم وكل حد مسوي حمله استطلاعية يستكشف المكان...فطوم تمشت مع نوره وهن متحجبات...ام خالد وميره وعليا والبنات شما وسلامه قعدوا جدام وحده من الخيام قريب من الممر اللي مسوينه اللي يمشي فيه الماي الحار... ..اما سعيد وحمدان والصغار حمد ومحمد عيال خالد ساروا مكان ثاني بعيد شوي عشان الحريم ياخذن راحتهن.. وقعدوا على اطارف الحوض قريب من الشلال الصغير..وكان الماي ظوووووووو.... وحاطين ريولهم داخل الماي وكل شوي يشلونها من الحراره وهم يظحكون على بعض ويسولفون...

بعد الحمله الاستكشافيه اللي سونها فطوم ونوره... رجعن صوب الحريم وفطوم مفتووونه بالكامل بالمكان...وايد حبته.. وحبت طريقتهم بترتيب الكشافات تحت اليبال ومخلينها واضحه ومبينه بشكل وايد حلوو... ومانكد عليها شي غير المعاطس اللي ماوقف... قعدن فطوم ونوره مثل ماقاعدين سعيد وحمدان.. وحطن ريولهن في الممر.. في الماي الحار... بس طبعا مكان ثاني بعيد عنهم..

سعيد: اووف ياخي الماي يصلخ..شقايل متحمل..

حمدان: منو قالك متحمل...!! الا اكاااابر...آآآخ...

ورفع ريوله...

حمدان: يصلخ من الخاطر....

سعيد: انا ابا اعرف هالشواب شقايل يتحملون..؟؟ قسم بالله شايف واحد منهم من زمان قبل لا يستوي هالتعديل.. يالس تحت الفوز اممره..ومخلنه يصب على يامعته..وانته تشوف دخنة الماااي الحار... استغربت منه كيف متحمل الحراره...

حمدان: ههههههههههههههاي يابوي هذيلا شواب اول..مب نحن....جيل فااسد ومدلع...

سعيد: انته الجيل الفاسد...

حمدان: والله...!!!.. عيل اراهنك...

سعيد: ههههههههه حرام الرهان...

حمدان: اتحداااااك انزين....

سعيد: على شوووو؟؟

حمدان: تربع في هالماي حافي من هني لين اخر الممر عند اللفه....

سعيد: وانته تتفرج...؟؟

حمدان: بربع وياك..وبنشوف منو يتحمل الماي الحار اكثر..اللي يغلب يطلع جيله مب فاسد ههههههههه...

سعيد: هههههههه...واللي ينغلب..؟؟

حمدان: همممممممممممممممممم....!! افكر..

سعيد: اللي ينغلب ياخذ سحور وعشا حقنا كلنا...

حمدان: تــــــم... يالله...

وحمد ومحمد يظحكون على خالهم وربيعه....ويراقبون بحماس...

وقفوا حمدان وسعيد في نص الحوض الصغير.. شوي وطلع سعيد مره ثانيه عن الحوض..

سعيد: اححححححححح..ههههههههه يحرق والله صبر خل ريولنا تدفى...

ظحك حمدان وطلع من الحوظ هو بعد... التفت وراه وشاف البنات يراقبن بفضووول من بعيد... رد صد عنهن قبل ما ينتبه سعيد... ..ويوم خلص ..قاله سعيد..

سعيد: اول ما ندخل الماي عد ...مب تخلينا ننصلخ عقب تبدا...!!..

حمدان: هههههههه متروع...انزين يالله...

دخلوا داخل الحوض وعد حمدان لين ثلاث وترابعوا... شكلهم كان ينقع من الظحك..ويا الازعاج اللي مسوينه وكل حد رافع كندورته... مثل الخبايل...والعيال يظاحكون ويصارخون عليهم.... والحريم بدون مايفهمن السالفه قامن يظحكن على الخبال بس...

ام خالد: ياااااااااااالله بعقل....

بعد مرور دقيقه من الربعان طلع حمدان من الحوظ وهو ميت من الظحك...وطلع وراه سعيد يوم شافه استسلم...

سعيد: هههههههههه هااااااااااا....جيل فاسد.... آآآخ صلخت ريوولي حسبي الله عبليسك...

حمدان: ههههههههههههههه..عنبووك ويا يلدك هذا تقولون يلد تمساح ماتحس...

سعيد: اهب هباك الله...

حمدان: ههههههه والله صدق...انا كل اسبوع ايي هني واتسبح .. احين انته تتحمل اكثر عني انا..

سعيد: ههههههه بعد ربّك شو تسوي...تحمل مصروف العشا عاد احين...

حمدان: ههههه الله كريم....

ردوا يتمشون برا الحوض صوب المكان اللي كانوا يالسين فيه من اول....بعد شوي ردوا ركبوا السيايير وغيروا مكانهم لمكان ثاني فيه العاب عشان اليهال يلعبوون شوي... ونفس الشي قعدوا سعيد وحمدان بعيد عن الحريم..ويوم كملوا ساعه وشي وهم يالسين..ملوا...وردوا البيت...وقال سعيد لعليا تجهز لانهم بيردون العين... بس الحين بيسير ويا حمدان يشترون عشا مثل ما هو متفق وبيردون...

بعد مارجعوا حمدان وسعيد كانت الساعه حوالي الـ 12 في الليل... وماعرفوا وين يودونه لان العشا يباله ترتيب...يوم دخلوا المطبخ حصلوا نوره هناك تسوي عصير فيمتو...ارتبكت يوم شافت سعيد وعرفت من نظرته انه ناوي على شر....

حمدان: شو تسوين..؟؟؟

نورة: فيمتو...

حمدان: اندووج هاا..(وحط الاكياس عالطاولة). دام انج في المطبخ رتبي العشا وطرشيه...

نورة: ياسلااااام...البشاكير رقود تباني اعابل ارووحي...؟؟؟

حمدان: يابوي البيت متروس بنات وحريم ماشاء الله زقريهن بيعاوننج.. وعقب زقرونا بنشله الميلس..

سعيد: وانته اشووووو لك قاعد تسولف ويا خطيبتي...روح الميلس وانا بتفاهم وياها...

تلفت حمدان بين نوره وسعيد.... وادرك ان الوضع غلط..المفروض مايخليهم رواحهم...عيب..

حمدان: احلف انت بس..!!!...لا مافيه..نظهر رباعه من هني...

سعيد: حمدان..... اباها فسالفه ومابطول....هويييينا...

تردد حمدان وتم واقف مكانه..لين ماطفر سعيد ..

سعيد: اوهووووووو علينا....يالله ابوي برا برا....جيل فاسد هههههه

حمدان: ههههه والله ان طولت بخبر خوانها عليك...

سعيد: مابطول...

طلع عنهم حمدان وسار الميلس... تريا سعيد شوي لين ما تاكد انه محد يسمعهم...جابل نورة المتوتره وحط ايده فمخابيه...

سعيد: هااا آنسه نوره....!!...لا سلام..ولاشحالك..ولا شي...!!!...

نورة: سعيييد.... وين تباني اسلم عليك جدامهم كلهم....!! ..استحيت والله ماقدرت...سوري..

سكت سعيد شوي....وهو معصب ومرصص عيونه ....

سعيد: عيل ما استحيتي تقعدين ورا حمدان فسيارته وتسولفين وياه..؟؟؟؟؟!!!

بطلت نورة عيونها مستغربه...!!!...احين هالشي اللي مزعل سعيد..؟؟..حمدان....؟؟؟ حمدان اللي متخبل عفطيم..!!!..حليلك ياسعيد...ما عرفت من منو تغار جان تغار من حمدان...!

نورة: ههههههه...سعيد....تغار من حمدان..؟؟

تململ سعيد في وقفته ...

سعيد: شوفي...ادري بتقوليلي ولد عمي ومتربي ويانا ومثل اخونا وفوق هذا اصغر عنج... بس انا مايهمني هذا كله.. ماتحمل اشوفج تسولفين ويا واحد ثاني بهالحرية...!!!

عقدت نورة يديها فوق صدرها متظايقه..

نورة: انا طول عمري اسولف واتظارب ويا حمدان.... وانته تعرف طبيعه حمدان كيف...الواحد ينسى نفسه وياه من سوالفه وروحه المرحه.... حتى انته اروحك مابتعلق به جذي لو ماكانت شخصيته حلوه وسوالف..

عصب سعيد اكثر..

سعيد: بعد ياسه تمدحينه جدامي...!!! ... ماتعرفين شي اسمه مراعاة المشاعر...!!!

نورة: شو تقترح يعني..؟؟.. ما اشوف حمدان ولا اسلم عليه ولا اسولف وياه...

سعيد: انا قلت جذي احين...!!!

سعيد بدا صوته يرتفع...

نورة: تراك انته محتشر لاني اسولف ويا حمدان....

سعيد: خففي شوي...على الاقل جدامي... وبعدين حمدان مب صغير اعتقد ريال ..والمفروض تستحين منه...

نورة: استحي من اخوي....؟؟؟...شو بلاك سعيد..!!! انته طول عمرك تعرف علاقتنا كيف بحمدان...بس الحين احتشرت..!!.. وبعدين حمدان يدريبي اني مخطوبه.. وماغير تعامله وياي لانه من البدايه ماشي فقلبه صووبي.. ولو شي في خاطره مابيتجرأ يكلمني بهالحرية جدامك...

سعيد: اوهووووو علينا..انا ماقلت انه يحبج.... انا اتكلم عن تصرفاتج انتي وياه...

نورة: شفت مني شي غلط...

سعيد: وااااااااايد مطيحه الميانه وياه نووره....

سكتوا وهم يتنهدون وكل واحد منهم معصب عالثاني....

نورة: خلاص سير قوله لا يعطيني ويه يوم ارمسه...وقوله لا ايي صوبنا...ولا يسولف ويانا...لاني انا بصراحه ماقدر اغير تصرفاتي ويا حمدان بدون سبب مقنع وبدون مايكون هو له ذنب في السالفه هاي...

سعيد: نوره...تراج تجلبين الرمسه....

لبسته نوره وهو فاااايره من غيظها... وقامت تفتح الاكياس وتفرغهن وترتب العشا...وسعيد يراقب بعصبيه...

سعيد: رمسيني يوم ارمسج...

نورة: سعيد..دخيلك...بس عاد لا تكبر سالفه تافهه...شكلك تولهت على الظرايب وياي فحصلت حمدان سبب...

سعيد: احين سوالفج ويا ولد عمج سالفه تافهه...!!!....نوره انا ماتحمل اشوفج تسولفين وياه جي شحقه ماتفهمين...!!

نورة: سعيد...هذا اخوي...مب ولد عمي...تعرف شو يعني اخوي...!!!...مافي داعي تغار منه...والله...

سعيد: والحل يعني...؟

صبت له نوره كوب فيمتو وحطت له ثلج...

نورة: اندوك يابوك برّد شوي...انته تباني اخفف سوالف ويا حمدان خلاص فالك طيب....ويوم بتكون موجود مابرمسه موليه..

سعيد: احسن... اعتقد انا اسد عن حمدان وغيره بالسوالف..مافي داعي تسولفين ويا غيري...

ظحكت نوره...من وين ياب سعيد هالغيره...!!!...

نورة: اصلا انا ماقارنتك باي شخص ولا بقارنك بعد.... ولا اسمح لك تقارن بينك وبين اي شخص...

ابتسم سعيد....صدق اللي قال بان الرايييل يهال كبار....استانس بهالكلمتين وخازت ظيجته عنه...

نورة: يالله سير الميلس قبل لا ايي حد ويشوفك هني...

ماتحرك سعيد وشكله كان متردد...

سعيد: زعلانه علي..؟؟

نورة: همممممممم...ماعرف...

سعيد: لا تزعلين...زعلاتج شينه انتي....

فكرت نوره بحمدان المسكين..وحبه اللي داسنه....لو يدري سعيد شو بيقول..؟؟ ..هذا مجرد سوالف بينه وبين نوره عصب وحالته حاله ...كيف لو يدري باللي في خاطر حمدان صوب اخته...!!!..واللي يسويه فيها وغلاسته عليها؟؟.....وهي آخر شي تباه انه علاقته بحمدان تخترب..لين الحين هم حلوين مع بعض...

نورة: مابزعل لكن بشرط...

سعيد: شوو..؟

نورة: ماريد علاقتك بحمدان تتاثر.... اباكم اتمون ربع مثل ما انتوا واكثر...

سعيد: وليش تتاثر...؟... ويا هالويه انتي فاهمه ردة فعلي غلط...!! ...انا مب شاك لا فيج ولا فيه..واعرف انكم مثل الخوان... السالفه كلها فيني انا...انا اغار..ما اتحمل...

ابتسمت نوره وهي مرتاحه وقافطه... وماعرفت كيف ترد عليه...

نورة: عيبتك السلسله..؟؟

ابتسم سعيد.

سعيد: واايد حلوه... خوزت كل الاشياء اللي كانت معلقه وخليتها هي بس...مشكوووره عمري..

نورة: العفوو...يالله روح الميلس...اخاف حد يشوفك...

سعيد: شي فخاطرج.؟

نورة: سلامتك سعيد..

سعيد:الله يسلمج... فمان الله..

طلع من المطبخ وسار الميلس.. وطلعت نورة من المطبخ هي بعد ودخلت داخل البيت وزقرت حصه عشان تساعدها لانه فطيم مريضه مافيها تطلب منها شي...

خلصن ترتيب العشا وطرشن نصه للميلس والنص الثاني للحريم.. وبعد ماتعشوا.. سارت عليا وجهزت شنطتها هي وعيالها وطلعت لسعيد اللي كان يترياها هو وحمدان واقفين جدام الاكس فايف..سعيد وعليا سلموا على حمدان وركبوا السياره وساروا الشارجه.. وحمدان بعد ماطلعوا ركب سيارته هو بعد وروح بيتهم... وهو كله يفكر بفطيم المريضه وكاسره خاطره بالقو... كان وده يروح لها..ويكلمها ويخفف عنها...باي طريقه...لكن يعرف ان هالشي صعب جدا ويمكن مستحيل....

فطيم عطتها نوره بنادول وخلتها ترقد... ولاحظت ان حرارتها مرتفعه شوي..لكنها قالت يمكن خلال الليل تنزل الحراره.... لكن باجر الصبح كانت ارتفعت اكثر...وحلفت عليها نوره ما اداوم في الجامعه...ووصت امها عليها لانه حصه كانت راقده... وراحت هي للجامعه...

كانت الساعه 2 الظهر ونوره بعدها تتريا في الرسبشن...كانت قايله للدريول اييها الساعه 1 كالعاده لكنه تاخر وايد..والمصيبه ماعندها بطاقه تتصل...وتيلفون الرسبشن متكاودات عليه البنات ومافجنه.. بس يوم حصلت وحده من ربعها وخذت منها بطاقة تيلفون واتصلت بامها..

نورة: وين انتوووا..؟؟ ناسيني اشوو؟؟ انا صارلي ساعه اتريا الدريول هني..

ام خالد: يابنتي انا شليت الدريول...موديه فطيم العياده...

نورة: وديتيها العياده..؟؟ مانزلت الحراره..؟؟

ام خالد: لا مانزلت..بغيت اعطيها بنادول ماطاعت تاكله ماتبا تفطر...

نورة: هممممم..زين سويتي يوم وديتيها...انزين امايه..اتصل بحمدان اخليه اييبني..؟؟؟

ام خالد: لا تعبلين عالريال...

نورة: تلقيينه احين طالع من الكلية...منو بييبني عيل..؟؟؟

ام خالد: يابنتي شقايل تركبين وياه ارووحج..بدون مايكون حد وياج...

نورة: يالله يا امايه من متى حمدان صار غريب يعني..؟؟؟ تراه مثل اخوويه..

ام خالد: انزين ماعليه.. بعد ماروم اقولج تريينا اخاف نبطي...

نورة: لا برايج تمي ويا نوره وانا بتصل بحمدان وبيوديني البيت...

ام خالد: خلاص عيل...فمان الله

نورة : مع السلامه...

سكرت نورة عن امها واتصلت بحمدان....

حمدان: آآلووو..

نورة: هلا حمداااااان...شحالك.؟؟

حمدان: اهلييييين نوره...بخير علومج..؟؟ شو هالرقم من وين متصله..!!

نورة: انا في الجامعه...تروم تخطف عليه..؟

حمدان: وين دريولكم..؟؟

نورة: شلته امااايه...

حمداان: كالعاده يعني...!!

نورة: موديه فطوم العياده...

حمدان: شووووووووووو..؟؟؟؟ شو بلاها...؟

نورة: انته تعال الجامعه وبخبرك في السياره...

حمدان: احين رمسي...شوفيها...؟

نورة: مريضه تراها...غير الزجام فيها حمى الحين...

تم حمدان ساكت...مظايق وزعلان....مب عارف شو يقول...يخاف يقول شي يقوم يبين عن مشاعره صوب فطيم...وهو مايبا حد يعرف....

نورة: آلوو..؟؟

حمدان: خلاص احين بخطف عليج... باي

نورة: اووكي باي..

رجعت نورة البطاقه لربيعتها وقعدت تسولف وياها شوي لين ماوصل حمدان....استسمحت منها وروحت للسياره... كان حمدان فااار سفرته ورا.. ولابس نظارات شمسية...وشكله مظايق...

نورة: بلاك حمدان..؟؟

حمدان: ماشي...ليش؟

نورة: شكلك معتفس...

حمدان: ابا ارقد...

ابتسمت نوره... وهي تدري انه اظايق بس يوم سمع خبر فطوم...

نورة: تبا ترقد...!!..آآ..يعني مب مظايق عسب خبر فطيم..!!!

التفت حمدان صوب نوره بسرعه...لاحظت نوره من حواجبه وشفايفه انه مرتبك ومتوتر... رجع التفت عنها وهو يشوف الطريق وزاام شفايفه بعصبية...كشفتني...كيف كشفتني..!!!..والا انا كنت واضح بمشاعري لهالدرجه...!!

نورة: ههههههه... لا تخاف الا زجام وحمى.. يومين وبيخوز عنها....

تم حمدان ساكت...وما انكر مشاعره...

حمدان: هي ماداومت اليوم..؟؟

نورة: لا ماداومت..امبونها تبا اداوم بس انا ماخليتها....

هز حمدان راسه موافق على هالموقف...

يوم وصلوا البيت قال لنورة قبل ماتنزل...

حمدان: اقول...احم....سلمي عليها...قوليلها سلامات..وماتشوف شر..

تساندت نورة عالباب وهي تظحك...

نورة: ياعيني......ياعيني....يازينك ياخي يوم تحب....حتى ملامحك تغيرت...احلويت حمدانوه...!

ظحك حمدان وهو قافط...

حمدان: جلبي ويهج....

نورة: ههههههه مشكور عالتوصيله...باااي

دخلت نورة البيت وهي تسمع سياره حمدان الرنج تطلع من البوابه...سارت غرفتها وتسبحت وانسدحت شوي عالشبريه ترتاح لين العصر...وبعد ماصلت نزلت تشوف فطيم...كانت هذي منسدحه فشبريتها والكلينكس عدالها ووييهها محمر من الحراره وشكلها تعبان..دخلت نوره وقفلت الباب وراها وقعدت عدال فطوم وحطت ايدها على يبهتها...

نورة: شو تانسين..؟؟

فطوم: متكسره والله.....

نورة: سلامات ماتشوفين شر....عطوج دوا.؟

اشرت فطيم على الطاوله اللي عدال شبريتها..كانت فيها كيسه ادويه...

نورة: خذتيه عاد..؟؟

فطوم: ظربوني ابره...ماروم افطر نوروه...

نورة: اهم شي ترتاحين...خلج منسدحه وراقده...الزجام والحمى ما يردها غير الراحه والرقاد...سمعي مني..انا ام البلاعيم ههههههه..

ابتسمت فطوم بتعب...وغمضت عيونها...

نورة: حمدان يسال عنج...

بطلت فطوم عيونها بسرعه..وعيونها تلمع...ماعرفت نورة هذي اللمعه من التعب والحراره والا من اسم حمدان بس...!!!..اكيد الثاني...

فطوم: يسال عني..؟؟

نورة: هو اللي يابني من الجامعه...ويوم درا انج مريضه وفي العياده تم صاااااااااااااااخ وزعل واظايق واعتفس ويهه...ههههه..قتله انج بتكونين بخير وجي...سالني قال هي داومت اليوم..؟ قتله لا ماداومت...وقبل ما انزل قالي اسلم عليج ..واقولج الحمد لله عالسلامه وماتشوفين شر...

ابتسمت فطوم وزاد حمار ويهها..

فطوم: الله يسلمج وياه من الشر....

نورة: بخليج ترتاحين...تبين شي..؟؟

فطوم: سلامتج نوره..مشكوره..

نورة: الله يسلمج..والعفو ماسوينا شي... برد اوعيج قبل الفطور...رقدي وارتاحي شوي...

طلعت نورة عن فطوم وسارت المطبخ وحصلت حصه وامها يعابلن...وقفت معاهن شوي وماحصلت شي تسويه...وردت غرفتها تقرا قرآن لين الفطور....

قبل الفطور راحت نورة ووعت فطيم اللي كانت متكسره من الخاطر ومب رايمه تمشي.. فطروا ويلسوا في الصاله يسولفون...فطوم انسدحت على الكرسي الطويل من التعب ورفضت تروح غرفتها لانها تباتقعد عندهم... لكن مع الوقت..رقدت فطوم عالكرسي ...وتموا كلهم يطالعونها مع ابتسامه غريبه على ويوههم...كسرت خواطرهم...وشكلها بريئه وصغيره وهي راقده بهالطريقه....يوم اذن العشا ...

حصه: نوعيها..؟؟؟

ام خالد: لالا خلوا البنت راقده...خلوها ترتاح...

نورة: بس مب مريحه رقدتها....

حمده: لالا صدقها عموه... دامها رقدت يعني مرتاحه...خلوها..نحن الا بنسير نصلي وبنرد ...

على هالحال قاموا كلهم يصلون التراويح... وخلوا فطوم راقده على هالكرسي....بروحها...

حمدان بعد ماطلع من المسيد خطف على بيت عمه...عنود طالبه كاتلوجات من عند نوره ...ولازم يمر ياخذهن.. وقف سيارته في الحوش ونزل ودخل البيت....وقف عند الباب..وماشاف حد..هدوء...سار الصاله ودق الباب...محد يرد...فتح الباب وشاف ان الصاله فاظيه..وكان بيرد يطلع وبيسكر الباب لولا انه شاف حد راقد عالكرسي...ومن الظعف ما انتبه له...فطيم...سرت رعشه قوية في حمدان....فطيم راقده في الصاله ليش..؟؟؟ فديتها بعدها تعبانه...!!..ليش مخلينها راقده جي قسم بالله مايستحون...!!.. تلفت وهو مكانه..عل وعسى يشوف نوره..بس ماحصل حد...دخل الصاله متردد...بخطوات غير ثابته... وقف جدام فطيم يتامل ويهها الحلو... حن قلبه عليها...وكسرت خاطره...يلس عالارض عشان يكون اقرب... شكلها بيبي...متكوده علىهالكرسي بلا لحاف....من طريقه ضمها ليديها عرف انها بردانه...تلفت في الصاله يدور شي يلحفها به ماحصل...فكر بسفرته...!!..لالا بتعرف عقب انه كان موجود....سار وبند المكيف...على الاقل يخفف من البروده عنها شوي...كان خاطره يمد ايده ويتهيسها حاره او لا...بس ما تجرأ...بتنش...هز راسه عشان يصحصح...اللي يسويه غلط..ولازم يطلع الحين... تحرك من مكانه قبل مايدخل حد ويشوفه... ويوم طلع من الصاله وسكر الباب..وقف عداله..وتساند على الايدار..وحط ايديه فمخابيه وهو يحس فجأه ببرد....شو هالشعور العنيف بالحمايه اللي يحس فيه...؟؟؟ ودّه يروح ويضم فطيم ويخفف عنها....والله لو كان مسموحله مستحيل يخليها راقده بهالطريقه....كيف خلوها وساروا عنها ..؟؟ وهم يدرووبها مريضه...!!...

نورة : حمدان...!!!..

رفع راسه بسرعه وهو منصدم...وحمد ربه انها نوره مب حد ثاني...

اطالعته نوره باستغراب..ونقلت نظراتها بين باب الصاله المسكر وبين حمدان....وقفته غريبه....وملامحه غريبه بعد..

نورة: شو تسوي..؟؟

حمدان: ادورج...

نورة: خير..؟؟

حمدان: عنود مطرشتني تبا الكاتلوجات اللي عندج...

نورة: اهااا... اوكي صبر لحظه بييبهن...

ركظت نورة فوق.وطلع حمدان من البيت عن ايي حد ثاني ويشوفه واقف هالوقفه...وقعد على الدري الامامي للبيت...وهو عاقد صبوعه ببعض..ويتامل في الرخام...وعقله داخل الصاله... بعد شوي يت نوره وعطته الكاتلوجات..

حمدان: مشكووره...

نورة: العفوو...بتسير..؟؟

حمدان: هي بسير...

ووقف في نص الدري..والتفت لنوره متردد...كان وده يقولها شي....بس مب عارف كيف يقولها... هزت نوره راسها كانها تفهمه...

نورة: شفتها...ادري..

حمدان: ماكنت قاصد..

نورة: ادري بعد....لا تخاف بس راقده...ماطاعت تسير غرفتها ..وبعد شوي يوم التفتنا لها حصلناها راقده..وامايه قالت لا توعوونها عشان ترتاح...

ابتسم حمدان...زين انهم مب مطنشينها...بس المفروض مايخلونها...

حمدان: ترومين تيبيلها لحاف...!!.. بردانه تراها...

نورة: ههههههههه احين بييبلها....

حمدان: ولاا تخبرينها اني شفتها...بتظايق وايد...

نورة: ولا يهمك...اطمن بس...وسلم على عنود..وقوم عمي كلهم..

حمدان: ان شاء الله...فمان الله...

ركب حمدان سيارته وروح...وردت نوره داخل البيت ويابت لحاف لفطوم ولحفتها وهي تبتسم وتذكر حمدان..وتتساءل ..ياترى حمدان شو سوا بفطيم يوم كان هني...؟!


انتظروا الجزء الياي ....

الجزء الســــــــــــــــــــــــــــــــــــــــــادس والثلاثين




تمت نوره قاعده عدال راس فطيم ...بعد مالحفتها وهي تفكر بشكل حمدان يوم كان واقف.....شكله غريب..مقهور..ويفكر بعمق... كانه مستغرب او خايف من شي.... معقوله يكون خايف من مشاعره..؟؟؟؟....لالا..حمدان دايما جريء... بس محد يدري يوم يتعلق الموضوع بالحب...حسب علمها حمدان مب راعي هالسوالف..يحب يغلس ويمزح بس اول مره يهتم بشكل شخصي وايد بوحده من البنات...!!!.. وماتدري كيف ممكن يتصرف او يحس... تحركت فطيم وقاطعت حبل افكارها..واطالعت حواليها وعقب اطالعت نوره باستغراب...
فطوم:.......الساعه كم..؟؟
نورة: الساعه تسع ونص..
نشت فطوم ويلست وهي حاطه يديهاعلى ويهها وترتب شعرها..
فطوم: خييبه ليش ماوعيتوني..؟؟؟
نورة: امي قالت خلوها راقده ترتاح...
فطوم: مااصلييييييت...(ومسكت رقبتها تهوس عليها)..آآآخ...تكسرت..
نورة: اهمزج..؟؟
فطوم: هي والله دخييلج..
يلست فطوم عالارض جدام نوره اللي قاعده عالكرسي...وقعدت نوره تهمزها وفطوم مدوخه...يت ام خالد ويلست عندهن....
ام خالد: هاا بنتي شو تانسين..؟؟
فطوم: الحمد لله عموه....
نورة: وييين والله انج حاااره...
فطوم: بتخف الحراره ان شاء الله..
ام خالد: كلتي دواج.؟؟
فطوم: لا بعدني..بصلي التراويح وبكله...
ام خالد: زين.. نوره شفت سياره ظاهره من بيتنا..منو ياكم..؟؟
تكلمت نوره وهي تهمز فطيم..
نورة: هذا حمدان ياي يشل كاتلوجات حق عنود...
لاحظت نوره ان فطوم ارتجفت من طاري حمدان.. وبعد شوي نشت وقعدت عدال نوره وهي اطالعها بنظرة فيها سؤال يقول " دخل هني.؟"... نوره ابتسمت وقررت تخلي فطوم على اعصابها ...وصدت عنها تسولف ويا امها...طبعا فطوم ماتقدر تسالها وعمتها موجووده...فياست منها وسارت تصلي وتاكل دواها....
حمدان دخل بيتهم وهو يجلب الكاتلوجات في ايده... دخل الصاله وحصل عنود منسدحه على هالكرسي.. وام سلطان وابو سلطان يالسين يتابعون الاخبار...وسلطان فارش اوراق جدامه وقاعد يشخط عليهن...يصمم..
حمدان: السسسسسسلام عليكم...
التفتوا له كلهم وردوا سلامه...اعتدلت عنود في يلستها يوم تقرب حمدان منها ويلس عدالها..عطاها الكاتلوجات
حمدان: اندووج...يسلمون عليج...
عنود: الله يسلمهم وياك من الشر يارب...مشكوور حمدان..
حمدان: العفوو...سيري هاتيلي عصير عطشان...
عنود: من عيووني..
سارت عنود المطبخ التحظيري عشان تيب لاخوها عصير.... التفتت له امه..
ام سلطان: هاااا بويه...شو هباااتك..؟
حمدان: الحمد لله بخير...حد ياكم..؟؟
ام سلطان: اظني ربع اخوك حميد في الميلس...
سوا حمدان حركه بويهه تبين انه مب مهتم.. نش ويلس عدال ابوه وسلطان المشغول عنهم..
حمدان: ابووويه...خل عنك هالاخبار اباك فسالفه...
بو سلطان: خير..؟
حمدان: خير ان شاء الله....ابا اشتغل....
التفتت ثلاث ازواج من العيون صوبه...مستغربين من هالطلب...
سلطان: احين من ثلاث سنين تدرس واحين بتودر دراستك..؟؟؟
حمدان: منو قالك انزين اني بودر دراستي..؟؟ صدق ان هالعاده منتشره فيكم كلكم..ماتخلون الواحد يكمل رمسته...
بو سلطان: عيل شووو..؟؟
حمدان: ابويه...مب حلوه اني ريال عود بلحيتي وانته تصرف عليه...الله يطول بعمرك ان شاء الله وانته ماتقصر لكن انا ابا اعتمد على نفسي...
بو سلطان: مايخااالف انزين لكن دراستك ...؟؟
حمدان: دراستي بكملها ان شاء الله...بدرس الصبح وبشتغل مسا...
سلطان: ماشي دواير بتوظفك دوام مسائي...واي شركه خاصه لها دوام مسائي بتشغلك بشهادة ثانوي..؟؟
حمدان: انته بتشغلني في الشركه....
سلطان: اهااااااااااا ...هات من الآخر...
حمدان: هههههههههه... شو بعد آخر...بس خلصت السالفه... بداوم الصبح في الكلية وبعد الغدا بداوم في الشركه لين المغرب...
ام سلطان: يابوويه تعب عليك....
حمدان: وشوو عليه عاد انا تعب والا غيره..؟؟
سلطان: مابتروم تيب درجاتك الزينه اللي تيبها الحين تراك...بتاثر على دراستك...
حمدان: لا تفاول عليه...ان شاء الله اني بستمر على هالمستوى... وبعدين بيكون عندي وقت ادرس في الليل...
هز سلطان راسه وهو فقد الاهتمام بمتابعه النقاش هذا اللي معرووفه نهايته...هذا حمدان...واللي يباه بيحصله...يت عنود وعطت اخوها العصير ويلست مكانها ساكته...ما فيها تدخل بنقاش بينهم..مالها خص....
ام سلطان: عز الله ماعشت يابوويه..جانك الصبح في الكليه والمسا في الشغل وفي الليل مابترقد عشان تدرس.. لالا..انا اقول تريا لين ماتخلص دراستك وعقب اشتغل....
حمدان: امايه انا مب مرتاح جذي.... فظيحه والله اللي يسالني وين تشتغل اقوله ماشتغل تراني ادرس.. وهم يشوفوني اصرف برااحه ويعرفون انه ابويه يصرف علي....جي مب ياهل انا...
كل هذا النقاش وبو سلطان يطالع ولده بعين اعجاب وفخر...
بو سلطان: والله ياولدي اني اتريا منك هالطلب من زمان... لكن ماحبيت اضغط عليك ... ولازم اني بفرح وبستانس يوم بشوف ولدي صار ريال ويبا يعتمد على نفسه.... واسميني مابخالف شوور انا اترياه من سنين واشوفه انه عين الصواب...بس قولي قبل...انته قدها هالمسؤوليه..؟؟ تروم عليها والا عقب بتقولي بودر الشغل وما اروم...؟!!..
حمدان: افا عليك يابو سلطان....اسميني قدها وقدود والا مابطلبها منك....
بو سلطان: تراني ماحب شغل المحاباة هذا...ولا بسويلك سالفه زياده عشانك ولدي... بشغلك حالك حال الموظفين اللي عندهم ثانويه عامه...
ظحك حمدان وسلطان وعنود...وام سلطان تنرفزت لانهم بيقصرون بولدها واطالع ريلها بعين معصبه ...
حمدان: وانا ماطلبت انك تسويلي سالفه...ابا اشتغل ويمشي لي معاش حالي حال الموظفين...اهم شي يكون بالي مرتاح..وانا راضي عن نفسي..
بو سلطان: بارك الله فيك..واخوك مابيقصر..بيخلص لك اوراقك وبمشيلك المعاش..وبداوم ان شاء الله...
حمدان: مشكووور يابوويه الله يطولي بعمرك....ويخليك لنا...
سلطان: متى تبا اداوم..؟؟
حمدان: والله من باجر اذا تبغي..
سلطان: لا..نحن مشغولين بمناقصه الحين مب فاظي... خلها اول الشهر عشان يكون كل شي مظبوط...
حمدان: خلاص تمام..يوم تباني اداوم خبرني..
لم سلطان اوراقه وطلع وهو يقول انه بيسير اييب حرمته وعياله من بيت يدهم.....وكمل حمدان سهرته ويا اهله...وعقبها سار يدرس شوي قبل ما يرقد...استوا من يدخل حجرته يذكر وقفة فطوم فيها...ويستانس...
بالباجر في امريكا...
خليفه كان يالس في حجرته يسوي تجارب على نظام وندوز اليديد...(لا تنسون تخصصه كمبيوتر)..وكانت الاوراق والكتب منتشرات على الشبريه عداله... وهو لابس نظاراته الطبية الصغيره ومركز وايد على شاشه الكمبيوتر وكوب النسكافيه عداله مخلص.... دخل عليه عبدالله ..اللي تعود على حالة خليفه..
عبدالله: اشووووو هذااا اللعوااااااااز...
خليفه: اششششششششش...لا تلخبطبي..
عبدالله: بالله عليك شقايل رايم تركز..؟؟.. الا شقايل رايم تعيش انته...
خليفه: عقب ماخلص برتب...(ويوم مد ايده عبدالله بيلم الاوراق اللي عالشبريه)..لالالالا..لا تصك شي ...
عبدالله: مشكله الهاكرز بعد....
خليفه: لو سمحت انا يسموني خبير انظمة وشبكات...مب هاكرز...
عبدالله: جب يالله ..هاكر...
خليفه: ما اتوقع انك تفهم...شو خص الاشعه والطب بالكمبيوتر بس...؟؟..احين انته شو تبا.. مب عليك امتحان والمفروض تدرس..
عبدالله: ابن اللذينا قاعد يروغ بعد.... ييت عندي فظووول...ياي اسالك..
خليفه: عـــــــــن..؟؟؟
عبدالله: البنت ماغيرها..اللي كانت متخبله عليك....
خليفه: تخبلت عليك ياعده وترفست فبطنك قول آمين...
عبدالله: ههههههههههه خسك الله... من زمان مادعيت علي...
خليفه: مستانس اليوم اكتشفت ثلاث عيوب في النظام لين الحين.. ...باختصار يعني اقدر اطور في هالنظام واقترح نسخه يديده...شفت الفن...
عبدالله: لا والله...جان فيك خير اخترع نظام يديد بالكامل غير وندووز...
خليفه: جب جب....اشوفك اخترع نظام اشعه يديد...
عبدالله: المهم خلنا من هالسالفه...البنت شو اسمها..
خليفه: هــنـــــد...!!
عبدالله: هي هند...شفتها قبل شوي في الكافتيريا..ريلها مجبسه وعلى عكازات...
رفع خليفه نظره عن الشاشه لاول مره من يا عبدالله...
خليفه: هيي ..شفتها انا بعد في الرصيف تتريا سياره ربيعتها...كسرت خاطري تصدق...؟ هي اصلا من اسبوع غايبه ... مادريبها بداوم يوم الاثنين او لا...
امريكا في هالوقت اجازه عندهم..لا تنسون ان نظام اجازتهم الاسبوعيه تكون بالسبت والاحد..مثل الخميس والجمعه عندنا وبما ان اليوم الاحد فكان اليوم اجازه عندهم.....وهذي النقطه للتوضيح...
عبدالله: شوبلاها ؟؟
خليفه: يقولن ربعها يوم الدكتور سال عنها...انها مسويه حادث...
عبدالله: مسكينه.. عيل ظاعن عليها محاظرات اسبووع..شحقه ماتنسخ لها محاظراتك..؟؟؟
خليفه: لا والله..؟! احلف.؟

عبدالله: هي والله...البنت ماقصرت وياك يوم سرنا الامارات ثلاث ايام...نسخت لك المحاظرات وعطتك اياهن..
خليفه: والله اني فكرت فيها مب اني معدوم الظمير يعني... لكن خفتها تصدق عمرها..وتبدا الحركات من اول ويديد وانا ماصدقت افتك...بعدين عندها ثلاث ربع في المحاظره مابيقصرن فيها...اكيد يعطنها المحاظرات اول باول...
عبدالله: هممممم...بس على الاقل قولها سلامات يوم تشوفها مب اطنش...ترا عيب والله تعتبر زمييله هي وياك في التخصص...على الاقل جامل...
خليفه: يووووووه علينا....بشوف بشوف..
ورد مسك اوراقه ويطالع فيهن...وماعرف عبدالله تعقّييد الحيات هذا لانه معصب والا لانه مركز..؟؟؟؟
عبدالله: ماتبانا نسير نتسحر..؟؟
خليفه: الجو برد وانا مافيني اطلع... شو رايك تاخذلنا بيتزا وبيبسي وتيبه هني....؟
عبدالله: عشان يكتمل لوث الحجره هااا...
خليفه: برتب عقب يوم بنخلص...
عبدالله: اووكي...بسير اييب العشا ...
طلع عبدالله عن خليفه وخلاه مع كمبيوتره واوراقه...
يوم الاثنين بعد صلاة التراويح...عنود حشرت حمدان في التيلفون عشان يوديها بيت عمها..من زمان ماسارت لهم..لين ماوافق..وشلها وياه وهو ساير لهم...قال في خاطره بالمره فرصه اعرف شو اخبار فطيم ..صحّت والابعدها من المرض.. والحقيقه ان فطيم حالتها تحسنت وايد.. والحمى راحت...بس بعدها شوي تعاطس....
يوم وصلوا البيت كان ام خالد مب موجووده طالعه تسلم على حد من المعارف...وميره وريلها سايرين دبي يتشرون للعيد... اما حمده فكانت عند اهلها ذاك اليوم..وناصر في بيت عمه سلطان مع سلطان وحميد وربعهم.....بس بو خالد اللي كان موجود ويالس ويا بناته في الصاله...حصه اول ماشافت سياره حمدان شردت ودخلت حجرة فطوم..وفطوم طبعا شردت وياها... وتمت نوره ويا ابوها... دخلت العنود وسلمت عليهم هي وحمدان... يلس حمدان مع عمه ونوره وعنود سارت غرفة فطيم...
عنود: سلااااااااااااااام...
حصه: هلا والله وغلااا....
سلمت عليها حصه وسلمت على فاطمه...
عنود: بالمهلي حبيبتي...شخبااارج..؟
حصه: والله لو تبين تعرفين اخباري الشيخه عنوود جان اتصلتي...وسالتي...مب الحين يايه تساليني...
فطوم: يالله يالله يالله...العرب شاليين فخواطرهم عليج...
عنود: فدييتهاوالله ماتهون علي...ياعمري حقج عليه...
حصه: لالالا ماشي..
عنود: وحياتج مابطلع من بيتكم الا وانتي راضيه اليوم...
ظربتها نورة على جتفها...
نورة: يالسباله ماقلتي انج يايه بنسوي فواااله...اليوم ماسوينا شي...
عنود: فديتج والله لا اتعبين عمرج...زااطه عالفطور لين ماقلت بس...
نورة: لا تمتنين عاد اخووويه مايحب المتان...
عنود: ههههههههههه اطمني انا لو اكل من اليوم لين باجر مابمتن...
نورة: ياحيج والله...فطوم تعالي وياي المطبخ بنسوي شي خفيف...
عنود: لاااااااااااالالالالا عينن خير اقولج مابا شي...
نورة: انتي حد شاورج..؟؟ على الاقل عصير...ابويه بيعصب علينا ..بيقول يايينكم ظيوف ماسويتوا شي...تعرفينه عمج عاد انتي...
عنود: ههههههه اذا السالفه فيها عمي بنطب وبسكت...
ظحكن كلهن وطلعت فطوم مع نوره وسكرن الباب وراهن.. وانصدمن بحمدان اللي طالع من الحمام اللي عدال غرفة فطوم وماسك كوب في ايده كان يغسله...وهو بعد يوم شافهن وقف مكانه وهو منصدم...وعيونه طبعا على فطيم...اللي نزلت راسها على طول..
حمدان: اهلاااااااااااا فطيم....شحالج..؟
فطيم: احم....الحمد لله شحالك حمدان...؟
حمدان: بخير والله.... احيدج مريضه..سلامات...اهون الحين....؟
فطيم: الحمد لله والله يسلمك...بخير مانشكي باس...
حمدان: ياحيج والله...
رمست فطيم وهي ادز نوره عشان تمشي جدامها....
فطيم: الله يحييك..اسمحلنا بنسير المطبخ...
راقبهن حمدان وهو مبتسم... كان مستانس انه يشوف فطيم بخير ومب مريضه... رد لعمه وكمل سوالف وياه...
حصه وعنود يلسن على شبريه فطيم...
عنود: بالله عليج زعلانه علي..؟؟
حصه: هي والله... زعلانه عليج...
عنود: انزين لييييييييييش..؟؟
حصه: عنبووو يا عنوود...اول نحن مثل الظفر واللحم...مانتفارق... ونتفق على كل شي ونرمس في كل شي...لكنج امممره مره وحده ابتعدتي عني وماحيدني مسويتبج شي...!!!
برطمت عنود..حصه معاها حق...هي مقصره...بس كانت تشوف هالبعد من صالح حصه...ماتبا تذكرها بواقع ان ريلها مات عنها...وبالمقابل عنود بعدها الله يطول بعمر عبدالله...
عنود: حرام عليج انتي فاهمتني غلط...والله اني اشتاقلج في كل لحظه ابتعد فيها عنج...وانتي تدرين اني ماصبر بلاج...بس...
حصه: بس شووو..؟؟..رمسي قولي اللي في خاطرج...شو اللي خلاج تبتعدين عني...؟
عنود: حصيص...انتي اللي ابتعدتي عنا كلنا...من بعد وفاة المرحوم سيف وانتي ماترمسين حد... فما حبينا انه نزعجج بوجوودنا حواليج...كنا نخليج بروحج لانه حسينا انج انتي تبين تقعدين بروحج وتفكرين وتحزنين على راحتج... ومن بعدها قمت اقلل سوالف وياج لانج تعرفين اني اجهز لعرسي...وطبيعي انه يزل لسااني واتكلم عن التجهيزات والعرس... وانتي تعرفين انه كنا مخططين نجهز مع بعض ونسوي كل شي رباعه....كيف تبيني اكلمج عن شي بيرجعج لحزنج..؟؟؟ وبيذكرج بخسارتج..؟؟
كانت حصه طول الوقت منزله عيونها ....عشان تخفي الحزن اللي فيهن..بس الدمعه الحاره اللي نزلت ماقدرت تمنعها.او تخفيها... لوت عليها عنود وهي شوي وبتصيح هي الثانيه..
عنود: فديتج لاتصيحين... انا آسفه وحقج عليه... ماكنت اقصد اذكرج او ازعلج..بس انتي بغيتي اللي في خاطري ونحن متعودين عالصراحه....وكووني اني اخفيه فقلبي مب معناته انه مب موجود....لا تصيحين حصيص...
ابتعدت عنها حصه وهي تمش دموعها وتحاول تبتسم...
حصه: عنود...انتوا ابتعدتوا عني في الوقت اللي انا كنت محتاجتنكم فيه اكثر شي....يمكن انا فهمتكم اني ابا اقعد بروحي بس مب هذا اللي انا كنت محتاجتنه....خصوصا انتي...كنتي اكثر وحده انا محتاجتنها...لاني اكثرر شي ارتاح وياج...واقدر اكلمج عن اي شي وتتفهميني.... او اذا ماكلمتج انتي كلميني..ما اطنشج اسمعج ...وافكر بكلامج....وشوفيها يعني اذا انا ريلي توفى..؟؟....الله كاتب له هالشي...وكاتبلي هالشي...مب معناته اني بكره طاري العرس وطاري التجهيزات وبحرم غيري من السعاده اللي اكنت انا اترياها ...!!!... بالعكس..انا فرحانه لج والله يكمل عليج يارب انتي ونوره.... وتراه عرسج عرس اخويه بعد..يعني فرحتي مب فرحه وحده..فرحتين..وويوم اجهز وياج واخطط معاج لعرسج بستانس مابزعل... لانه هالشي اللي نحن تعودنا عليه... من نحن صغار...فهمتي..؟؟
ابتسمت عنود ودموعها فعيونها...
عنود: فدييتج والله اني مافهمتج...سمحيلي.... صدق كنت مفتقده التخطيط وياج وترتيباتج وافكارج... والله اني من متى متخربطه مب عارفه شو اسوي... امي ترمس من صوب وامج من صوب وانا مب عارفه شو اسوي بينهن...وشو اجهز في البدايه وشو اخلص...وانتي تدرين الوقت بسرعه يخطف ولازم اخلص تجهيزاتي..
حصه: هههههههه...اههم شي خوزنا سوء التفاهم هذا...لا تخليني بروحي ويا هالويه...
عنود: وعد وعد وعد.....خلاص..توووووووووبه...قومي خلينا نسير فوق حجرتج بتعطيني شيله بيظا البسها..وبخبرج بكل اللي سويته...
حصه: يالله...
سارن حصه وعنود فوق في غرفة حصه ويلسن يسووولفن بطريقه ماسولفن فيها من شهووور...
حمدان عند عمه اتصلبه واحد من ربعه وقاله ان كل الشباب هني يتريوونه في العين مووول...ولاازم اييهم الحين...سكر عنه حمدان وترخص من عمه وطلع...يوم طلع من البيت تذكر البنات في المطبخ...سار صوبهن ودخل عليهن المطبخ بدون حس....حصل نوره قاعده تسوي حلاوة بسكوت سهلة وسريعه ..وفطوم ماسكه كوب عصير وفيه ثلج وترتب الكريم كاراميل في صينية ..
حمدان: احمممممممم.....شو تسون..؟؟
تناقزن كلهن لانهن ماكانن حاسات بوجووده..
نورة: بسم الله ...روعتنا....شو يالسين نسوي بعد.فواله..
حمدان: لالا مافي داعي اتعبن عماركن عشاني..انا بسير احين...
التفتت نوره لفطوم اللي يالسه على كرسي جدام الطاوله ....
نورة: ياربي كيف خقاق....!!!...انزين انته بتروح اختك بعدها داخل...
حمدان: اهاااااااااااا....
وتقرب حمدان صوب الطاوله اللي قاعده عليها فطوم..
نورة: وين بتسير؟ ايلس بتفاول قربنا نخلص...
حمدان: ربيعي يتريووني في العين مول...بس خلولي لاني برد بعدين بشل عنود..
نورة: بتسيرون السينما..؟
حمدان: ليش العين مول مافيها غير سينما..؟؟
سكتت عنه نوره والتفت صوب فطوم... اللي بطلت عيونها يوم شافته يحول اهتمامه لها...مد ايده وخذ كوب العصير عنها..استغربن من هالحركه....واطالع فيه حمدان وعقد حياته..
حمدان: فطيم...!!!..تشربين ثلج وانتي مريضه...؟؟؟
ترددت فطيم ....
فطيم: ....عااادي...
حمدان: جب يالله.... ( وسار المغسل وجب العصير بالثلج اللي فيه..وحط الكوب في المغسل)... يوم بتشربين شربي جاهي.والا اي شي حار..انتي مريضه بعدج لا تتحسبين الحمى خازت يعني صحيتي....تراها بتر