!! ليت الورق يقرأ وش اللي كتب فيه !!

ليت الورق يقرأ وش اللي كتب فيه =وليت القلم يدري وش اللي جرى به
إن كان ماتمسي بصدره مشاريه = ولا اتضايق لو تضيق الرحابه
واصوتي اللي عجزت الناس توحيه = غريب يوم اصوات غيري تشابه
البيت بيتك والمواري مواريه =لكن كبرت ولا كبر معك بابه
والناي لونقض جروحك باغانيه =جروح غيرك نقضتها ربابه
ماهو يتيم ان كنت انا اللي مغنيه=ولا هو فقير ان كان جرحي زهابه
والغايب اللي يغري الشعر طاريه = ما قل قدره لو يطول غيابه
كم لي وانا احث القصايد تخليه = حتى تلاشت رغبتي فالكتابه
والشعر لو يفقد حروفه واساميه =مدري وش اللي بعدها ينبغي به
احترت بين اعتب عليه واراضيه=أخاف لا يجرح رضاه بعتابه
أحيان اقول ابيه .. واحيان ما ابيه = الا أبيه ولو يبي عذابه
ياللي تجونه دامني ما اقدر اجيه = وصوا " ذهابه " لا يشح بـ " إيابه "
وقولوا له إني من كثر ماني اغليه=أشرب سرابه .. وارتوي من سرابه
وعلى كثر مانسى اذا قلت : ناسيه =دار الزمان وجاب عشقه وجابه
حنيت لايامه .. وضحكه لياليه =قبله وبعده كل وقتي ... رتابه
ان لمت قلبي عاقبتني محانيه =وان قلت بارضى عز نفسي رقى به
البارحه كنت اكسر الروح وانهيه =كان الورق ارض وعيوني سحابه
زرعت " ما احبه ولا عاد لي فيه " = وجنيت " احبه لو يطول غيابه