السكني .. والكهف .. واعوذ بالله العظيم ..!!

القصيده تكتب الواقع وننطقها شعور=واقعٍ صعب ومحير توّه العقل الحكيم
جيت أبكتب ياخلايق قصةٍ فيها حضور=للمآسي والمصايب جابها قلبٍ رحيم
نفتح ستار القصيده والمعاني والبحور=والخطاوي في ثباتٍ في طريقٍ مستقيم
عائله منها تكوّن خمسة أفرادٍ زهور=أرمله معها ظناها فوق كرسيٍ هشيم
وعندها مريم وفاتن وفيهم الصغرى بدور=طفلةٍ في مهدها واللبس من لحفٍ قديم
لاخوال..ولاعمام..ولافلوس..ولاقصور=عايشين بكهف مظلم مايجي وسطه فهيم
والكهف كله دوابي مع متاهات الجحور=والعقارب سمّها يذبح ولا فيها عقيم
وحولهم غابه كبيره ماتحومبها الصقور=ولازئير..ولاصهيل..ولابها شيٍ يهيم
وشربهم من نهر واحد يقنع النفس الصبور=وأكلهم من نخلةٍ من قدرة االرب لكريم
ويسمعون أصوات دايم كنّها صفقة قدور=مصدره مايعرفونه والخبر عند العليم
وأمهم تسمع في طبلة إذنها صوتٍ جهور=تعرف الصوت وتناسى وقلبها ماهو سليم
وإبتدى هالصوت نفسه من ظهورٍ في ظهور=توّه الأم الضعيفه وإنطلق جرحٍ أليم
ولاصحت من نومها تلقى لها علبة عطور=صابها رعشه ودهشه وصار موقفها هزيم
وصابها بعض الجنون وصابها بعض الفتور=عقب ماشافت نجوم الليل بالظهر القويم
وتالي الليله تشاهد بالكهف نورٍ ونور=لاسراج.. ولارماد.. ومصدره يبقى عديم
وجاتها مريم وتسأل عن عواقيب الأمور=ويش في هالكهف يمه يفجع القلب اليتيم
آهٍ يامريم ترا بالكهف رجالٍ يدور=إسمه (( السكني )) وطبعه يحرق أعصاب الحريم
ثمّ صاحت بنتها فاتن وفزنّ الصدور=صيحةّ من قوّها رجت لها كهفٍ رميم
أسرعي يمه تعالي فيه قبر من القبور=وفيه هيكل آدمي واعوذ بالله العظيم
وفيه يايمه ظلوع وجمجمه فيها كسور=خايفه يمه تعالي ذكريني بالنعيم
وفيه يايمه سلاحٍ آه يمكنه يثور=ماسبق وإن شفت مثله يحمل الشكل الذميم
وشافت الأم السلاح الي على مرّ العصور=باقيٍ في قلبها ماطاح والذكرى جحيم
ذا سلاح أبوك يافاتن وانا قلبي غيور=ذابحينه مجرمينٍ مع هبايب النسيم
ودافنينه مع جحور الكهف والكهف مهجور=وطاحت الأم الضعيفه من قهرها ياحليم
وفارقت دنيا الطفوله..والأمومه..والفجور=وإتركت أربع زهورٍ مالهم غير الحكيم
ونختم ستار القصيده والسطر آخر سطور=ونستعيذ الآنّ بالله كل شيطانٍ رجيم