يعيش فريق الزمالك .. ويسقط فريق المطافيق !

مدمن شاهي · #1 19-07-2006, - 12:25 AM

سلام علاكم

أولاً : أعتذر للجميع عن تأخري في طرح بعض المواضيع التي - رُبما - قد وعدت البعض من الإخوه بها .. وذلك لانشغالي وارتباطي ببعض الأشغال .. وسفري الأخيــــــــــــــــر لمكه المكرمه داخلياً ومصر العربيه دولياً << وسّع صدرك .. خليها ساعه وساعه !

سابعاً : أخوكم المُدمن هالمرّه خلّى وجهة القمر في موضوعه ( هورط بيرط ) والتردد سياحي والمنفذ رياضي !

وانتم عارفين الأيام هذي أيام لعب كوره .. واحد يثبّت وواحد يشوت .... وواحد يحقطها والثاني يجيبها !

كل واحد مشغول بمباراته ! ... اللي زارق لمقهى يشوف المباريات عشان بيتهم مافيه تلفزيون ! .. واللي زارق عند زميله يشوف المباراة لأن تلفزيونهم موشوش ، والألوان أسود وابيض << الله يذكر أيام التلفزيونات القديمه بالخير .. كنا مانشغّل التلفزيون إلا بمعلاق ملابس نحطّه ورى التلفزيون ونخلي صويلح ولد اختي يمسك المعلاق بيده طول المباراة عشان تصير الصوره صافيه !

عالعموم ماودنا نطوّل عليكم في المقدمه خاصه أنكم مالّين من المُقدمات حقت كُتب النحو والصرف والتصريف والمنصرف !

كُنت ومازلت أختم بعض مقالاتي بما عنونت له : (( يعيش فريق الزمالك .. ويسقط فريق المطافيق )) .. ! .. ولعل البعض يتسائل .. من هم المطافيق .. وماهو فريقهم الفلته .. ؟ .. وماعلاقتك بهم .. ولماذا هذا الحقد .. ومادخل فريق الزمالك ( المصري ) في الموضوع ؟

أسئله أجيبكم عليها عبر قصّه مُختصره لذلك الفريق ( النكبه ) مع بعض التعريف بفريقهم <<< يارب ينزلون للدرجه الثالثه ويبارون فريق الأنوار من حوطة بني تميم ويفوز فريق الأنوار بثمانيه صفر << ياخي لاتتهزا بالأخضر !

فريق ( المطافيق )

# عدد أفراد الفريق ( 11 ) ويدورون لهم حالياً على واحد عشان يرزّونه في الإحتياط ولا لقوا !

# مدرب الفريق بنقالي .. ويقولون أن خواله ( نيباليين ) على وزن نرويجيين .. كان يعمل يوم من الأيام فرّاش مسجد واستعاروه للفريق .. لأنهم يطبقون مشروع ( الوطنيه ) بحذافيره !

# لون الزي .. الفنيله ( أخضر فاتح ) .. والشورت <<< على بالهم زيون ! ( فسفوري غامـــــــق ) ... والراعي الرسمي للفريق ( عصير الربيع ) وحليب نيدو .. وكاتبين على فنايلهم ( صــــــقر العروبه ) << مايدرون وش معناتها .. بس على بالهم وطنيين ( حبّه ونص ) !

# كابتن الفريق ( سالم المنزوي ) يجمع ميزانية الفريق ويشتريبها الصبح ( صامولي ) لاخوانه << بتقولون وش لون دريت أنه يسرقها .. ياناس والله أني شايفه أكثر من مره الصبح واقف عند الخبّاز ومعه دراهم الفريق اللي كلها ريالات أطرافها مشقّقّه !

# الفريق دايم يلعب بخطّة الدفاع الملتوي .. يعني أهم شي أنهم ماينهزمون .. واذا تعادلوا كنّهم فايزين << بلا عليكم هذا فريق يستحق أن أحد يلتحق فيه ولو أحتياط ؟

# رئيس الفريق ومؤسسه - كمال ولد الساحر - رحمه الله .. متوفي قبل ثلاث سنوات .. أسس الفريق ... وبعد تأسيسه باسبوع توفي إثر جلطه في الرجل اليمنى ويقولون والعلم عند الله أنه شاية له بلكّة عند بيته وهي اللي أثّرت على رجله << الله يعينه على العقوبه .. حاط له فريق مخيس !

# الكابتن ( سالم ) دايم يلعب بخطّة ( 3-4-4 ) وبعض المرات يموّه على اللي قدّامه ويدلي يلعب بخطة ( 4-4-3 ) ياخي الذكاء لاعب في راسه !

# فريق المطافيق يحتوي ناديه ( المقلب ) على مجموعة ألعاب .. من أهمها ( كرة القدم ) وتأتي لعبة ( الكيرم ) في المرتبه الثانيه .. ويفكرون حالياً أنهم يحطون لهم لعبة ثالثه .. وتقول مصادري أنهم احتمال يخلّونها ( أم تسع ) ويارب أني أحمدك على نعمة العقل .. واشوى أني تبت وتركتهم !

# النادي ميزانيته سيئه وقايمه على الله ثم على سرق الغازات .. والله يخلي ( حمد الأثول ) لهم !

# جميع طاقم الفريق يجتمعون فترتين يومياً ويبدون يلعبون << والله يالعبهم طقاق مهوب لعب ! .. يجتمعون فتره صباحيه من الساعة ( السادسه صباحاً ) وحتى ( الثانيه ظهراً ) وفترة مسائيه من الساعه ( الرابعه عصراً ) وحتى ( الحادية عشر ليلاً ) والإجازه فقط يوم الجمعه ! << ماصار دوام .. نعنبوا بليسهم والله ياهو كرف !

عاد أنا وش قصتي مع الفريق ؟

قصتي باختصار أني تمشكلت مع الكابتن ( سالم ) مرّه لأنه بدال مايحطني دفاع أيمن لأني راعي ظفر و ( عسماوي ) حطني هجوم وخلاني راس حربه ! ... وعاد هذا موتي .. لأني أخاف أنهم يمزّعوني ويشوتوني في منطقة ( محضورة ) لأني مقبل على زواج ويارب تصير بنت بن رويسان الأجرب من نصيبي !

عاد ذاك اليوم تطاقيت معه ومافكني إلا البنقالي مدرب الفريق يوم أنه جاء وطلّق بالثلاث أنه ياخذ حقي منه ويردني للدفاع !

انتظرت ثلاثة أيام ونص ولاشفت شي .. !

قالوا لزوم تصير هجوم وتصير راس حربة الفريق وفي مقدمة الركب وانت اللي تنطلق بالكوره ومايردك إلا شبكهم ! :)

بعدها أخلاقي خربت .. وقلبتها ( تايون ) تجميع ( زيود ) !

تركت الفريق واتجهت لتشجيع فريق الزمالك المصري لأنه فريق يستحق من يشجعه ! .. أخلاقهم زينه ومتكاتفين ولون فريقهم أحمر منيّل بستين نيله .. وهذا هو اللون المميز بالنسبه لي .. !

وصرت من تالي أمرّ على فريق المطافيق واقعد ورى الشبك وارفع شعاري ( يعيش فريق الزمالك .. ويسقط فريق المطافيق ) !

يارب يخسرون وينزلون للدرجه العاشره تحت الصفر .. يارب يارب

سلام علاكم

ليـ ص ـث · #2 19-07-2006, - 07:16 AM

الله يقطع سواليفك يامدمن شاهي تلقيمه
بروح اضحك وارجع لك ثاني

أدوات الموضوع	إبحث في الموضوع
مشاهدة صفحة طباعة الموضوع أرسل هذا الموضوع إلى صديق	إبحث في الموضوع: البحث المتقدم

يعيش فريق الزمالك .. ويسقط فريق المطافيق !

مجلس الفرفشه والترفيه