سلام علاكم

ثلاثة أيام ( بالزَبِت ) جالس كل يوم أرقى في السطح من بعد صلاة العصر ليييين أسمعه يأذن المغرب .. ثم أعوّد تحت أدودل راسي وأمشي بِثُقل وتروي << لُغه عربيه على أصولها يامُدمن .. أيه كذا صرت تعجبني !

ولو سألتكم .. وش تتوقعوع أني أسوي فوق السطوح ؟

أكيد أن الأجوبه بتجيني كثر رز أبو بنتين << عشان البنات مايزعلون .. أو بتجيني كثر رز أبو كاس << وهذي لعيون التماسيح !

أنا مُتأكد أن الأجوبه بتكون مُختلفه .. مثل اختلاف الليل عن النهار في الطلوع والإشراق .. ومثل إختلاف المُدمن عن دحيّم في الجمال والرومانسيه وكمان الرشاقه والملح والسكّر !

ممكن بعضكم يفلّ علي صدره ويجيب الجواب زي الحلاوه ويقول وهو على باله فاهم ( أكيد أنك تشتغل في بيع الحمام الزاجل والمرنقط والمجعفر والسُندسي الملتوي جنبه .. وكل يوم تطلع في السطوح تجلس تحوّمها ! ) ..

بعدها على طول أجيب له الجواب بعد ما أعطيه وحده على راسه .. عشان أطلّع ( زيت عافيه ) اللي قالي به البطاطس على الغدا .. وأقوله له ( جوابك خطأ ) .. !

يجيني الثاني .. ويطرح الجواب بسرعه ( أكيد أنك يامُدمن جالس ترتّب لك غرفه في السطح .. عشانك بتتزوج ) !

أجاوب عليه مُباشرةً .. جوابك خطأ .. مع أنه جميل جداً بالنسبه لي وفرصه سعيده وحلوه كمان في حياتي .. بس لو تكمّل كلامك وتقول ( بتتزوج بنت بن رويسان الأجرب ) يكون أحسن !

طيّب أعطيكم أيش هي المُصيبه اللي أكيد أنها حاصله لي .. لأن حياتي أغلبها مصايب .. خاصّه أني أعرف مجموعه من " المُختصين " في الأمور ( المُصيبيه والبلاوي المصيريه ) !

لنا جار أسمه ( سويعد بن مريبض ) ... أسمه هذا معروف فيه في جميع أطراف الديره ... يعني لما يقولون ( وين اللوح ) فهم أكيد يقصدون أخونا في الله ( سويعد ) !

الرجّال هذا معروف بِـ ( سوء المسلك ) وأعوذ بالله من الخُبث والخبائث .. !

يحب يزوغ بعيونه .. وكمان يحب يطلطل من جدران الحي عشان ( يدوّر له على شغّاله طارفه يجلس يتفرّج عليها ! )

عاد أحنا .. وقبل كم يوم جبنا لنا شغّاله ( زوينه ) على وزن ( شينه ) !

جبناها من أسبوع ...

متزوجه وعندها سبعة بزران .. وكل يوم تقعد تتفرج على صورهم .. لعل وعسى أن واحد منهم يطلع عليها من الصوره ويحب على راسها !

تمتاز ( شغّالتنا الجديده ) بريحة كريهه ومخيسه .. يعني لما ( أشطفها ) من عند ثلاجة المطبخ << لاأحد يقول أيش دخّلك المطبخ ياهوه .. هذا مطبخنا واحنا حريّن فيه .. بعد ( الشطفه ) المُحترمه .. أجلس لي ثلاث ساعات ما أقدر أشمّ لي شي .. لأن الشم عندي أختبص ولا عاد صرّت أفرّق بين الزين والشين !

ماودنا نستطرد في موضوع " الشغّاله " .. لأنه بيجي يوم وأتكلّم لكم عن كل شي في حياتها .. خلوّنا في المُهم .. ونشوف وش سالفة هالشين ( سويعد بن مريبض ) !

كنت قبل كم يوم قاعد في السطح أتقلّب في الشمس .. عشان أنتم خابرين .. لازم الواحد هالأيام يحافظ على بشرته عشان تكون ( قوقعيه مائله إلى السُمره الطبيعيه ) !

وانا قاعد أتقلّب إلا والقى ورقه صغيّره منطوّله في آخر السطح .. إلا وافتحها والقى فيها كلام غريب .. !

لقيت مكتوب ... !

من سويعد بن مريبض إلى الجميله الحسناء ( مريم ) .. !

لقد لفتني جمالك وريحتك .. خاصّه وانتي تعلّقين ثياب " المُدمن " على حبل الغسيل !

وكل يوم وأنا جالس بعد العصر أطلّ عليك ألقى نفسي مُجبر أني أنطل عليك هالرساله .. واعتبريها عربون معرفه وصداقه ( لله وفي الله ) << والله المجرم !

إذا أردتي التعارف والصداقه .. فأرجوا إرسال رساله على الإيميل ( سويآد هبيبُكم آت هوتميل دت كم ) ! .. أكتبي فيها موافقتك بالتعارف .. وخلي موعدنا كل يوم بعد العصر .. أنتي تطليّن وترفعين بيدك اليسار [ فوطة الغسيل الحمرا ] .. وانا أرفع [ فنيلتي العلاقيه البيضاء ] بيدي اليمين !


أنا أخذت الورقه على طول .. وانا اللي أروح لشغالتنا واقعد أنازق واصايح عليها .. وهي الضعيّفه مادرت أن المجرم قاعد يطلّ عليها << أنا صراحه ماهمني هالشغّاله .. ماهمني إلا ملابسي يوم أنه شافها !

رحنا عاد بعدها وغيّرنا غرفة الشغاله .. وصرت كل يوم أقعد في السطح واقعد أرفع فوطة غسيلنا الحمرا .. لعل وعسى أني أشوفه يلوّح بفنيلته .. عشان أمعطه وانطله في سطحنا !

أخيراً ..

أدعوا لي أني أطرح هالمجرم واجيبه على وجهه ... واحاول أخترق بريده الإلكتروني واجيب صور جميع ( شغالات الحاره ) اللي متعرّف عليهم من سطوح الحي !


عهد ووعد من أخوكم المُدمن :

إذا مسكت المجرم .. فلكم مني عزيمة ( غدى ) .. مفاطيح وعلوم غانمه .. والبنات يستاهلون بوفيه مفتوح و ورق عنب .. تستاهلون

سلام علاكم

[ مدمن شاهي ]

وعليكم السلام ورحمة الله وبركاته لا عدمناك يالمصرقع العووود خخخخخخخخخخخخخخخخخخخخخ

أختي عذاااري

أولاً .. ردّك مكرر .. وهالمرّه بنوقفك عن المُشاركة في المنتدى سبع سنوات <<< والله النذل

سابعاً .. مقالاتي ستصدر قريباً بإذن الله في كُتيّب يُباع في الأسواق .. وستكون الجزء الأول .. وسيتم التوزيع على دول الخليج .. واحتمال ندزّها بعد لدارفور

شكراً لمرورك وتعليقك