انتقام خالد

بطلع اقراها وراده ..

آآآآآآح

عن جد رووعه هالقصة ترى اذا رديت مثل أول لعشقي للروايات بيكون بسبتك كتكوت

بانتظار الأجزائ القادمه

ربي يعطيكِ الف عافيه

طلتــج الاروووع غلاي ...


و ربــي يـ ع ـاافيـــج غلاي ...

يسلمك ياحلوه انتظرج ..

الجزء الخامس




بدت الايام تمضي ..بدى حميد يتحسن .. بس روحه ما زالت تنزف .. تنزف فراق أحمد .. حس حميد انه انجرح في الصميم .. كان يتعذب بس يحاول يخفي ملامح الانكسار اللي بانت على ويهه ..يحاول يتغلب على الضعف اللي صابه

عايلة حميد تقبلت الخبر بسرعه .. ويمكن ما أثر عليها وايد .. لانه خالد ما راواهم ويهه من يوم ما طاح حميد في المستشفى .. فحسوا انه ما راح يرجع مرة ثانية .. و هالشي كان مطمننهم

خالد فعلا ما كان ناوي يزور عمه مرة ثانية بالرغم من الحاح هند المتواصل ...

هند : خالد من واجبك انك تزوره ..
خالد : ما بزوره يا هند .. اسير للقهر بريلي ليش ..؟؟
هند : بس هذا عمك .. وابوك وصاك عليه قبل ما يموت ..
خالد : الله يرحمه .. بس اسمحيلي ماقدر أسير ..
هند : عيب يا خالد والله عيب ..
خالد : والله عيب ولا مب عيب ... مب ساير ..
هند : انزين لا تسير بس ودنا عنده..
خالد : انتي تعبانه وما ترومين تسيرين ..
هند : انا بخير وما فيني شي .. و لا تحاول تتعلث فيني
خالد : هند لا تحنين فوق رااسي ..انا ما بوديج .. ولا تحلمين انج تسيريله .. وغير هالكلام ما عندي
هند : خالد ترضى انهم يقولون انه أحمد ما عرف يربي ..!!
خالد : يخسون ... بعده ما نولد اللي يشكك بتربية أحمد ..
هند : عيل أثبتلهم هالشي ..
خالد : شوفي انا اتخذت اول خطوة وسرتلهم .. وهم اللي يحتاي يدورون علينا الحين ..
هند : بالله عليك كيف بيعرفون مكانك ..؟؟
خالد : مثل ما انا عرفت مكانهم ... وبس يا هند قفلي ع الموضوع ..
هند : ما بقفل يا خالد .. وانته لازم تسيرلهم
خالد بعصبية: شوفي عاد ...هي كلمة وحدة سيرة مب ساير وان طريتيلي هالسالفة مرة ثانيه بخليلج الغرفة باللي فيها ..
هند حست باليأس ففضلت انه تقفل ع الموضوع : انزين هذا الشيبة اللي اسمه بو محمد ما اتصلبك ..!!؟؟
خالد : لا .. وان شالله ما يتصل ..
هند : ليكون كرهته هو الثاني ....؟؟
خالد : وحد قالج اني حبيته ..
هند ابتسمت : الله يهديك يا اخويه ..
خالد : وينها ميرة ..؟
هند : داخل في الغرفه ..
خالد : شو تسوي ...؟؟
هند : عندها فطامي و ليلوه الصغيرة تلعب ويا علاوي
اعتفست ملامح خالد : ما يشبعون من بعض ..!!!
هند : مالهم غير بعض ... بس لا ناكل حقها .. فاطمة وقفت ويانا ايام العزى وما خلتنا رواحنا ..
خالد : حتى اخوها راشد ..
نزلت هند راسها : يزاه الله خير ..
خالد بخبث : أشوفج راضية عنه هاليومين ..!!
هند : خالد تأدب ..
خالد : سكتنا .. المهم بقولج شي
هند : قول ..
خالد : تعرفين يوم كنت عند بو محمد شفت بنيه هناك
هند : انزين ..؟؟
خالد : كانت هيه الثانيه تدور بو محمد ..
هند : انزين وشو يعني ..؟؟
خالد : ماشي ماشي ...
هند : ماشي !! قولي شو فيها البنت
خالد : ماشي قتلج ..
هند ابتسمت : خالد .. اكيد فيها شي
خالد شاف هند بنظرات : بتسكتين ولا
هند : ههههه انته ما يبت طاريها عبث
خالد : اوكي .. كرمينا بسكوتج

سكت خالد وتم يلعب في موبايله .
أما هند فكانت تفكر بالطريقة اللي تخلي خالد يقتنع بالسيرة عند عمه ..

داخل الغرفة كانت ميرة يالسة ويا فاطمة ..
ميرة : وهاي كل السالفة ..؟؟
فاطمة : يعني طول هالفترة عندج عم وانتي ما تدرين ..!!
ميرة : شفتي عاد ..
فاطمة : انزين شو سبب هالقطاعة ..؟؟
ميرة : عقولت خالد ما يعرف ..بس انا ادري انه يقص علينا وانه عارف بكل شي
فاطمة : لا تظلمينه
ميرة : وانتي دومج تدافعين عنه.. !!
فاطمة : ما ادافع بس يمكن يكون صدق ما يعرف ..
ميرة : لا لا صدقيني .. خالد من النوع الي يكتم وما يخبر .. بس هو كاره عمي حميد وما يطيق يسمع سيرته
فاطمة : ليش عاد ..؟؟
ميرة : مادري والله .. بس خالد نادر ما يحب .. اذا انا اخته ما يحبني كيف بيحب الغريب ..
فاطمة : حرام عليج يا ميرة ..
ميرة : انتي ما تعرفين شي
فاطمة : مادري والله .. أخوج وانتي أدرى فيه ..
ميرة : متى يخطبج و يفكنا ..
فاطمة بحيا :اييه انتي شو تقولين ..؟؟ شو يخطبني وما يخطبني ..
ميرة : ابويه الله يرحمه كان يبغيج حق خالد ..
فاطمة وبدت تحمر : ميروه شو تقولين .!!
ميرة : ياعيني ع الي تستحي .. شبلاه ويهج احمر .. لا تنكرين انج تبينه ..
فاطمة : ميرة صدق انج ما تستحين .. وبعدين أنا من يومي حمره ..
ميرة : صدق صدق لو خطبج بتوافقين ..؟
فاطمة : اللي يقول عاد هو يبغيني .. من يومه يكرهني ..
ميرة : منو قالج ..!!
فاطمة : نظراته و طريقته بالرمسه ويايه..
ميرة : يا مسودة الويه ومن متى ترمسينه ..!!
فاطمة : ويا ويهج ما ارمسه بس يوم يرد عليي في التيلفون
ميرة : يا عيني على الحساسة .. بس خالد ما يكرهج صدقيني
فاطمة : ودري عنج هالسوالف
ميرة : الله يوفقني أنا بعد وأتوكل علىالله ..
فاطمة : بيوزج سيفوه أخويه
ميرة : يالغبية سواف اصغر عني ..
فاطمة : انزين عادي ..سنة وحده الاهي ..
ميرة : مابغي سواف ..
فاطمة : عيل منو تبين ..!! ليكون حاطة عينج على رشود ..
ميرة : هو بعده يبغي هنودة أختيه .؟؟
فاطمة : عقولته غير هند مابياخذ ..
ميرة : انزين خله يتريا عليها شوي .. ع الاقل لين ما يكبر علاوي ..
فاطمة : والله مادريبهم .. انا غسلت ايدي من اخويه واختج ..

ميرة : أقول شحال ربيعتج اللي تعرفتي عليها في النت ..!! .. من زمان ما طريتيلي اياها ..
فاطمة : قصدج بنت بوظبي ..؟؟
ميرة : هي .. هذي اللي اسمها ريم ..
فاطمة : من زمان ما شبكت ع المسن .. بس تعرفت على ربيعتها اسمها عليا ..حبوبة وايد .. حتى اني خذت رقمها والحين ارمسها في التيلفون .
ميرة : الله ..!! وناسه ..أف متى بيركبولنا خط الانترنت ..
فاطمة : انزين استعمليه من بيتنا ..
ميرة : تعرفين انا اتريا الدراسة تبدى و عقب بحاول اقنع خالد انه يفتحلنا خط انترنت بعلثة اني احتاجه في الدراسه ..
فاطمة : هههههه انزين انتي حاولتي مرة تفاتحينه بهالموضوع ..؟
ميرة : لا لاني عارفة الجواب مقدما ... لا يعني لا ..
فاطمة : شو رايج اخلي راشد يرمسه
ميرة : انتي تخبلتي ..؟ تبين خالد يذبحنـــي ؟!
فاطمة : ليش هو لهالدرجه هو عصبي
ميرة : مادري شقولج يا فطيم .. خالد ما كان جيه .. كان شمعة هالبيت .. بس من توفت الوالدة جلب ع الكل .. والحينه عقب وفاة الوالد اشوفه قام يلعب دور المسيطر علينا
فاطمة : الله يهديه
ميرة : الله يسمع منج





في بيت حميد ...

وبالأخص في غرفة ريم

عليا : أهم شي انه أبوج بخير الحين ..
ريم : الحمدلله على كل حال .. والله اني كنت خايفة عليه .. أول مرة يطيح علينا ابويه هالطيحة ..
عليا : تستاهلون سلامته ..
ريم : الله يسلمج ..
عليا : وشو ردة فعل اخوانج ..؟؟
ريم : هه اخواني ..!! والله جنه ما صار شي ... تخيلي عرفوا انه عندهم عم وانه متوفي من جريب وفوق هذا كله مافتكروا .. ما فكروا يسيرون يعزون عيال عمهم .. أو حتى يدورون عنهم ..

عليا : انزين حتى عيال عمج ما يوا يطمنون على أبوج ..معنهم هم سبب طيحته ..!!
ريم : ومنو قالج انه هم السبب ..!! عيال عمي مالهم ذنب باللي صار .. وانا ادري انه حتى لو يوا اخواني ما بيرضون..!! .. وبيقولون مب كفايه اللي سووه وبعد يايين ..!!

عليا : ريم .. لا توقفين ويا عيال عمج ضد أهلج ..

ريم : انا مقهوره يا عليا ... مقهورة من ردة فعل اهلي ..!! .. حتى مايد ... مايد اللي دومه يوقف ويايه .. اشوفه هالمرة وقف ضدي .. وفضّل انه ينسى سالفة عيال عمي... بس هالشي مستحيل
يستوي .. وان محد منهم بادر .. انا اللي بسير وبدور عنهم ..

عليا : انتي تخبلتي يا ريم ..!! تبين اخوانج يذبحونج ..!!
ريم : ما يقدرون يسوون شي ...
عليا : الله يهديج بس ...
ريم : ويهدي الجميع
عليا : المهم فطوم راعية الشارجة تسلم عليج
ريم : الله يسلمها .. من زمان ما رمستها .. شخبارها .. ؟؟
عليا : هي هالفترة انشغلت شوي .. على قولتها أبو ربيعتها توفى وهي كانت وياها ف هالفترة ..
ريم : وحليلها ...
عليا : بس تدرين هي وايد حبوبة ... تدخل القلب بسرعه ...
ريم :ياسلام ... اشوفها بدت تنافسني في قلبج ..
عليا : لا وابشرج جريب بتحل مكانج ..
ريم : عليوه ..!! صدق انج ما تستحين ..
عليا : هههههه امزح وياج ويا ويهج ...
ريم : لا ترمسيني لا ترمسيني ...
عليا : ريموه امزح وياج عاد .. انتي اصلا محد يحل مكانج .. انتي القلب ..
ريم : وفطوم ..؟؟
عليا : حواف القلب ..
ريم : لا لا مايخصني ...انا ابا القلب بحوافه ..
عليا : يالطماعه العوده .. عيل ريلي وين أحطه ..؟؟
ريم : ومنو قالج اني بخليج تعرسين ..!! انتي حقي انا بس ...
عليا .ههههههههه عاد يوم بييني الريل ما بسويلج سالفه ...
ريم : من أولها جذه .. عيل ان شالله ما تعرسين ..
عليا : فال الله ولا فالج ..
ريم : انزين انزين ... خبريني زيادة عن فطوم ..
عليا : توج ما تدانينها ..
ريم : لا تقوليني رمسة ما قلتها ..
عليا : انزين انزين .. شو تبين تعرفين عنها ... مب جنج انتي اللي عرفتيني عليها ..
ريم : أنا ما رمسها إلا ع المسن .. يعني ماشي مجال إني أتعمق وياها
عليا تذكرت شي : .. هي صح ريمو ... نسيت أقولج ..
ريم : شو ..؟؟
عليا : فطامي يمكن تساعدج في خطتج ..
ريم : ما فهمت عليج ..!!
عليا : اسمعيني ... هي من الشارجه صح ...؟؟
ريم : صح ..
عليا : وعيال عمج وين ...؟؟
ريم : في الشارجة ..
عليا : انزين ... وربيعة فطوم أبوها متوفي .. صح ولا لأ ..؟؟
ريم : انزين ...؟؟
عليا : ليش ما تكون ربيعة فطوم هي نفسها بنت عمج ...
ريم : انزين وشو اللي يظمنلج انه توقعج يكون صح ..!!
عليا : انزين شو رايج اتصل في فطوم الحين .. وبنسألها .. يمكن تتطابق الاسماء
ريم : عليوه الحين تتصلين فيها ...
عليا : اوكي .. بس عقب دخليلي رصيد
ريم : بشتريلج 3 بطاقات .. بس اتصلي .
عليا مسكت موبايلها وحطت ع السبيكر ..
فاطمة : هلا والله ...
عليا : هلا هلا غناتي .. شحالج ..؟
فاطمة : بخير الله يسلمج وانتي شو مسويه ..؟؟
عليا : تمام التمام ..
فاطمة : شحال ريم ..؟؟
عليا : زينه .. تسلم عليج ...
فاطمة : الله يسلمها ...
عليا : ربيعتج الي متوفي ابوها شحالها ..؟؟
فاطمة : الحمدلله .. انا الحين في بيتهم ..
عليا : والله ..!! زين زين ...
فاطمة : بتصلبج أول ما أرد انزين..؟؟
عليا : فطامي انا ما بطول عليج .. بس بسألج كم سؤال ..
فاطمة : تفضلي ..
عليا : ربيعتج شواسم أبوها ..!!
فاطمة : اسمه أحمد علي ..ليش تسألين..!!
عليا : متأكده ..!!
فاطمة : هي متأكده ...
عليا : انزين هي عندها اخو عود .. يعني بحدود 22..23سنة..!!؟؟
فاطمة : هي خالد تقريبا بهالحدود .. بس ليش كل هالاسئلة ..؟؟
عليا : انا ما قدر اخبرج الأسباب الحين .. بس ان شالله بتعرفين كل شي عقب ..
فاطمة : اوكي .. على راحتج ..
عليا : اوكي غناتي انا بخليج الحين ... باي

ريم تمت فاتحة عيونها .. شوهالصدفة الغريبة ...!!
عليا: شفتي انه توقعاتنا كلها صح ..وين البطايق ..؟؟
ريم : فديتج يا عليا ... انا بدونج ماسوى ..
عليا : ادري ادري .. بس وين البطايق ..؟؟
ريم : انزين ربيعتج هاي أكيد بتعطينا العنوان اذا بغيناه ..
عليا : ريمو لا تتخبلين ..!! .. و أرد و أقولج وين البطايق
ريم : ما تخبلت .. بس
عليا : لو تموتين جدامي ما بسألها عن العنوان .. بس عاد زودتيها ..
ريم : انزين انزين .. تبين البطايق ..؟؟
عليا : طبعا ..
ريم : اوكي بتصل عقب شوي في الدكان

ساعتها دخلت عليهم نورة الغرفة ..
نورة : ليش ماتعزمونا ..؟؟
ريم : ههههههههه مسموح الدخول للي تحت ال 20 ..
نورة : وانا تحت ال 15 .. ها ها ها ..
ريم : وحليلج انتي..
نورة : عليا شحالج ..؟؟
عليا: الحمدلله أشقح و أنطح ..
نورة : شحال عنوده اختج ..؟؟
عليا : زينه .. من يوم ما عرست ما شفناها ..
نورة : لين الحين في شهر العسل ..؟؟
عليا : ههههه أي شهر عسل ... ريلها يشتغل في سفارةالامارات اللي في فرنسا .. وهي يالسه وياه ..
نورة : يا سلام .. من يومها محظوظه
ريم : عن تحسدينها ..
نورة : الله يديم النعمة .. سلمي عليها اذا رمستيها ..
عليا : يبلغ..
وتموا البنات يرمسون و يسولفون لين ما روحت عليا لبيتهم ...

***

بعد مرور شهر ..

في بيتهم الصغير يالسين يسولفون ويتسامرون .. هند وميرة وعلاوي .. أما خالد فكان كل العادة يلعب في موبايله " جنه محد عنده موبايل غيره " ويفكر في شي .. ما يدري ليش ويه البنت اللي شافها عند بو محمد ما فارق عينه ..!! مستحيل يكون حب لانه خالد ما عنده هالسوالف وما يعترف بحب النظرة الأولى .. بس ما يدري شو اللي يخليه يحس بقرب هالانسانه !!
تأقلموا عيال أحمد على وضعهم اليديد بدون أم ولا أب .. هند و خالد مسكوا مسؤولية البيت كاملة .. وقرروا انه يعيشون حياتهم بعيد عن عيال عمهم اللي من جهتهم فضلوا العيش بعيد عنهم ..

هند وهي مسوية عمرها معصبة : علاوي كم مرة قلتلك لا تظهر بروحك ..؟!
علي : انا سرت عند ليلى ..
هند : أدري يا حبيبي بس لازم تشاورني أنا ولا خالد ولا ميرة .. عسب ما نتم ندورك ..
علي : لا تنازعيني .. ولا بصيح
هند لوت على أخوها بحنان : فديت عمرك انته .. يا ليت كل اليهال شراتك .. خلاص ما بنازعك بس لا تعيدها مرة ثانية .. اوكي .؟
علي ابتسم ببراءة : اوككككي ..
هند : فديتك .. ياربي اموت فهالانسان
ميرة : انتي ما تعرفين تعصبين ..!! انتي جذه تخلينه يزيد ..
هند : ياسلام .. انتي بتعلميني يعني ..؟!
ميرة : انا براويج كيف يعصبون ...
قامت ميرة و قرصت علاوي من اذنه : ان طلعت بروحك مرة ثانية بضربك تفهم ...
هند شلت ايد ميرة : اييه انتي حرام عليج اللي تسوينه .. هذا ياهل ما يفهم .. شوي شوي عليه
ميرة : الحين بيخاف و ما بيظهر مرة ثانيه ..
علي وهو معصب : انتي خايسه ... ماحبج يالخسفه ..
ميرة وسوت عمرها معصبه : انا خسفه ..!! محد غيرك الخسف ... شوف عمرك في المنظرة ..
علي : انا حلو .. صح هنودي ..؟؟
هند ابتسمت بحنان : يا عمري انته .. صح وصحين بعد .. انته الحلاه كلها ..
ميرة : عيل انا شو اطلع ...!!
علي: انتي خسفه سباله ..
ميرة : أنا..!!
علي : ماحبج اسكتي
ميرة : ايييه انته استح على ويهك
علي : هنوده خليها تسكت ماحبها
هند ضحكت : اسكتي ما يبغي يسمع صوتج المقزز
ميرة : الحين أنا صوتي مقزز ..!! من حلات صوتج عاد
هند : علاوي أنا صوتي حلو صح ..؟
علي: صح .. انتي حلوة بس ميروه خسفه
ميرة : يا بو لسان طويل .. ما بتسير بعيد طالع على أخوك العود
خالد التفت صوبها وطلعلها لسانه ورد يلعب في الموبايل ..
ميرة : شو هالصداقة الغريبة بينك وبين الموبايل ..
خالد : ابركلي من شوفة ويهج الخسف ..
ميرة : الخسفة حرمتك ..
خالد : جب .. الحين انا سبيتج انتي شلها حرمتي في النص ..؟؟
علي : خلّود خلّود ..
خالد : شو شو شو ...؟؟ انا منو ..!!
علي : خلّود ...
خالد بطل عيونه ع الأخر عسب يخوف علاوي ومسكه من ايده: اذا سمعتك مرة ثانية تقول خلّود بضربك يا مسود الويه
هند : بلاكم عليه ... كل حد يضاربه من صوب ..!!
ميرة : لسانه يباله قص ..
هند : لا والله ..!!
علي : خالد انته ما وديتني الدكان ..
خالد : الدكان مسكر الحين..
علي : جذاب ..
خالد بطل عيونه : أنا جذاب ..!! ما علي ... احلم اوديك
علي : لا خلاص خلاص ..
خالد : جب جب ... مابا اوديك .. الا اذا ...
علي : اذا شو ..؟؟
خالد : بستني بوسة كبيرة ..
قام علاوي وباس خالد على خده ..." وزين ما شفطه.."^__^
علي : بتوديني ..!!
خالد بنذاله : لا ..
علي تم يصيح : أبا أسير أبا أسير ...
هند : حرام عليك ...
خالد : انتي جب ... ما يخصج
علي تم يضرب بريله الأرض : هنوده ابا اسير الدكان ..
هند : خالد لا تغصص فيه وده الدكان ..
خالد : أفففففففففف محد مخربنه غيرج
هند : الحين أنا مخربتنه ..!! الله يسامحك ..
خالد : هي مخربتنه بهالدلع الزايد .. قام يطول لسانه على الكبير والصغير ... وكله بسبة دلعج.. لا وفوق هذا كله لازم نلبيله كل طلباته .. حد يسير الدكان الظهر..!!

هند صدق تضايجت من رمسة خالد : انزين مشكور وجان تربيتي ما عيبتك .. خذه انته وربه من يديد ..
خالد : بسويله اعادة فورمات ... ها ها ها ..
هند سكتت عن خالد .. لانها تعرف انها لو كملت وياه بيجرحها زياده ... من جهته خالد عرف انه زودها وياها بس هو من طبعه يحب يقهر
ميرة : المهم خلّود .. على طاري الفورمات والكمبيوترات
خالد : اشوفكم استحليتوها السالفة ...
ميرة :احم اقصد خالد ..
خالد : ها ميروه ...
ميرة :يا سلام
خالد : شو عندج ؟
ميرة : اسمعني ..ابا اطلب طلب ..
خالد : اوهو ... بدينا بالسوالف اللي ماحبها .. ما عندي بيزات
ميرة : بس طلب واحد ..وصغيروني بعد .. وما يكلف وايد
خالد : شو عندج ..؟؟
ميرة : نبغي خط انترنت ...
خالد طرطر عيونه : شو ..!! عيدي عيدي شو تبين
ميرة بصوت عالي : خااااااااااط انترنيييييييييييييييييييييييييت ...
خالد : وبكل وقاحه تعيدينها ..!!
ميرة : ليش انا شو قلت الحين ..
خالد : شو هالمنكر بعد ...!! ماشي ماشي ..
ميرة : خالد أي منكر أي بطيخ ... انا ما طلبت غير خط انترنت .. انترنت ... تعرف شو يعني انترنت ..
خالد : لا ..شو يعني ..؟؟
ميرة : صدق والله ما تعرف ...؟؟ اسمع خط الانترنت هو عبارة عن
خالد قاطعها : حوووه جيه شو شايفتني ... غبي ولا غبي ..
ميرة : انزين لا تغير السالفة
خالد : ييبي ورقه ..
ميرة : ليش ..؟؟
خالد : برسملج خط انترنت
ميرة : خالد لا تستهبل .. والله صدق احتاجه ..
خالد : في شو تحتاجيينه ..؟؟!!
ميرة : في الدراسة .. عقب شهرين برد حق الكلية ولا تنسى اني السنة بتخصص ..
خالد : تتخصخصين ..!!
ميرة : خالد عاد انا ما قلت اتخصخص .. قلت بتخصص .. ب ت خ ص ص
خالد : ان ز ي ن .. كل شي في وقته ... يوم بتتخصخصين بركبلج اياه
ميرة : انزين انا ملانه ومافي شي فهالبيت يونس .. ركبلي الانترنت والله انه عالم عجيب ..
خالد : قولي جذه .. انتي تبينه حق وناستج
ميرة : افففففففف خلاص عن خاطري ....
خالد : لا انا ما أأمنج .. أخاف تدخيلين هالمواقع اللي فيها الشباب و تمين تغازلين ..
ميرة : خالد لا تتمصخر .. انا ما عندي هالسوالف .. صدقني ما بستخدمه الا ف الدراسه واذا مب مأمني خل هند تراقبني ..
خالد : يصير خير ...
ميرة : خالد الله يخليك .. والله متمللة .. التلفزيون ما فيه شي يديد .. وبيت فطامي ما عدت تخليني اسيرله دوم .. ونحن السياره مب في ايدنا عشان نسير ونرد على كيفنا ..
خالد : اففف منج يا ميروه قتلج يصير خير .. بشوف امكانياتي الشهر الياي !!
ميرة : يعني بتريا للشهر الياي !! وايد ..!!
خالد : جب عاد .. لا تتشطرين ولا بكنسل السالفة من اساسها
ميرة بإحباط : انزين

يدق جرس الباب ...

هند : منو ياينا ...؟؟
ميرة : يمكن فطوم ..
خالد : انا بسير اشوف .. اذا فطوم بروغها
ميرة : لا حرام تكسر قلبها ..
خالد : ليش قلبها زجاجة ..؟؟
ميرة : الحب و عمايله ..
خالد باستغراب : ها ...!!
ميرة حست انه عفست الدنيا : أقصد المعزة و عمايلها...
خالد بخبث : أول مرة أعرف إنه فطوم عندها ذوق .. اوبس اوبس نسيت الباب
قام خالد و سار صوب الباب ... ويوم فتحه انصدم من الي شافه ...

***
محمد : أنا أنا افتحي الباب
عليا : مفتوح الباب أدخل ..
دخل محمد غرفة عليا و كانت يالسة على الكمبيوتر ..
محمد : شو تسوين ..؟؟
عليا : يعني شو تشوف .. يالسه ع المسنجر
محمد : وانتي ما عندج غير هالمسنجر ..؟؟
عليا : خلني أتسلى ..
محمد : المهم ودري هالخرابيط وتعالي أبغيج ..
عليا : انزين قول أنا اسمعك ..

محمد حس بعدم اهتمام أخته ...هي من يوم ما عرفت المسنجر وهي تقضي أغلب وقتها جدامه وهالشي ما كان عايبنه قام محمد ..ووقف عند الباب

محمد : خلاص مابغي شي .. باي ..

طلع محمد من الغرفة وعليا تمت متلومة .. شو هالحركة السخيفة اللي سوتها بأخوها ... أكيد زعل و شل في خاطره .. أخوها وتعرفه زين حساس و دلوع ... عليا ودرت الكمبيوتر و لحقت أخوها اللي دخل غرفته ..
نزلت تحت على أساس أنه تحت .. بس محد موجود .. "" أكيد في غرفته ...""
ردت للطابق الثاني وسارت صوب غرفته ودقت الباب ...

محمد حس انه أخته هي الي عند الباب : أنا مشغول ومابغي أرمس حد
عليا : حمودي لا تزعل والله اني امزح .. يالله بطل الباب
محمد : مابغي ارمس حد انتي ما تفهمين ..!!
عليا : والله اني اسفه ..
محمد ابتسم و سار صوب الباب و فتحه ..

عليا ابتسم : يعني طلعت مب زعلان...؟!
محمد : لا ..بس عيب اللي سويتيه ..
عليا : انزين اسفين ..
محمد : ادخلي ..
دخلت عليا و يلست على شبرية محمد ..
عليا : الله .! شبريتك مريحه .. برقد فيها اليوم
محمد : لا تحلمين فيها ..
عليا : من وين شارنها ..!!؟
محمد : تبين مثلها ..؟؟
عليا : هي مريحة
محمد : بشتريلج مثلها ... كم علاية عندي ..!
عليا : فديتك يا حمود ...
محمد : المهم ...
عليا : شو هو المهم ؟
محمد : انا قررت أعرس
عليا : والله !! واخيرا حد من عدنا بيعرس !
محمد : وانا ابغيج تدوريلي ع البنت المناسبة ..
عليا : يا سلام يعني اختارلك شريكة حياتك !
محمد : بالضبط
عليا : اخاف ما تعيبك وعقب الرده كلها عليي !
محمد : لا انا واثق .. بس شوفي انا عندي شرط صغيرون ..
عليا : شو هو ؟
محمد : يعني فكري بوحده تعرفها امايه .. عشان ما تعترض عليها
عليا : اوكي تم .. بفكر وبرد عليك بس ليش هالشرط ؟
محمد : انتي تعرفين امج تحب كل الناس يكونون على كيفها وبنفس طينتها .. وانا بصراحة ما أثق ف اختيار الوالده..
عليا ابتسمت و أول وحده يت في بالها ريم .. هيه مناسبة حق محمد وامها تحبها ..

عليا : المهم انته ترمس عبدالله ..؟؟
محمد : أي عبدالله ..؟؟
عليا : أخو ريم ربيعتي ..
محمد : اتصلت فيه مرة من يوم ما عطيتيني الرقم بس مارد عليي .. ومنها ما اتصلت ..
عليا : يعني مالك علاقة فيه !!
محمد : لا لا ... بس بجرب اتصلبه مره ثانية
عليا : اها ..
محمد : المهم لا تنسين تدورين .. وبسرعه
عليا :حااااااااااااااااضر والحين اروم أيلس على المسنجر بدون ازعاج
محمد ابتسم وقرص اخته من اذنها : yes ….. but , ??
عليا : بات شو ...؟؟
محمد : لا تضيعين وقتج بهالسخافات ..
عليا : ههههههههه ما شي شغله ..
محمد : فكري بشي ثاني غير الانترنت..
عليا : مثل شو ..؟
محمد : انج تشتغلين في الصيف مثلا..
عليا : شو اشتغل يا حسرة ..! .. والله لو محصلة ما بقصر
محمد : اذا كانت النية موجوده عندج انا ما عندي مانع بدورلج شغلة محترمة ..
عليا : والله ..!! وناسه
محمد : اهم شي انج ما تضيعين وقتج بدون فايدة ..
عليا : انته تفصل وانا البس ..
محمد : انزين الحين اجلبي ويهج ابغي ارقد شوي ..
عليا : رقاد العوافي




نهاية الجزء الخامس

الجزء السادس


تم واقف عند الباب فترة يتأمل الضيف اللي ما كان حضوره متوقع ... تم يـتأمل بمزيج من المشاعر ... مشاعر الكره و الحب ... الحقد والعفو ... ما عرف شو يسوي .. يطرده ولا يقوله تفضل حياك الله .. الموقف كان صعب .. و وجود هالضيف فهالمكان فعلا أربك خالد

حميد : ما بتقولّي تفضل يا خالد ..؟؟!!
خالد تم يطالع عمه اللي بان عليه التعب في الفترة الأخيرة : تــ تفضل

دخل حميد لبيتهم المتواضع اللي كانت متناقص تماما ويا بيته الفخم ... خالد لاحظ نظرات عمه اللي تغيرت بمجرد دخوله للميلس اللي كان صغير و بسيط للغاية .. حس خالد انه عمه حس بتأنيب الضمير .. بس هذا ما يكفي .. تأنيب الضمير ما يشفي غليل خالد ... وهاليوم خالد ما بيخليه يمر على خير ..

حميد : شخبارك يا خالد ..؟؟
خالد بدون ما يصد ناحية عمه ..: بخير ...
حميد: أنا شال في خاطري عليك يا خالد ..
خالد رفع حاجبه وشاف عمه بنظرة حادة : ليش ان شالله ..؟؟ بدر مني شي وانا مادري ..!؟
حميد تضايج من نظرات خالد : أطيح مريض ولا تفكر تزورني ولا حتى تتصل ..!! أنا عمك يا خالد . .. يعني بمثابة أبوك الله يرحمه
خالد ابتسم باستهزاء : عمي ..!! .. هه
حميد : ليش تضحك ..؟؟ أنا قلت شي يضحك ..!!
خالد : لا .. محشوم يا عمي .. بس حسيت أنه وجودي بيخرب أكثر من ما يصلح ..
حميد : أفا يا خالد .. انته ولد أخويه مب غريب ..
خالد : بس ساعتها كنت غريب ..

حميد : خالد أسمعني .. أنا ياي أصلح غلطتي .. أدري إني تأخرت وهالشي كان لازم يصير من زمان ... بس كل انسان يغلط .. وكل انسان لازم بيرجع عن الغلط .. بس بالمقابل لازم يحصل اللي يصفح ويسامح .. وانا ياي اتسامح منكم عقب ما راح أحمد ... وكل شي بإذن الله بيتصلح ..

خالد بلهجة استفهامية : شو يعني كل شي بيتصلح..!!؟؟ ما فهمت ..
حميد : يعني كل العلاقات بترد طبيعية ..
خالد ابتسم بخبث : اها .. يعني غلطتك الوحيدة بحقنا انك قطعت العلاقات بين العائلتين ..!! ..

حميد حس انه خالد عارف كل شي .. عارف سالفة الورث وحق اخوه اللي في رقبته ..: شو قصدك يا خالد ..!
خالد : يا عمي فيك الخير والله .. أشكرك على هالمبادرة .. بس أنا ويايه شركاء في هالصلح .. يعني ما يستوي اتفق وياك على الصلح وباجي الأطراف ما يعرفون عن شي ..

حميد ضحك :ههههههه ... ليش مكبر السالفة .. ليش نحن في شركة .. خلاص ازقر شركائك على القولة خلنا نتفق ...

خالد وقف ووجه حق عمه نظرة .. كأنه يقوله
" انته ولا شي في حياتنا ... حتى عقب ما عرفناك ماتعنيلنا شي .." حميد ما توقع انه خالد يكون بهالشخصية .. حس انه مب هين .. وانه بيطلع عين عمه .. الله يستر بس .. طلع خالد من الميلس و دخل الصالة ..

ميرة : منو هالريال ..؟؟
خالد : وانتي شعرفج انه ريال ..!!
ميرة : شفته من الدريشة..
خالد : وانتي ما تيوزين من هالعادة
ميرة : تحريتها فطوم .. وخفت تسوي اللي في راسك و تروغها ... المهم منو هالريال..؟؟
خالد : هذا عمج المحترم ..
هند : عمي ..!! .. الله يخس بليسك يا خالد ... والله انك سودت ويوهنا جدامه ..
خالد : هند واصله ويايه لفوق راسي .. فأحسن لج تسكتين ..
ميرة : انزين انزين .. قول شو يبغي ..؟؟
خالد : يبغي يتعرف على عيال أخوه ...
ميرة : فديت عمي ..
خالد : شو ..!! فديت منو ..؟؟
ميرة : عمي .. شبلاك عصبت ..؟؟!!
خالد : ما اقول الا مالت عليج انتي وعمج.. المهم يالله تعالوا سلموا عليه .. عمكم التاجر العود ما يروم يتريا ..
هند : دقايق ونكون موجودين ...
رجع خالد للميلس و يلس بعيد شوي عن عمه ..
حميد : وين اخوانك ..؟؟
خالد : الحين بيون ..
حميد :تعال خالد ايلس حذالي .. بغيتك شوي .
وفعلا قام خالد ويلس جريب من عمه : خير ..؟؟
حميد سحب ايد خالد وحط فيها شيك : هذا مبلغ بسيط مشوا حالكم فيه
خالد رفع حاجبه : و حد قالك انه نحن محتاجين بيزات ..
حميد : خالد انا عمك .. لا تعاملني مثل الغريب ..
خالد : أدري انك عمي .. بس نحن مب محتاجين ..
حميد : هذا حقكم يا خالد
خالد ضحك : هههههههه حقنا ..!! ليش من متى نحن عدنا حق عندك ..!!
حميد تم يطالع خالد بعصبية : تأدب ويا عمك يا خالد ...
خالد : انا متأدب يا عمي .. والأيام بتثبتلك هالشي ..
حميد : يعني ما بتاخذ الشيك ..؟
خالد : هذا كل حقي اللي عندك ؟
حميد : شو تقصد انته !!
خالد : اقصد اني مب محتاج لهالمبلغ البسيط .. خله ف جيبك واشترلك فيه عشا احسن

وساعتها انفتح الباب و دخلت ميرة و عقبها هند وكانت ميوده علاوي الصغير .. ميرة تجدمت ناحية عمها وحبته فوق راسه وكذلك هند .. أما علاوي فركض صوب أخوه وما طاع يسلم على عمه ..

حميد : شخباركم يا بناتي ..؟؟
هند : بخير الله يسلمك .. وانته شخبارك يا عمي .. ان شالله أحسن ..؟
حميد :الحمدلله بخير و صحة بشوفتكم ..
هند : عاد اسمحلنا يا عمي نحن اللي مفروض نوصلك
حميد : مسموحين فديتج
ميرة وهي تمزح: أكيد فيك فضول تبغي تعرف أسامينا ..؟
حميد ضحك : ههههههههههههه .. هي نعم فيني فضول .. انتي شو اسمج ..؟؟
ميرة : انا ميرة طال عمرك .. وهذي اختي العودةهند ... والصغيرون علاوي ..
حميد : عاشت الأسامي ... هند انتي أكبر وحده ..
هند ابتسمت : هي يا عمي أكبر وحده ..
حميد : ماشالله .. " التفت ناحية علاوي" تعال حبيبي عند عمك ... تعال سلم عليي ..
علاوي لصق في أخوه أكثر .. وما طاع يتزحزح
حميد : ههههههههه الظاهر خايف مني ..
هند : لا يا عمي بس هو في البداية يستحي وعقب يتشجع شوي ..
حميد : و الوالدة شحالها ..؟؟
الكل تغير ويهه و ماعرف شو يقول ... حميد شكله مب عارف شي ابدا عن حياتهم ..
حميد وهو مستغرب : شو بلاكم ...؟ ليش ما تردون .؟
هند : الوالدة متوفية من زمان ...
حميد انصدم ... ما كان يدري انها متوفيه .. !! وحس بشي من الاحراج .. وبخاصة اتجاه خالد اللي كان يدور أي غلط عسب يمسكها على عمه ..
خالد : ماعلي يا هند عمج ما يعرف انها متوفيه .. اعذرييه
هند بنظرة حادة لخالد : مسموح وما صار شي
حميد : وانتوا عايشين رواحكم اهنه ...!!
هند ابتسمت : تعودنا يا عمي ..
حميد : بس هالشي ما يصير .. وانا ما ارضى فيه ..
خالد باستهزاء : وشواللي ترضى فيه ...!!
حميد : انتوا من بوظبي .. و مالكم حد اهنه ...
هند : الحمد لله يا عمي الناس اللي حولنا مب مقصرين فينا ..
حميد : بس يا هند أنا أجربلكم من هالناس ..
هند : هذا شي أكيد
حميد : انتوا لازم تنتقلون بو ظبي ..

السكوت كان سيد الموقف ... بحياتهم ما توقعوا انهم بيودرون بيتهم اللي انولدوا فيه .. الطلب اللي طلبه عمهم صعب ... صعب عليهم .. إلا ميرة اللي كانت تتريا اللحظة اللي بتفارج فيها هالبيت .. تفارج فيها هالعيشة الصعبة .. كانت تبى تتخلص من سيطرة خالد ..

حميد : ليش سكتوا ...؟؟ أنا غلطت بشي ..
هند : لا يا عمي بس ..
حميد : بس شو يا هند ..؟؟
هند : بس اللي تطلبه صعب يا عمي... هالبيت هو الشي الوحيد اللي ورثانه من الوالد و الوالدة ..
حميد : بس أمج و أبوج ماتوا .. ولا تنسون انكم من بوظبي ..

هند نزلت راسها وما عرفت شو تقول حق عمها ..

ميرة : الكلام اللي يقوله عمي صح ياهند.. ليش نيلس في بلاد مالنا حد فيها ..لا عم ولا خال ولا جريب .. انا وياك يا عمي بكل اللي تقوله ... وجان تبانا بنسير وياك من هاللحظة

خالد قام من مكانه متنرفز من الرمسة اللي قالتها ميرة : انتي ما يخصج .. ولو سمحتي خلي ارائج حق عمرج ... ولا تفرضين رايج ع الكل ..

حميد : الي افهمه انه لك راي ثاني يا خالد ...

خالد : هي نعم .. موضوع الانتقال هذا يباله تفكير .. ومانروم نتخذ قرار بيوم و ليلة ... لا تتوقع انك تسمع جوابنا الحين ...

بيت حميد

نورة : أمايه انتي شو تقولين ؟؟!
شيخة : اسكتي عني يا نورة .. والله اني بغيت اثور على ابوج .. بس هو مصر
نورة : ابويه يبا يجلب حياتنا فوق حدر
شيخة : والحين ساير اييب عيال الفقر واييلسهم وسطنا
نورة : وين بالله عليج بنيلسهم هالفقارى .. ليكون ويانا ف الغرف
شيخة : مادري ... انا اهم شي عندي الحينه اني ما ادخلهم هالبيت .. مب كفايه اللي سواه ولدهم ف ابوج . وبعد يبا اييلسهم ف البيت ... تقولين ساحرينه !
نورة : كل شي جايز يا امايه ..
نورة : ان صار ويووا بنيلسهم ف الغرفة المسكونه ..
شيخه تغير ويهها : المهم غيري هالموجه .. لاحقين عليها
نورة : المهم امايه .. في وحده من ربيعاتي شافت ريموه ف عرس قوم بن سبيت وقالتلي انه بخاطرها تخطبها حق اخوها
شيخة : بس ريموه بعدها ياهل .. وما تعرف حق سوالف العرس
نورة : مادريبكم المهم انا بغيت اخبرج قبل ما يرمسونج اهلها .. وتراهم ناس زينين ومن عايله غنيه وراقية
شيخة : خليني ايوزج انتي واخوج اول شي وعقب لاحقين على ريم وميود
نورة تضايجت : حد قالج اني ابا اعرس ..!
شيخة : ان ياج ولد الحلال بتعرسين وغصبا عليج .. شو ناقصنج انتي .. مال ودلال وجمال .. بس ان شالله بييج نصيبج
نورة : انزين انزين فكينا من هالطاري ..
شيخة : المهم باخذ رايج بسالفة
نورة : شو بغيتي
شيخة : شورايج بعلاية ربيعة ريموه
نورة : عسوله وكيوت وايد .. بس ليش ؟
شيخة : مفكرة اخطبها حق عبدالله
نورة : توج تقولين انه ريم صغيره وعلايه ترا كبرها!
شيخة : بس علايه عقلها كبير مب شرات اختج ..
نورة : مادري بس تشوفينهم يصلحون حق بعض ؟
شيخة : هيه .. علايه بنت عرب وناس معروفين ف البلاد .. وناس يتشرف الواحد اذا ناسبهم ..
نورة : في هذي صدقتي .. بس انا اشوفها تصلح حق مايد اكثر
شيخة : لا لا لا مايد بعده صغير ع العرس.. مايد بيوزه سيارة وبفتك من حنته
نورة تضحك : ههههههه الله يقطع سوالفج يا امايه .. بس مادري لازم تاخذين راي عبدالله قبل ..

ساعتها يدش عليهم عبدالله ..
عبدالله : شبلاه عبدالله بعد!!
شيخة : ما فيه الا كل خير .. بس لو يريح قلب امه
عبدالله : شبلاه قلبج ياامايه .. وشو اللي تبيني اسويه عشان اريحه؟
شيخه : تعرس يا بو حميد
عبدالله اعتفس ويهه : وانا كل ما اسير مكان تييبولي هالطاري !
شيخة : انا محصلتلك بنت كامله والكامل الله .. جمال ودلال واخلاق .. واهلها ناس طيبين ومعروفين
عبدالله : ماشالله عليج وايد متحمسه!
شيخة : بجري وابا افرح فيك ..فيها شي !
عبدالله : لا ما فيها شي .. منو هيه البنت ؟
شيخة : علايه
عبدالله عقد حيايه : علايه ..؟ ومنو تطلع علايه هاي!!!
شيخة : علاية بنت عبدالرحمن بن مبارك .. ربيعة ريماني
عبدالله : اقول !! انتوا متفقين علييه ؟!
شيخة : ليش ؟
عبدالله : اليوم متصل فيه اخوها .. كان ربيعي ايام الثنويه وانتي تبيني حق اخته .. شو مشكلتكم ؟
شيخة : البنت ما تتفوت يا عبدالله .. لا تفرط فيها
عبدالله يأس من هالطاري : ان شالله بفكر

حزتها دخل عليهم حميد " بو عبدالله " و مظاهر التعب واضحة عليه
حميد : السلام عليكم
الكل : وعليكم السلام
شيخة : حميد ! شبلاك ؟ شو سووا فيك عيال الفقر !
حميد بعصبية غير متوقعه : شيخه ! لا تغلطين على عيال اخويه
شيخة : انتي هد اعصابك ما يسوى عليك !!
عبدالله : شو مستوي !؟
نورة : ترا ابويه سار عند عيال عمك
عبدالله : ابويه شو ساير تسوي !
حميد : سرت اشوفهم يا عبدالله .. هاذيل عيال اخويه .. ومالهم حد غيري ف هالدنيا
عبدالله : بس انته نسيتهم سنين يا بويه !
حميد انجرح من هالكلمه .. : غلطه يا ولدي وما بكررها .. تتخيلون عايشين ف بيت اصغر من ملحقنا اللي برع !! عايشين عيشة الفقارى !
نورة : وشو وصلتوله؟
حميد تألم يوم تذكر نظرات ونغزات خالد : شكلهم عيال اخويه صعبين !
شيخة : كيف يعني ؟
حميد : خالد شكله مب ناوي على خير ابد !! يرمسني وجني عدوه مب عمه .. تتخيلين يا شيخة رفض المبلغ اللي عطيته اياه !!
شيخة : صدق انه مب شايف خير !
حميد : بس البنات طيبات لولا خوفهم من خالد جان يبتهم ويايه الحينه!
شيخة : يا حميد خلهم ف حالهم ومالك خص فيهم .. ما تسوى عليك هالسيرة يا بو عبدالله
حميد : لا يا شيخة لا .. ماقدر اخليهم بدون ام ولا ابو وتحت رحمة خالد .. ماقدر


بيت أحمد " بو خالد "

الحرب مشتعله بين خالد و ميرة بسبة زيارة العم
ميرة : شوف ..! انته مب ابونا ولا امنا عشان تفرض رايك علينا ..! وايد تحملناك الصراحه ..

خالد يودها من ايدها : انتي بتسكتين ولا اعطيج طراق على ويهج يعلمج الادب !

ميرة وهيه تحاول تنشع ايدها : انا اعرف الادب من قبل ما تعرفه انته ! .. وانته اخر واحد ترمس عنه .. شوف اسلوبك كيف كان ويا عمك وعقب تعال ارمس عن الادب !

هند بخووف من ردة فعل خالد : ميره بس خلاص ..! وانته يا خالد خلاص هدها .. حرام عليك

خالد : انتي الثانيه جب .. انا شكلي برد أأدبكم من اول ويديد .. شوفي يا ميروه .. طلعه من هالبيت ماشي تفهمين .. حتى بيت فطوم ما بتطبينه .. عشان تعرفين كيف ترمسين ويا خالد
ميرة : مب على كيفك ! مب انته على اخر عمرك تيي وتفرض ارائك علينا ! ومن الحينه اقولك سلطتك هاي طلعها على هند بس انا مب تامتلكم اهنييه .. بشل قشي وبسير بيت عمي ابركلي من سيطرتك

خالد ساعتها ما رام يمسك عمرها ومد ايده عليها : جب ولا كلمه .. والله لتندمين يا ميروه على كل كلمة قلتيها ... والله لخليج تعرفين كيف تحترمين اخوج وتاج راسج

طلع خالد من البيت معصب ..

هند تمت تدمع وخايفة ترمس اختها .. اما ميرة فتمت مصدومه وتصيح بنفس الوقت ..
ميرة : حقير .. والله حقير
هند : ميرانه عورج شي ؟؟ تعالي اشوف خدج حبيبتي
ميرة وهيه تصيح بقو : انا ابويه ما مد ايده علييه !! ايي هذا على اخر عمره ويضربني !
هند : انتي استفزيتيه شوي يا ميره .. والله حرام عليكم اللي تسوونه ..
ميرة : اكرهه يا هند اكرهه ..


نهاية الجزء السادس