انتقام خالد

يسلمج ربــي يــاا الغااليــهـ ...


و بنزلهـااا اسبووعيــاااا ع جزئيــــن ...

الجزء السابع ..



فتح عيونه العسلية بصعوبة .. من يومين وهو حبيس غرفته اليديدة .. كان يدري انه بينتقل لبيته اليديد بس مب بهالطريقة .. يطلع منه وهو خسران ..
" الله يسامحج يا هند .. ما توقعت انج تكونين بيوم ضدي .. انتي بالذات .. "

خالد من يوم ما صار اللي صار انقطعت علاقته بأخته هند .. اللي كانت تحاول انها ترد المياه لمجاريها بس ماشي أمل .. خالد رافض انه يستجيب لمحاولاتها ... لانها بنظره السبب في وجودهم في هالمكان

رجع بذاكرته للماضي القريب ... للماضي اللي جلب حياتهم

خالد : هنوده شو رايج نظهر .....؟
هند بفرح : والله يا خالد بتظهرنا ....؟؟
خالد : هي بظهركم .. ما تشوفين علاوي متملل من زمان ما ظهر ..
هند : فديتك ياخويه .. مب الا علاوي المتملل كلنا يابوك ...
خالد : انزين يالله تلبسي ولبسي علاوي وأنا اترياكم بالسيارة ..
هند : ثواني ونكون جاهزين ... يالله ميرة قومي
ميرة : محد عزمني ...
خالد: انتي قري ف البيت احسلج
ميرة خذت بحساسية : انته بلاك حاط عليي هاليومين ..!!
خالد : جب ولا كلمة .. انتي ادرى الناس باللي سويتيه ..
ميرة : أنا ما جذبت ... ومصرة عالرمسة اللي قلتها .. شو هالحقد !! هذا عمنا مب انسان غريب .. وبعدين انته عايبتنك عيشتنا هاذي ..!! قارن حالتك في حالة كل اللي حواليك .. قارن عيشتنا في عيشة عيال عمنا !!!
خالد : هذا كله من خيرنا وخير أبونا ..
ميرة وهي مب فاهمة واصلا هم ما يعرفون شي عن سالفة حق ابوهم : انته شو تألف شو تقول ..!!
هند : ميرة ... خالد ... ماشبعتوا من الضرابة اليومية هذي ...!! .. يالله ميرة قومي تلبسي ..
ميرة : ما بسير ...
خالد : أحسن ..
ميرة بضيج : أدري انه أحسن بالنسبه لك ..
خالد : زين يوم انج عرفتي ...
ميرة وبدت تدمع .. اليوم حاسة بضيجة فظيعة وخالد زودها عليها بكلامه : مشكور ... وما تقصر وما أتوقع منك أقل من اللي قلته ... بس أبغيك تعرف انك زودتها وايد
هند : ميرة أخوج يمزح وياج .. مب قصده ..
خالد : لا أنا ما أمزح .. و أنا في السيارة .. لا تتأخرين ...

طلع خالد من البيت وهو متغصص من عمره ... أخته مهما سوت اتم أخته ... هاي ثاني مرة يشوف الدمعة بعينها .. ويكون هو سببها ... بس ميرة تحب تعاند .. وخالد ما يحب حد يعانده ... يلس في السيارة يتريا هند وعلاوي .. وكان على أمل أنه هند تقنع ميرة بالطلعه وياه ... بس هالشي ماصار .. طلعتله هند وعلاوي بدون ميرة .. وعلشان ما يبين انه متلوم او حاس بالغلط ما سألها عن ميرة ... بس هند كانت تدري انه يبغي يطمن على اخته ... فطمنته وقالتله انها اتصلت بفاطمة وهي بتييها عقب شوي .. ارتاح خالد وما كان يدري انه في شي أكبر بيصير بدون علمه ...

***
..خالد غمض عيونه بالقو .... معقولة يكون جاسي لهالدرجة ..!! كيف هان عليه انه يخليها في البيت بروحها ويسير يتونس ... كيف ..!! .. انته غلطان يا خالد ولو حاولت انك تبرر حق عمرك ... الغلط راكبنك ..

خالد رجع لذكرياته ...رجع لأقسى موقف انطبع في ذاكرته ... للموقف اللي غير مجرى حياتهم كلها ...

عقب 3 ساعات من الوناسة رجعوا البيت ... وأول ما وصلوا شافوا الباب مبطل .. خالد وهند تبادلوا نظرات استفهامية ..
هند بخوف : شو السالفة ليش الباب مبطل ..؟؟
خالد : انتي مب قلتي انه فطامي بتيلس ويا ميرة ..!!
هند : أنا بروحي مرمسه فطامي .. وقالتلي ربع ساعة بالكثير وتكون عندها
خالد بنظرة خوف : عيل شو السالفة ..؟؟
هند بتوتر واضح : مادري .. بس أنا منبهه عليها انها تقفل الباب .. يعني
خالد : يعني شووووو !
هند : مادري يا خالد .. مادري

خالد حس انه في شي مستوي ولا ليش ميرة بتخلي الباب مفتوح !!..

فركض داخل البيت .. ووراه ركضت هند ..

سار خالد لغرفة ميرة ويوم بغى يبطل الباب .. طلعتله فاطمة ... خالد تم يطالعها .. حس انها خايفة ... مرتبكة ... حس انه مصيبة مستوية داخل غرفة أخته .. ملامح فاطمة أكبر دليل على صدق توقعاته ..

خالد : فاطمة ..!!
فاطمة : خــ خـــــالد
فاطمة بدت تصيح و تصيح ... قامت تقول كلام مقطع ومب مفهوم ..!! .. كأنه حد ميت عندها ... فطامة يلست على الأرض من الصياح .. شكلها منهارة.. تعبانة .. طايحة في مصيبة
خالد : فطامي .. شو فيها ميرة ..؟؟
فاطمة ما تكلمت وواصلت صياحها

خالد استغرب ..شو اللي يخلي فاطمة تصيح .. معقولة يكون صاير شي لميرة ...!! خالد بدا يتنفس بالقو .. بدى يخاف .. بس كان لازم انه يقتحم ويعرف شو السر اللي مخبتنه فاطمة .. دخل الغرفة و ياليته ما دخل ...

***
في غرفتهم اليديدة... هند يالسة ويا أختها ميرة اللي تعبت نفسيتها من عقب اللي صارلها .. قامت تخاف من الكل ... اللي صار مب شويه ... اللي صار محاولة اغتصاب من شخص مجهول محد يعرفه... صار بعد ضرابتها الاخيرة ويا خالد .. للحظة اعتقدت انه اللي صار لها بسبب أخوها ... وثبت هالشي في عقلها الباطني ..أخوها اللي ما فكر يزورها عقب اللي صار ..ما فكر إنه يواسيها أو يخفف همها ...

ما كانت تدري انه هو الثاني يتعذب ... يتعذب من ابتعادها عنه ... هند كانت تحاول تطلع أختها من هالحالة .. بس استجابة ميرة كانت بطيئة ... عمها حميد هو الثاني ما قصر ... كان دايما يحاول ييلس وياها .. ويظهرها من الجو اللي عايشه فيه ... ميرة وايد تعلقت في عمها .. وكانت ترتاح يوم تشوفه ... وتحس انه الجدار الواقي لها من أي انسان يحاول يسلبها حق من حقوقها .. تشوفه المنقذ اللي تلجأله في وقت الحاية

وفي الغرفة ...

هند : حبيبتي ميرة ... كلي شوي .. مب زين اللي تسوينه في عمرج ...
ميرة : مابغي يا هند والله مالي نفس ..
هند : لا هالرمسة ما تمشي علييي .. ميرة انتي ليش تحسسيني انج تعاقبين عمرج .. ليش محملة عمرج مسؤولية أمر انتي مالج علاقة فيه .. حتى عيال عمج خاطرهم اييلسون وياج ويرمسونج بس انتي معاندة .. ليش هذا كله !
ميرة بعبون دامعة : الكل عارف باللي صارلي الكل ..!!
هند : لا يا ميرة .. عمي ما خبر حد بالموضوع .. قالهم انه اللي تمرين فيه بدا وياج من وفاة الوالد .. وانه يعاملج بهالطريقة عشان يحسسج انه ابوج ما مات .. وانه هو بمثابة الوالد

ميرة كانت تتأمل سقف الغرفة وفضلت الصمت .. كانت تحس بغصة وحزن وخوف من شي هيه ما تعرفه ... كانت تحس انه محتاجه عمها في كل لحظة وكل حين ..

هند : يلا يا ميرة عن خاطري كلي ولو شوي
ميرة : والله يا هند أحس اني شبعانة
هند ابتسمت : وينها ميرة اللي كانت تلحس الصحون ..!!
ميرة بدت تدمع لانها تذكرت خالد ... تذكرتها يوم كان يقولها الحسي الصحون
ميرة : لا تذكريني فيه ..
هند باستغراب : منو هو اللي ما ذكرج فيه.. !!
ميرة لوت على أختها : خالد ..
هند : خالد ..!!

ميرة تمت تتذكر ايامها ويا خالد .. قبل وفاة الوالدة كان انسان ثاني .. كان طيب والكل يحب مزحه.. بس عقب ما ماتت تغير ... تغير 180 درجة .. حتى انهم ما عادوا يتحملون مزحه ... الغلط من منو ...منهم لانهم ما حاولوا يعرفون شو اللي في قلبه .. ولا غلطته ...!!

تذكرت يوم كان يلعب وياها هي وفطامي .. تذكرت أحلى المواقف ويا أخوها .. بس الحين خلاص انتهى كل شي .. تحول خالد لوحش يهدم كل اللي حوله .. تحول لانسان مسيطر .. لانسان حقود

ميرة : ليش يكرهني ..؟؟

هند مسحت على شعر أختها : خالد ما يكرهج .. انتي ما شفتي حالته يوم كنتي في المستشفى .. تخيلي خالد اللي ما نزلتله دمعة يوم توفى الوالد ... صاح عليج ..!! ..تخيلي خالد يصيح ..!! هزرج ليش صاح ..!! لانه يكرهج..؟ لا طبعا لانه يحبج ويخاف عليج ... كان حاس بالذنب .. بس انتي يا ميرة مب معطتنه فرصة .. هو بخاطره يعتذر لج وييلس وياج بس أنتي رافضة هالشي

ميرة بدت تصيح بهدوء ... هي تحبه ولو حاولت انها تنكر .. وهي تدري انه يحبها .. بس ما تقدر تسامحه ... كل ما تذكرت اللي صارلها ... يزيد حقدها على أخوها ...

ميرة : ما اقدر يا هند ... ما اقدر أسامحه ..

هند : ميرة ... إذا كان رب العالمين يسامح ويعفو .. نحن نعاند ..!! .. انسي اللي صار وافتحي صفحة يديدة .. انتي الحمدلله سليمة وكل الدكاترة أكدوا هالشي .. يعني ماله داعي تعيشين عمرج بهالحالة ..

ميرة : انزين شو تبيني أسوي .. أسير له وأعتذر له .. إذا انتي يعاملج جذه .. أنا أكيد بيروغني
هند نزلت راسها : أنتي غير ...
ميرة : غير !!

حزتها دخلت ريم وكانت شالة بإيدها صينية عصير ..

ريم بابتسامة ارتسمت على شفايفها : مرحبا ..
هند بادلتها الابتسامة : مرحبتين... هلا ريم
ريم : شحالج هند ..؟؟
هند : الحمدلله ..
ريم : والحلوة ميرة شحالها ...؟؟ ..بعدين ليش هالدموع ...!! مب اتفقنا انه ننسى الماضي ... ؟ ونبدا صفحة يديدة
ميرة مسحت دموعها و ابتسمت : شحالج ريم ..؟؟
ريم : بخير لانكم ويايه ... تصدقون عاد .. الحياة من دونكم ما تسوى ..
هند ابتسمت : لا لا الله يخليج .. عن نصدق
ريم : صدقي .... والله ما قص عليج ..
هند : فديتج أدريبج ..
ريم التفت صوب ميرة: ميرة تعرفين منو بيينا اليوم ..!!
ميرة :منو..؟؟
ريم : علاية ربيعتي ... اللي كانت ترمس فطامي ربيعتج ..

ميرة تذكرت فطامي ... من زمان ما رمستها .. صدق تولهت عليها ... الدنيا كئيبة من غير فاطمة

ميرة :والله ..!! من زمان وأنا بخاطري أتعرف عليها
ريم : بتستانس عليج ..
هند : عيل وين علاوي ..؟؟
ريم : يلعب ويا شمامي بلاي ستيشن ..
هند : ههههههههه مب شايف خير أخونا ..
ريم : فديته خلييه يستانس .. يختي هالانسان يدخل القلب بدون استئذان ..
هند ابتسمت : تربيتي ..
ريم : الله يخليج له ..
رين : هي صح قبل ما أنسى أبويه اليوم قرر انه يطلعنا .. بنسير صوب كاسر الأمواج بتستانسون هناك .. وعلاية بتسير ويانا
هند : ما يقصر عمي ...
ميرة :فديت عمي والله ...
ريم : أبويه وايد يحبكم .. بس يا ليت خالد أخوكم يحس

هند و ميرة تغيرت ملامحهم .. هند ما عيبتها الكلمة ... أما ميرة فطاري خالد يهز كيانها ... ريم شعرت بهالتغير ... وحست أنها ما اختارت الوقت المناسب

بغت تظهر عمرها من هالموقف السخيف اللي حطت عمرها فيه : أنا بترخص الحين .. بسير عند امايه يالسه بروحها تحت ... شو رايكم تنزلون ويايه ..؟؟
هند : بنلحقج عقب شوي ..
ريم : أوكي أترياكم ... لا تطولون ..
هند ابتسمت : إن شالله .. من العين

***
عبدالله يالس في غرفته يتأمل الحبوب اللي أدمن عليها من فترة مب طويلة .. طول حياته كان وحيد ومحدود العلاقات .. كان في نظر من حوله انسان مغرور ومتكبر .. محد كان يحس انه يعاني .. بالرغم من انه البجر الا انه تعاملهم وياه كان رسمي جدا .. كانوا جافين وياه .. وظنوا انه هو مرتاح للوضع هذا .. بس الع** صحيح

ويوم قرر يغير من عمره طاح على صحبة سيئة ... كان يدري انهم رابعوه عشان بيزاته مب عشان ذاته .. رابعوا بيزات عبدالله مب شخصية عبدالله بس مب مهم .. اهم شي انه حصل ناس يلجألهم متى ما احتاجهم .. كان يقضي وياهم فترات طويلة .. ساعات تمتد لاسابيع

تعرف عليهم وكان بالنسبه لهم البنك اللي يسدد كل احتياجاتهم وهو ما كان مقصر .. عرفوه ع المخدرات .. ما كان مثل غيره جاهل فيها .. لا كان يعرف انها مخدرات بس جربها كنوع من التحدي لنفسه .. كان يبا يتخلص من كل الهموم اللي تعصف قلبه .. جربها مره مرتين وعقب ادمنها .. ما كان يحاتي صحته ابدا .. واصلا محد كان يحاتيه .. عرف انه المخدرات درب خاطئ بس اهله هم اللي حدوه على هالشي .. او هذي كانت حجته ..

بس اليوم عبدالله بمزاج مختلف كان يبا يودر هالحبوب ويسترد شخصيته الجديمة .. يدري انه الموضوع صعب بس

قطع حبل افكاره صوت دقات الباب . . فر عبدالله الحبوب ف الزباله
عبدالله : ادخــل

دخل مايد الغرفة ويلس على الشبرية جريب من عبدالله . .

مايد كان حنون وساذج بطبعه . . يحسن الظن في الناس دايما . . وكان مختلف تماما عن عبدالله المكار نوعا ما

مايد حس في نظرات اخوه نوع من الحزن ولو انه حاول يخفيه . . تم يشوفه بنظرات ريبة بدون ما يتكلم وهالشي اربك عبدالله .. عبدالله رفع حاجبه بس مايد استمر في نظرته المريبة

عبدالله : خير .؟! شبلاك تشوفني بهالطريقة !!!! في شي
مايد : عسى ما شر؟! .. احس انك مضايج من شي ..
عبدالله : مايد مب متفيج لك .. اذا عندك شي تبا تقوله .. قوله وخلصني
مايد : بصراحة يا عبدالله من زمان وانا افكر افاتحك ف السالفة بس كنت متردد
عبدالله وهو طفران : شو هيه السالفة؟

مايد : سالفة عيال عمك اللي طلعولنا فجأة بدون أي مقدمات
عبدالله : وشو اللي ياب طاريهم ؟
مايد باستغراب : انته ما تدري انهم انتقلوا وبيسكنون عدنا ؟
عبدالله : من متى ؟!
مايد : اشهد انك مب ف الدنيا .. الجماعة من يومين في البيت .. بس ما تنلام ما شفنا شيفتك من 4 ايام
عبدالله : اف نحن ناقصين مشاكل في هالبيت ..!!
مايد : خلاص هذا صار شي مب مفروغ منه .. بس انا مستغرب يا عبدالله من ظهورهم في حياتنا فجأة ! يعني وين كانوا ..؟ وليش ابويه ما خبرنا عنهم ..؟! ليش كتم السر طول هالسنين
عبدالله : ابوك كان يفكر صح ..
مايد : كان !! ليش يعني ؟
عبدالله :كان يبا يبعدنا من هالمجرمين ويكفينا شرهم
مايد : مجرمين ..!!
عبدالله وبدا يحس بنغزات في جسمه: ابويه خش عنكم سالفة اخوه وعياله عشان ما يخليكم تاخذون فكرة سيئه عنهم .. بس انا عرفت السالفة من امايه ..
مايد : وشو اللي عرفته من امايه ؟
عبدالله : سالفة طويله بس باختصار عمك ما حافظ على ثروته وضيعها في اللعب ويوم افتقر استحى من اهله و ناسه فشرد وسار لبنان ومنها ما عرفنا شي عنه .. والحين يوم حسوا انه ما عندهم دخل غير ابويه ردوا ..
مايد : معقولة ..!
عبدالله: هاي الدنيا .. مصالح وبيزات
مايد :بس تعرف مندسين ف الغرف ومحد منهم يظهر ولا يراوينا ويهه
عبدالله ابتسم بخبث : الله يديم هالحال

حس عبدالله بزيادة الألم في جسمه وكان فعلا محتاج لحبه بس كيف وهو ناوي يودرها ..

عبدالله : اقول مايد اطلع برع انا تعبان وابا ارقد " وفكر عبدالله انه بالرقاد بينسى الالم"
ماايد حس انه اخوه مب طبيعي : فيك شي عبدالله ..؟
عبدالله وهو يمثل دور الصاحي : لا بس خلني بروحي .. فيني رقاد
مايد : عبدالله انته مريض ؟
عبدالله : ميووووود انته ما يخصك ويلا برع

مايد تضايج من اسلوب اخوه وطلع وهو محتر على ومن اخوه ..

أما عبدالله فطاح على بطنه وغمض عينه وحاول انه يصبر عمره .. كان يحس بحكة في كل جسمه .. حاول عبدالله يخفي صرخته .. عشان محد يحس فيه ..
" لا .. لا مستحيل ارجعلها مستحيل "


* * *
" وانا مب عارف شو أسوي يا بو محمد ..!!؟"

بو محمد : بس يا حميد يمكن الولد مب هاين عليه بيته اللي عاش فيه طول حياته .. وهالشي مخلنه مب متقبلنك ولا متقبل أهل بيتك

حميد : يا بو محمد هو مقاطع الكل ..حتى خواته..تصور انه مقاطع اخته العودة بس عشانها اتصلت فيني وخبرتني عن الحادث اللي تعرضت له ميره!!

بومحمد : معقوله يكون بهالنفسية !! ..

حميد : واكثر واكثر
بومحمد: بس يا حميد مهما كان يتم ولد اخوك ومن دمك ولحمك

حميد : بس ولد أخويه مب ناوي على خير ..
بو محمد : شو تقصد ..؟
حميد : يا خوفي يابو محمد انه يكون عارف باللي سويته في أبوه واييني في يوم يطالبني بالحلال

بو محمد : بس هو له حق عندك يا حميد ..

حميد : ومنو قالك اني مب ناوي ارد حلاله كامل ..!!

بو محمد : ومتى ..؟
حميد : انا مفكر اردلهم اياه بدون محد يحس !! ما بغي الكلام هذا يوصل لعيالي ..!! يعني الحلال بإذن الله بيرد لاصحابه بس بهدوء ..خايف اذا عرفوا يكرهوني

بو محمد : عين العقل يا حميد ... وعن خالد انته حاول ت**به واذا كان ولا بد .. حاولت تسكته بكم بيزة ... لين ما تعرف اذا كان هو فعلا ناوي ع الحلال ولا لأ...

حميد : محد شاغل تفكيري الا هالخالد .. انته ماتشوف نظراته لي يا عمي بو محمد .. حاس اني عدوه مب عمه ..!!

بو محمد : ماعلي يا بو عبدالله .. الولد مرده بيهدا يوم بيشوف انه اللي حوله كلهم متضايجين من تصرفاته

حميد :الله يسمع منك يا بو محمد .. والله يهدي خالد

* * *


طلعت ريم من الغرفة وهي تفكر في خالد ..

" شو اللي يخليه يحبس عمره في الغرفة طول هالأيام .. معقولة يكون مغصوب ..!! بس هو ريال ومحد يروم يغصبه ..!! .. عيل شبلاه ؟؟ .. وليش الكل ساكت على هالوضع ... !! يمكن لانه طبعه شري شوي .. فالكل يتجنب التعامل وياه .. بس خالد شكله طيب ومحترم ... لا السالفة فيها سر ... وأنا لازم أحله"

لمعت في بالها فكرة .. فكرة خطيرة .. فكرة فاشلة من بدايتها .. ريم ما كانت تعرف شو الشي اللي جذبها لهالفكرة ... بس اللي تعرفه انها بتنفذها ولو شو ما صار ...

تجدمت ناحية غرفته .. حست انه دقات قلبها تزيد .. قلبها بيطلع من مكانه ... الرجفة بدت تسري في جسمها كله .. بس لا ... أنا بنهي هالوضع .. لازم انهيه .. رفعت ايدها ودقت الباب .. مرة .. مرتين ... محد رد عليها .. ريم ارتاحت .. ما كانت تبغيه يرد عليها .. بس أهم شي إنها حاولت ..
صدت على ورى و كانت على وشك انها تتحرك .. بس الباب انفتح ... حست انه ريولها ثجيلة .. ماقدرت تتحرك ... قلبها كان على وشك أنه يوقف ..
اللي عند الباب ساكت .. ما تكلم .. ما سألها منو تكون ولا شو تبغي .. يا على بالها إنها تتخيل .. وإن الباب ما انفتح
ريم صدت صوب الباب عسب تتأكد من اللي سمعته
.. وأول ما شافها رد على ورى من هول صدمته .. حس إنه ضربه قوية يت على راسه ..... قالها بصوت هامس : انتي ..!!
" معقولة تكون هي نفسها اللي شفتها عند بو محمد ... معقولة ..!! .. الانسانه الوحيدة اللي حس بقربها واقفه جدامه .. "
خالد تم يطالعها بنظرات غريبة بدون ما يتكلم... وريم كانت مستغربة من ردة فعله ..
ريم : ســ..السلام عليكم ..
خالد وهو يتنفس بصوت عالي : انــ .. انا .. انتي .. مـ مــ ...
ريم باستغراب : خـ خالد .. شبلاك ..؟؟
خالد بلع ريجه وحاول يرتب الكلمات : انتي منو ... منو ...!!
ريم : أ أنا
خالد : ليش لاحقتني ..!!
ريم : لاحقتنك ..!! هذا بيتي يا خالد .. انا بنت عمك ..

خالد زادت صدمته وتم يطالع ريم وجنه بياكلها ... بنت عمي ... شو هالتناقض ... الانسانة اللي شغلت تفكيره طول هالفتره .. تطلع بنت عمه ... بنت عدوه ... بنت الظالم الحرامي ...!! طلعت بنت أبعد انسان لقلبه ...
ريم كانت مستغربة من التغيرات السريعة اللي طرأت على ويه خالد .. حست انه مكانها غلط .. لازم تنسحب قبل ما ياكلها خالد بنظراته

ريم : انا اسفه اذا كنت أزعجتك .. بس لانك ولد عمي ما يهون عليي أشوفك بهالوضع ..

خالد تم يطالعها بدون ما يتكلم .....

ريم ما عرفت شو تقول جدام صمت خالد ونظراته النارية : انا ...انا اسفه مرة ثانية ... عن اذنك ..

خالد بدون احساس: لحظة ...

ريم ابتسمت وصدت صوبه ... كانت تدري إنه خالد مب مثل ما يقولون عنه .. خالد طيب وحنون .. أكيد الحين بيعتذر لها لانه وقفها فتره عند الباب

خالد بنظرة غريبة : لا تعيدين هالحركة مرة ثانية ..

خالد سكر الباب بالقو في ويه ريم اللي تمت منصدمة ....

" هذي يزاتي ..!! ... هذي يزاتي يا خالد ... ليش ..؟؟ انا شو سويتلك ..!! .. وبعدين شو قصده بلا تعيدين هالحركة ... ليكون يتحراني يايه أشوفه ولا .... "

ريم بدت تدمع .. حست بالاهانه ... حست انها نذلت من انسان حقير مثل خالد ... النار كانت مشتعلة في ويهها
دخلت ريم الغرفه وتمت تصيح .. نست انه هند و ميرة في الغرفة ... ما حست بشي ... ريم تساندت على الباب و تمت تصيح بشدة ... وهالشي خلى هند تخاف و تركض صوبها ..

***
" والله ...!! الله يبشرك بالخير ... خلاص ان شالله من بداية الشهر الياي بداوم عندكم... يزاك الله خير يالخوي ما تقصرون ... الله يسلمك فمان الله "

يا سلام أحلى خبر سمعته في حياتي .. أكيد يوم بخبره بيستانس ..أنا ادري انه ماله حد غيري هالقاطع ...
***

هند بخوف : ريماني شو مستوي ليش تصيحين ...؟؟

ريم عقت بعمرها على هند .. ما كانت حاسة بشي : ليش ... ليش يسوي فيني جذه ... هذي يزاتي ..!! أنا كنت ابغي أطلعه من هالحالة .. بس هو حقير نذل ... تخيلي تخيلي طردني وانا في بيتي . .. كان يطالعني باشمئزاز جني كلبة جدامه ... مب جني من دمه ولحمه .... جني عدوته مب وحده من أهله .. "
ريم لوت على بنت عمها وتمت تصيح بصوت مسموع وتعيد نفس الرمسة
هند ما كانت فاهمه شي .. رمسة ريم مبهمة .. منو اللي تقصده ريم ... معقولة يكون واحد من اخوانها ضاربنها ..أو طاردنها مثل ما تقول ...!!

هند: ريم حياتي انتي منو تقصدين ..؟؟

ريم : خالد الحقير ... خالد النذل ...

هند حست انه ماي بارد ينصب عليها ... ابتعدت شوي عن ريم وتمت تتأمل ويهها .. ما كانت تبغي تصدق .. أو بالأحرى ما صدقت .. شو ياب خالد لريم .. خالد حابس عمره في الغرفة من أول يوم وصلوا فيه .. ما ينزل لا لغدى ولا عشا .. حتى الصلاة ما يصليها في المسيد ..
هند : خـ خـالد ...!

نهاية الجزء السابع

الجزء الثامن

ريم أخيرا استوعبت انه اللي جدامها هند .. هند أخت خالد .. ما عرفت شو تسوي ...شو تتصرف ... ريم سبت أخوها جدامها ...!! أكيد ما بترضى .. أكيد ما بتصدقني .. وان صدقتني بتستوي مشكلة كبيرة... يا ربي أنا شو سويت ..!! الله ياخذ بليسج يا ريم

.هند من جهة ثانية حست انها وصلت حدها .. خالد زودها ... زودها وايد ... ما عاد يحترم ولا يقدر أي حد ... فشلهم وسود ويوهم جدام عيال عمهم اللي إلى الآن ما غلطوا في حقهم

هند فتحت الباب و طلعت من الغرفة ... والنار شابة في جوفها
أما ريم فحست انه مصيبة بتستوي بسببها ... فلحقت هند اللي كانت تمشي بسرعه ...

ريم : هند .. هند صدقيني ما صار شي ... .. هند لا تكبرين السالفة ... اسمعيني عاد .... هنوده ... خلاص أنا مسامحتنه بس أنتي اهدي ... اذكري ربج يا هند

هند صدت صوب ريم بعيون دامعة : إذا سكتنا عنه بيزيد .. أخويه وأنا أعرفه
ريم بصوت مرتجف وهي تمسح دموع هند : أخاف أكون السبب
هند ابتسمت ومسكت ايد ريم : لا تخافين .. أنتي مالج علاقة
ريم عقت بعمرها على هند : انا اسفه يا هند .. والله اسفه ..
هند وحاولت تمثل دور الشجاعة : ما بيصير الا كل خير

وصلت هند لغرفة خالد وفتحت الباب بدون ما تستأذن ...وتمت تتطالع خالد اللي كان منسدح على الشبرية ...

استغرب من هند اللي كانت معصبة بس بنفس الوقت عينها متروسة دموع.. شو سالفتها .؟

بس

يوم شاف ريم وراها عرف كل السالفة .. وعرف انه ريم خبرتها بكل اللي دار من بينهم .. فتم يطالعها وبويهه ابتسامة سخرية ...

هند بصوت عالي : انته مستحيل تكون ولد أحمد ... مستحيل تكون خالد اللي نعرفه ...

خالد تجدم ناحية هند وصار جريب منها وايد ..: تبين تشوفين جوازي عسب تصدقين اني أخوج .!!!

هند تحاول تمنع دموعها : ماله داعي أشوفه ... ولد أحمد مستحيل يكون بهالوقاحة

خالد : وقاحة ... هه يا حبيبي

" خالد التفت ناحية ريم " و قال ".. ها يا بنت حميد ..شو قلتيلها ... ليكون ما قلتيلها اني ضربتج و سحبتج من شعرج وتفلت على ويهج .... لا لا مالج حق بصراحة ... مالج حق تتسترين على ولد عمج ... هاي مب تربية حميد ... حميد علمج انج ما تجذبين .. هو أصلا قدوتج في الحياة ... حميد معروف بصدقه وأمانته و عدله .. ليش ما طلعتي عليه ..!! أفا أفا .. ما هقيتها منج

هند ما قدرت تتحمل أكثر مسكت ايد خالد وحطت عينها في عينه :
بس خلاص ... وصلت حدك يا خالد ... مب كفاية اللي سويته في أختك .. مب كفاية الي تسويه فيني ... الحين بتحول على عيال عمك ... تبغي تنتقم من الكل ... ليش كل هذا ...!! ما كنت أدري أنك حقود ... ما كنت أدري انك نذل لهالدرجة ... تهينها في بيتها ..!!! تهينها وهي اللي كانت تفكر في راحتك ..!! .. انته شو ..!! انته شو ... انته انسان بدون مشاعر ... كنت وبتم بدون مشاعر ...حتى أختك اللي طايحة في الفراش من أيام ما فكرت تزورها ولا حتى تعتذر لها على اللي بدر منك ..

خالد يود هند من طرف ثيابها بعصبية وقام يهزها وقالها بصوت عالي ..:

جاااااب ... لا تحمليني غلط انا ما ارتكبته ... نسيتي انج كنتي ويايه يوم صار اللي صار ...انتي اصلا انانية طول حياتج تفكرين بعمرج وبس ... فكرتي بوناستج ونسيتي أختج ...لا تتحرين انه دموعج بتغفر لج الغلط اللي ارتكبتيه .. لا تتحرين انه بدموعج بت**بين ود أختج و ود عمج وعياله .. لا يا العاقلة لا مب انتي الوحيدة اللي تخاف وتحس وتصيح ... كلنا خفنا عليها .. وحسينا فيها ... بس اعترف لج انج كنتي أشطر عني .. وقدرتي تخدعين كل اللي حولج وتظهرين عمرج من هالمصيبة ... بس لا ..لا يا هند .. انتي بتقدرين تمثلين ع الكل .. الا على خالد .. فهمتي

***
نرجع لغرفة عبدالله اللي كان الصراع فيها مستمر بين الارادة والالم .. حس عبدالله انه اليوم بيلاقي حتفه لا محاله .. كان جسمه شاب نار .. ما كان يعرف شو طبيعة الاحساس اللي يحس فيه .. كان خليط من الحرارة و البرودة والالم و التعب

" ياربي ليش جيه يستوي فيني ..! انا غبي .. غبي ..! شو اللي خلاني اطيح عمري ف هالورطه هاي ! ..مسوي عمرك بطل وشجاع .. تتحدى عمرك في لعبة الموت هاذي ..!! اه احس اني بموت .. اه يا جسمي .. "

دموع عبدالله بدت تنزل بغزارة .. حس انه مثل الياهل .. الالم ياكل في جسمه اكل .. ومب راضي يخف لو دقيقة وحده..

ساعتها تخيل انه ساير عنده امه .. تخيل انه يقولها " امايه انا محتاجلج .. امايه انا تعبان .. ريحيني يمييه ريحيني.. خذيني ف حضنج .. انا هالشي يكفيني .. هالشي بيحسسني اني انسان حالي حال الكل .. "

تخيل انه امه تقول .. " تعالي يا حبيبي .. تعال عند امك .. تعال بشل شوية من همك .."
عبدالله : امايه .. انا احبج .. امايه حسسيني بجيمتي في قلبج دخيلج
شيخة : انتي بجري .. انته اكبر عيالي .. ابيع الدنيا واشتريك .. تعالي يا حبيبي .. تعالي بريحك من كل شي

ضحك عبدالله بوسط الامه ..ضحك على خياله السخيف .. لا مب سخيف بس مب واقعي ..

رن حزتها موبايل عبدالله .. وهو في وسط هالحرب شله عشان يشوف الرقم .. وهالرقم كان يتكرر من كذا يوم .. وهالشي خلى عبدالله يثور .. ويمكن مب عشان الرقم الغريب .. بس كان يدور على أي حد عشان يشل همه

عبدالله : نعم !
.... : هلا عبدالله شحالك ما بغيت ترد ..!
عبدالله : انته منو ! ( وبصرخه كبيرة) انتـــه منو ..! كل شوي داق عليي شو تبا ..!!
.... : عبدالله شبلاك الله يهديك ..!! أنا محمد .. محمد بن عبدالرحمن بن مبارك .. وهذا رقمي اليديد !!
عبدالله بانفعال وبكلام غير مفهوم: انا ما عرف واحد بهالاسم .. وما با اعرف حد . خلوني في حالي !! طول حياتكم بعاد عني .. شو تبون الحينه مني !!
محمد : بسم الله عليك يا عبدالله شو مستوي عليك! عبدالله انته في البيت .! بييك الحين فورا
عبدالله : ما بغي حد منكم ايي .. تفهم ! مابا حد منكم .. انتوا طماعين ..

بند عبدالله التيلفون في ويه محمد و حس بنقمة كبيرة على هله و ربعه .. الدنيا ما تسوى بدون ناس يحبونك .. ودام انه ماشي حبايب .. فالدنيا مالها جيمة

" خلاص ما عدت اتحمل .. طز في صحتي .. طز في كل شي "

سار صوب الزباله .. طلع باكيت الحبوب .. وبلع كل اللي فيها

من جهة تم محمد فاتح عينه ومستغرب من كلام عبدالله المبهم نوعــا ما ..
" شبلاه عبدالله ..! اخر مره رمسته فيها كان طبيعي وايد ..!! بس شكله كان تعبان وميهود ..؟ بس هو كان ينكر بالرغم من التعب اللي بادي على ويهه شو مستوي ف الدنيا .!"

عليا : اللي واخد بالك يتهنابوو
محمد بضيج : هلا عليا
عليا بقلق : محمد .. فيك شي .؟ احس بك مب طبيعي !
محمد : مادري يا عليا شو اقولج .. انا مصدوم !
عليا : بسم الله الرحمن الرحيم .! خير يا محمد شو مستوي .!
خبرها محمد بحواره القصير جدا ويا عبدالله .. وعن كلامه الغامض اللي كان يقوله
عليا : غريبة !
محمد : مادري والله يا عليا .. حالة عبدالله ما تسر .. وانا خايف عليه
عليا : معنه ريم دوم تقول انه عبدالله هذا لو العالم كله تأثر هو ما بيتأثر .. تقول انه ما يخصه ف الدنيا
محمد : انا بسيرله يا عليا .. ماقدر اشوفه ف هالحالة واسكت !
عليا : لا تتهور يا محمد .. اصبر شوي ع الاقل سيرله عقب ساعة يمكن يكون هدى
محمد : خلاص مثل ما تقولين .. الله يطمني عليه
عليا : آمين .. وانا بتصل في ريماني الحين يمكن مستوي شي عندهم
محمد : اوكي يلا بسرعه اتصلي وطمنيني ..

سارت عليا عند التيلفون واتصلت بس محد رد

***
في بيت حميد

هند تمت تطالع أخوها .. ما عندها كلام تقوله .. خالد طعنها .. جتلها بالكلام اللي قاله .. ما كانت متوقعة انه توصل في المواصيل انه يشكك في طيبتها و حبها لإخوانها...هند اللي ضحت بالزواج عشانهم تنوصف بهالوصف ..!! كانت تحس انه اللي جدامها مب خالد .. هذا واحد ثاني اكيد

خالد طلعها جدام بنت عمها أنانية و جذابة ... سيل الدموع وقف من الصدمة ..

هند حست بدوخة .. مسكت راسها .. خلاص الدنيا اسودت في عيونها .. ما عادت تشوف شي .. عقب كل هالصدمات اللي تلقتها .. طاحت هند على الأرض ..

ريم ركضت ناحية هند .. هند اللي أثبتت لهم من أول يوم إنها مثال للطيبة و الحنان .. : هند .. هند ردي عليي ... هند حبيبتي شو صارلج ..

خالد اللي كل العادة حس بغلطه متأخر ... تقرب من هند .. هند اللي جرحها قبل شوي ..خالد اللي كان من دقيقتين وحش يهدم كل اللي جدامه .. بلع ريجه .. ضاعت الكلمات من جدامه ما عرف شو يقول ولا كيف يبرر موقفه ..

ريم : خالد تم عند أختك أنا بسير أزقر أبويه ... بس دخيلك لا تجتلها ... دخيلك يا خالد ...!!

خالد تم يطالعها بدهشة ... اجتلها ..!! انا اجتل هند اختي وربيعتي .. !! انا !

ركضت ريم وطلعت برع الغرفة كانت خايفة على هند .. هند اللي تلقت أقوى صفعة في حياتها .. ريم كانت تتمنى لو إنها صفعت خالد ولا جتلته وفكت البشرية من أذاه .. بس لا .. مهما سوى ومهما جرح وظلم بيرد .. كل انسان يغلط و يرد لصوابه ولو طول ..

وصلت ريم للصالة وكان حميد يالس فيها ويا شيخة و نورة ومايد ...
ريم بصوت يرتجف : أبويه ...
حميد التفت صوبها : خير ...
ريم : هــ هـــند ...
حميد قام : بلاها هند ...؟؟ تعبانة.. فيها شي ..!؟؟
ريم وبدت تصيح : طايحة في غرفة خالد ...
حميد : في غرفة خالد .... !!
ريم : أبويه الله يخليك الحقوا عليها .. خالد بيجتلها ..

حميد ركض بسرعه وصعد الدري وهو في خاطره يدعي على خالد ... خالد اللي ما بيرتاح لين ما ينتقم من الكل ... خالد اللي نسى شو معنات الأهل .. خالد اللي بدى في ميرة وبينتهي في هند ...

وصل حميد للغرفة وما كان يدري انه العايلة كلها وراه .. وصل وشاف خالد وهو يالس على الأرض ويحاول يقوم هند بس بدون فايدة ... حميد حس بالغصة والقهر ... حس بالنار في جوفه تحرقه ... كان يبغي ينتف خالد ويطرده من بيته ... كان يبغي يدوسه و يسفل فيه الأرض ..

حميد تجدم ناحية خالد ودزاه بقوة لدرجة انه خالد انضرب راسه في حد المكتب ..

خالد تم يطالع عمه اللي كان بيحرقه بنظراته .. وهو يتألم من الضربة اللي كانت قوية

حميد : أنا سكت لك وايد يا خالد وما عاد فيه صبر ... تفهم ماروم أتحملك زيادة ... هاي اللي جدامك أختك ..أختك يالحيوان أختك ... عنبوه انته ما تحس ..!!! ... تبغي تقضي على خواتك ..!! ... تبغي تجتلهم وحدة ورى الثانية ..! انته مينون ..!! انته أكيد مب صاحي ... ولا صاحي بيسوي في أخته سواتك ...!!انزين ليش ..!! فهمني ليش ..!! ..كل هذا لانها اتصلت فيه وقالتلي انهم محتاجيلي .. شو هالحقد ...!! ... أنا عمها قبل لا أكون عمك .. تعرف شو يعني عمها ...!!
أنا أدري انك تكرهني .. و تتمنى موتي ... بس لا تفرض على خواتك رايك وأحاسيسك ..ياخي كل انسان حر .. واعرف اني متحمل وجودك في هالبيت عشان خاطر خواتك ..

خالد وقف وهو يحس بألم فظيع في راسه بس قاوم ..: انته السبب في كل شي ... انته السبب .. خذت خواتي مني .. خذت الناس اللي ضحيت بكل شي عشانهم... الناس اللي كنت أتعب وأشقى عشانهم ..خذت أغلى الناس بحياتي ... "حط ايده على راسه عقب ما زاد عليه الألم" خواتي اللي يلجئولي بكل صغيرة وكبيرة ... خواتي اللي ما تجروأ بحياتهم انهم يرفعون صوتهم عليي.. كرهتهم فيني .. خليتهم يبتعدون عني ... كنت تتريا أي زلة مني عسب تاخذهم ...عقب كل هذا تبغيني أسكت ...!! تبغيني أعيش طبيعي!! ... انا من يوم عرفتك والمصايب تتحذف عليي .. ياخيي أنا ماعندي غيرهم ..ما عندي غير خواتي ... خذ عيالك وعيشوا بعيد عنا ... خلونا رواحنا ... خلاص انسى انه عندك عيال أخو .. انساني وخلني أعيش ويا خواتي بروحنا ..

حميد : محد ضربك على ايدك وقالك تعال اسكن عندي ..

خالد كان ياي يرمس بس حس بألم في راسه .. شاف عمه بنظرة ألم وغضب وحقد

حميد : واذا مب عايبنك البيت سير اسكن في الخرابة مالتك بس اكفينا شرك و شر عمايلك ..

خالد عض على شفايفه من الغيض وقال: وانا طالع من بيتك بس بيي اليوم اللي بتندم فيه يا حميد .. بيي اليوم اللي تنكشف فيه على حقيقتك ..

حميد كان يبغي يهجم على خالد اللي عقب كل اللي صار مصر انه عمه السبب ...بس اللي وقفاه احساسه بحركة وراه .. ويوم صد شاف هند وهي تحاول تقوم بس مب قادرة ... ريم ركضت صوبها وكذلك حميد اللي كان خايف عليها وايد ...

حميد : حبيبتي هند انتي بخير ... !!
هند وهي مب مستوعبه : شو استوى ..!! أنا وين..
حميد : حبيبتي ما استوى شي بس انتي تعبتي شوي ...
هند : تعبت ..!!
حميد : أهم شي انج بخير الحين ...
هند هزت راسها و ابتسمت : وين علاوي ..؟
حميد : حتى وانتي تعبانه تحاتين علاوي ..!!
هند : فديته ما يهون علييه ..
حميد : بخير .. بس المهم الحين انتي قومي خلنا نوديج غرفتج ... ولا عايبتنج يلسة الأرض ..
هند مسكت ايد عمها اللي ساعدها على القومة ..

طلعت هند وحميد وريم من الغرفة .. طلعوا وخلوه بروحه .. يلس ع الأرض و سند راسه ع المكتب و تم يتأمل السقف ...كان يحس بألم فظيع في راسه ... بس هذا يزاه ... نزلت دمعة حارة من عينه ... خلاص خسر أخر انسان ممكن يسمع له في حياته .. خالد يلس مثل اللاعب اللي خسر المباراة اليوم .. اليوم خسر الجولة الفاصلة ... الكل انزاح ناحية عمه وهالشي مب من مصلحته ...
قطع عليه حبل أفكاره موبايله اللي كان يرن .. طلع خالد الموبايل من جيبه .. "" عمر يتصل بك "" .. ابتسم خالد .. عمر دايما يتصل في وقته ..
خالد بصوت مبحوح : ألو ...
عمر : حشا ذليتني من الصبح اتصل
خالد وهو يتألم : اسمح لي ما انتبهت
عمر : خالد .. شو بلاك ..؟؟ ليش صوتك متغير .. عسى ما شر !!
خالد : اطمن يا الغالي ما فيني شي ..
عمر : دومك جذه تخبي عليي .. بس أنا متصل أبشرك ..
خالد : شو من البشاير عندك ..!!
عمر : أحلى بشارة بتسمعها في حياتك ..
خالد : واللي هي ..!!
عمر : حصلتلي شغل في بوظبي ...
خالد : احلف ..
عمر : والله العظيم .. ومن بداية الشهر ببدى فيه .. وبجابلك
خالد : بس
عمر : بس شو ..!!
خالد : بس انا قررت ارد الشارجة ..!!
عمر : ترد الشارجه..!! ليش ان شالله ..؟؟
خالد : لاني ما اتحمل اشوف هالحقير ولا دقيقة زيادة ..!!
عمر : و حقك يا خالد !!
خالد سكت وما عرف شو يقول ... فعلا اللي يحاول يوصله عمر منطقي ..!! كيف بيوصل لحقه وهو برع البيت ..بس هو خلاص قال حق عمه انه بيظهر برع البيت ..!!
عمر : اسمعني يا خالد ... انته الحين تعال الشارجة و انا وياك بنحاول نرتب الموضوع بهدوء
خالد : يعني بتساعدني ..
عمر : هذا شي طبيعي .. وبدون مقابل بعد
خالد زاد علييه الألم : اه ..
عمر : شوفيك يا خالد ..؟؟
خالد :ما فيني شي لا تحاتي .. خلاص .. انا الحين بظهر وبنزل الشارجه

***

في الصالة ...
حميد : مايد رجاءا لا تناقشني .. أنا وصلت حدي وياه.. وهالاشكال مستحيل اقبل وجودها ف البيت
مايد : يابويه فكر فيها بروحك .. قوم عمي مدام يوا عندنا مستحيل يظهرون .. وأصلا مب حلوة انك تفرقهم .. يعني ترضى انه عمي ياخذ خواتي ويطردني أنا ...!!
حميد : انزين قولي شو الحل وياه ...؟؟ خالد خلاص تخبل .. ما عاد يفرق بين اخته و عدوته ... خالد ياي ينتقم ..
مايد : يابويه خذ الأمور بعقل .. أول شي لازم نعرف ليش هو يبغي ينتقم ... شو اللي يخليه يفكر بهالشي ...
حميد ارتبك .. هو يعرف السبب اللي يخليه ينتقم .. وهو حق أبوه اللي في رقبة حميد .. بس هالشي مستحيل يبوح فيه لحد ... : و انا شو يعرفني .. اذا كانوا خواته ما يدرون عن شي

مايد : انزين عيل لازم ت**به يابويه وتخليه في صفك لازم يا بويه ترجعه البيت بأي طريقة.. خالد شكله خلاص ما عاد يهمه حد .. يبغي يوصل لشي معين واللي صار اليوم يمكن يزيد من حقده و يخلي العواقب وخيمه.. ونحن ما نعرف هدفه حاليا و يمكن ما نعرفه مول ... لذلك لازم نكون حذرين ... ما ندري الضربة اليايه بتكون على راس منو منا .. فما شي حل غير انه ن**به ..

ريم : بس يابويه خالد ما يكرهنا .. صدقني يا مايد ما يكرهنا .. ولا يكره خواته .. بس احساسه انه ابتعدوا عنه ولد رد الفعل هذا ..

نورة : وانتي طول حياتج تدافعين عنهم ...

ريم : أنا حسيت بهالشي من كلامه ... يابويه مثل ما قالك مايد انته لازم ت**به .. بس ت**به لانه ولد أخوك مب عسب تحذر من شره ...

مايد : ريم .. اللي سواه خالد ما ينصبر عليه وانا ويا ابويه فهالشي .. يعني مستحيل عقب الرمسة اللي قالها انه نحبه و نصبر عليه ... الحين ما في شي نسويه الا انه ن**به و نرجعه البيت بهدف انه نحذر من الياي ..

نورة : أنا برايي انكم تخلونه بروحه وبنفس الوقت تحذرون منه .. يعني لا تحسسونه انكم حاسين بالذنب من اللي صار .. هو يوم بيحس انه بروحه ومحد مسوله سالفة بيضطر انه ينسى كل شي ويفتح صفحه يديده وياكم وايي يعتذرمن ابويه ويترجاه انه يرده البيت .. الانسان ما يقدر يعيش بروحه

مايد : غلط .. نحن مب ضامنينه .. هو لو كان يفكر بهالطريقة ما كان حاول انه ينفرنا من حوله ... يعني انه يتم وحيد هذا اخر شي يفكر فيه .. لانه خواته ومهما سوى فيهم بيتمون حوله .. ومستحيل يدورون ضده .. وصدقيني هند اول وحده بتطالب برجعة اخوها او انها تلحقه .. وماظن يابويه انك عدت تأمن عيال اخوك اللي مادري من وين طلعولنا ويا واحد شراني مثل خالد

نورة : سالفة خالد هذي ما تنتهي .. سووا اللي تبونه .. أنا بسير فوق احسن لي من هالنقاش

طلعت نورة من الصالة ..

مايد : والله أحسن شي سوته انها سارت ..
ريم ابتسمت : حرام عليك ..
حميد : ريم ..
ريم صدت صوب ابوها : نعم ..
حميد : شحال هند بنت عمج .؟
ريم نزلت راسها : الله يعينها .. اللي سمعته اليوم من خالد كان صدمة بالنسبة لها .. مادري شو اللي خلاه ينهد عليه مرة وحده ..
مايد : وهي شو خلاها تسير غرفته .. مب على أساس انها بتبتعد عنه كم يوم على أمل انه يتأدب

ريم ارتبكت .. محد يدري انها هي السبب في كل شي .. لو ما سارت غرفة خالد جان ما صار اللي صار
ريم : مادري .. بس هذا أخوها مالها غنى عنه ...
حميد : أحس اني قسيت عليه في الرمسة ..
مايد : لا يابويه لازم تقسي عليه شوي.. لازم يحس انه غلط .. لو سكتت عنه يمكن يزيد ..
حميد : أخاف أخسره للأبد بسبة الكلام اللي سمعه .. والله ما يهونون عليي عيال اخويه .. بس غصبا عليه .. وهو اللي حدني اني اطرده
مايد : يابويه فكر بالطريقة اللي ترجعه فيها البيت ..
حميد ابتسم : معني ما اتوقع انه يرد .. بس بحاول ... ريم سيري عن بنات عمج
ريم : ان شالله ..

صعدت ريم للطابق الثاني ومنها للغرفة .. يوم دخلت شافت هند وهي ترمس علاوي ..
ريم : مرحبا ..
هند ابتسمت : هلا بالحلوين ...
ريم : إذا أنا حلوة عيل انتي شو تتطلعين ..!!
هند : هههههههه شكرا على المجاملة الحلوة ...
ريم : لا والله ما اجامل .. ما شالله عليكم كلكم حلوات .. وأحلاكم علاوي ..
هند : في هذي ما جذبتي ... فديت علاوي ..
ريم : الظاهر أمكم كانت قمر ..
هند : الله يرحمها ...
ريم : الله يرحمها .. فديتك علاوي تعال عندي ..
ركض علاوي صوب ريم اللي يلسته فوق حضنها
هند : ريم ..؟
ريم : هلا ..
هند نزلت راسها : تحسين اني غلطت يوم سرت حق خالد ...!!
ريم : انتي ما غلطتي يا هند .. بالع** خالد كان لازم يحس انه غلطان .. بأي طريقة .. وصدقيني انه حاس بذنبه .. بس اصبري عليه ..
هند ابتسمت : أدري .. خالد طيب .. طيب يا ريم .. بس ساعات ما يحس بعمره ... تعرفين هو ليش ثار هالثورة كلها ..!!.. لاني قتله انه له علاقة بحالة ميرة .. وان غلط في حقها ..

ريم : هي صح هند .. ليش الكل يحمله مسؤولية اللي صار ..
هند : كلنا ندري انه ماله علاقة .. بس خالد الله يهديه حتى لو ما كان غلطان يتصرفلج تصرفات تخليج تحملينه المسؤولية غصبا عليج .. يعني عقب اللي صار لميرة .. ابتعد .. ما زارها ولا طيب خاطرها .. ساعات ما افهمه يا ريم .. ماعرف شو السبب اللي يخليه يتصرف كل هالتصرفات ... من عقب وفاة الوالدة انجلب حاله ... بس اللي اعرفه و متأكدة منه انه خالد مب قاصد ..

ريم : الله يهديه .. بس مهما سوى يتم أخوج اللي يحبج ويخاف عليج
هند : أنا بسيرله عقب شوي وبراضيه ..
ارتبكت ريم .... : بس .. بس يا هند خالد طلع من البيت ..

هند : طلع ..!!! ليش
ريم : صار حوار حاد بينه وبين ابويه... بس لا تخافين ابويه قال انه بيدور عنه وبيرده البيت .. لانه ما يههون علييه
حست هند بالضيج بس حاولت تغير الموجة
هند : المهم .. وين علاية ربيعتج ..؟

ريم : اليوم مب مناسب .. باجر بتييي ..
هند : وميرة وينها ..!!
ريم : أختج عاشقة الحديقة اللي تحت .. تسير هناك وتقرالج بهالكتب ..
هند : هههههه .. عاد تصدقين ميرة بحياتها ما هبشت كتاب وقرته ... بس سبحان الله مغير الأحوال ..
ريم : أقول هند .. صدق أمج كانت لبنانية ...؟؟
هند : هي .. ليش شاكة ..!!
ريم : يا سلام .. انزين يعني عندج خالات لبنانيات ..؟
هند : والله مادري .. أنا بحياتي ما سرت لبنان ..
ريم : يعني أمج ما كانت تزور أهلها ..؟؟
هند : لا ..
ريم : ما عندكم صورها ...؟؟
هند : امبلا ... تبين تشوفينها ..!!
ريم : بخاطري والله ...
هند قامت وسارت صوب الكبت وظهرت منه شنطة ... هالشنطة فيها ألبومات ..
طلعت هند واحد من الألبومات وعطته ريم
ريم تمت تشوف الصور ...: هذي أمج ..!!
هند ابتسمت : هي هذي .. واللي حذالها أنا ... هههه شفتي ويهي كيف ملونتنه ..
ريم : ههههه .. أشوفج ... لا تقولين انه هاي ميرو..
هند : امبلا .. هاي الهبلة ميرة ..
ريم : شكلها غير يوم كانت صغيرة ... بس ماشالله امج حلوة ..
قامت ريم تقلب بين الصور .. ومن ضمنها كانت صور عمها .. عمها كان وسيم وايد .. واللي يشوفه يعطيه أصغر عن عمره ... لاحظت ريم الشبه الكبير بين خالد و أبوه ... كان الوحيد اللي يشبه ...
ريم : عيل وين صور خالد ..؟؟
هند حست بنوع من الاهتمام من قبل ريم اتجاه خالد .. وهالشي خوفها لانه لو كان صحيح .. فمحد بيندم غير ريم ... بس ما حبت تحسسها بشي فطلعت ألبوم ثاني
هند : هذي كلها صور خالد .. بتموتين من الضحك عليه ..
ريم قامت تتصفح الألبوم .. صور خالد تموت من الضحك .. فكل صورة يسوي حركة هبلة من حركاته ... وفي صورة شافته وهو شال ميرة وهي ميتة من الخوف .... تمت ريم تشوف الصور ووصلت لآخر صورة .. كان متهندم فيها ..ولابس غترة و عقال ودشداشة سودة .. كان شكله رهيب ... ووسامته زايدة ..
ريم باندهاش : وااااااااااو ... هالصورة رهيبة ..
هند ابتسمت : هاي أخر صورة له ... ومنها عاف التصوير وما قام يتصور ...

حزتها اتصلت عليا في ريم فاستأذنت من هند وطلعت برع ... وخبرت عليا كل اللي صار ..

***

نهاية الجزء الثامن

الجزء التاسع


عقب ما تغلب الالم على الارادة و استسلم عبدالله مرة ثانية للمخدرات وهالسم اللي ادمن عليه بإرادته.. رجع عبدالله لحالته الطبيعية .. او خلنا نقول انه رد انسان بعد ما كان مصارع

.. رقد عبدالله عقب ما خذا الحبوب 4 ساعات .. وقام مكيف نوعا مــا .. واهم شي انه نش مرتاح .. وقرر انه ما يعرض عمره لمثل هالالم مرة ثانية

تسبح و لبس ثيابه وعدل من شكله المعفوس نوعا ما واستعاد نظرة الاصرار في عيونه وعقب كل هذا قرر انه ينزل وييلس عنده اهله شوي .. لانه من كذا يوم ما شافهم .. وعشان يعرف اخر احداث البيت .. خصوصا بعد استضافته لعيال عمه .. حس عبدالله انهم مب ناوين على خير بس خش هالشعور في نفسه لين ما يتاكد بنفسه

طلع من غرفته عشان ينزل الصاله بس اول ما ظهر جابلته نورة .. واللي ما شافته من 3 ايام او اكثر .. بسبب غيابه المستمر عن البيت

نورة وتمثل انها تكح : غبار غبار .. حشا من متى وانته اسير غرفتك! ليش ياخويه حابس عمرك طول هالمدة
عبدالله : هه هه هه حد قالج انج سخيفه من قبل
نورة : وايد قالوها .. بس شو نسوي السخافة صفة موروثة ف العايله
عبدالله وهو طفران: انزين خلصينا وين امج وابوج .؟
نورة : تحت يناقشون قضية اليوم
عبدالله : خير ان شالله أي قضيه ..؟ شو من القضايا عدكم اليوم
نورة : والله يا عبادي فاتتك الضرابة اللي نقعت بين ابوك وولد عمك .. ياااااااي اكششن .. بسير بكتبها قصة في ألم الامارات
عبدالله : هيه ميود خبرني انهم اهنه من كذا يوم .. ابوج هذا استخف ؟؟
نورة : شدراني في ابوك .. شكله استخف
عبدالله : المهم شو استوى مبينهم اليوم ؟
نورة : ياخي السالفة طويلة عريضة يبالها يلسه .. انته عندك شي ولا فاضي ..
عبدالله : لا مليان ..
نورة : هه هه المهم تعالي غرفتي وبقولك عن كل شي ..

دخل عبدالله واخته نوره الغرفة وبدا مبينهم نقاش طويل عن حدث اليوم واللي يعتبر من الاحداث الساخنة في هالبيت .. خبرته بالتفصيل من يوم ما دخلوا عيال عمهم البيت لحدث اليوم

عبدالله : ياااااالله ! هذا كله يستوي انا اخر من يعلم .. !
نورة : يوم اقولك حبيس حجرتك ..!
عبدالله : ابويه من البدايه عارف انه خالد هذا لسانه طويل .. وهو قايل هالرمسه بعظمة لسانه
نورة : هيه .. بس اليوم فكنا منه وطرده
عبدالله : مسرع ! توهم يايين لحق يطرده .!
نورة : أحسن .. وعقبال ما نشهد طردة البقيه ..
عبدالله ضحك من نظرة الكره الواضحه في عين اخته ..وتم يفكر بعمق .. وكان احساسه انه عيال عمه يايين ينهبون يزيد في كل لحظة
لاحظت نورة شرود عبدالله وانه مب على بعضه فسألته بهمس : اللي ماخذ بالك يتهنابه ..
عبدالله : يقولج رزة الفيس من طبايع التيس ...
نورة : مقبوله منك بس خبرني .. بشو تفكر ..؟
عبدالله ابتسم بمكر : انا وانتي ما نجتمع على خير
نورة : شو قصدك ..؟؟
عبدالله : بتعرفين قصدي جريب .. بس بغيت اسألج ..
نورة : اسأل
عبدالله :شو اللي خلى ابويه يصر انه عيال عمي يسكنون عدنا ..؟؟
نورة : معنهم حاولوا يخفون السالفة الا اني عرفت كل شي
عبدالله : وشو اللي عرفتيه يا عريفة زمانج ؟
نورة : يقولك طال عمرك انه الاخت ميرة تعرضت لمحاولة اغتصاب فاشله ... وهالسبب خلى ابويه يحس انه خالد مب قد المسؤولية ..واللي عرفته بعد انه هند هيه اللي طلبت من ابويه يشلهم وياه بوظبي لانها ما أمنت على عمرها ولا على اخوانها .. وخالد ماله حد غير خواته و استصعب العيشة بعيد عنهم فلحقهم ..
عبدالله : اها .. عشان جييه ابويه مدلع ميرة مثل ما قلتي ... يحاول يطلعها من الحالة النفسية اللي عايشه فيها
نورة : شكلها بدت تتأقلم شوي شوي ... بس يمكن تحاول تتجنب الحديث ويا الكل لانها تحس انه الكل عارف
عبدالله : بس انتي تقولين انها سليمة
نورة : هيه نعم سليمة .. بس اللي صارلها مب شوي... وليش كل هالاهتمام في السالفه ...؟؟
عبدالله : فيه موال يدور في راسي بس يباله تكتيك وتفكير عميق .. وان شالله بتعرفين كل شي ...
نورة : وضح اكثر
عبدالله : ان ما خاب ظني .. عيال عمج لاعبين لعبه عشان يكوشون ع الحلال
نورة : معقولة .!!
عبدالله : سالفة الاغتصاب هاي مب داشه مخي .. تغتصب وتطلع سليمة واختها تتصل ف ابويه واخوهم اللي من كم يوم ابويه يقول انه صعب .. يوافق وايي يسكن اهنييه .. القصه احداثها مب مرتبه .. ولا شورايج
نورة : كل شي جايز
عبدالله : المهم انا طالع الحينه بسير عند ابوج وامج
نورة : اوكيه برايك انا بيلس ارمس ف التيلفون

حمد عبدالله ربه انه نورة ما رزت عمرها وقالت بنزل وياك .. لانه ما كان بالاساس يبا ينزل عن اهله .. كان يبا يدخل غرفة خالد ويتفحصها شوي .. وفعلا تسلل عبدالله لغرفة خالد ويلس يفتش فيها .. ما كان يدري شو اللي يبغي يوصله .. وكان يدري بالنتيجه مسبقا ..بس كان في شي يجبره انه يفتش
وبعد طول عناء وتفتيش ما طلع غير بورقة وحده حس عبدالله انه مهمه جدا .. حصل هالورقة في درج المكتب .. وكان مكتوب فيها
" الانتقـــام يبدأ من هنا "
***
في غرفة هند وميرة
تظهر هند بهيئة القلقة لمرتبكة .. أخوها من طلع من البيت الظهر وهيه ما تدري عنه شي .. وكانت تحاول تتهرب من الاحساس بمسؤولية اللي صار ..
" شو هاللي سويته .. خالد ما يستاهل اللي قلته له .. الله يقطع الشيطان .. وينك يا خالد .. وينك .!!؟"

ضافتها ميرة بنظرة استفهامية يخالطها شعور بالدهشة : شو تقولين هند ..؟

هند ما حست انها كانت تفكر بصوت عالي شوي .. واستحت شوي من عمرها .. واستغرب كيف انها ما قدرت تسيطر على تصرفاتها : ما قلت شي بس كنت أفكر
ميرة سكرت الكتاب اللي كان في ايدها وحطته ع الطاوله ويلست مقابل اختها هند
ميرة : تفكرين بخالد ..؟!

ما كان سؤا كثر ما كان تأكيد على اللي ف بالها

هند والقلق واضح من حركات ايدها .. : لا تشيلين هم .. بيرد .. بيرد ان شاء الله ..
ميرة ضحكت ضحكة جافة : انا اشوفج انتي اللي شاله هم .. انا مب خايفة عليه .!
هند بتلقائية : انتي ما تعرفين ... ما

"سكتت هند لانها ما كانت تبا تحسس اختها بأي مسؤولية اتجاه سبب طلعة خالد "


ميرة : ما عرف شو ؟!

هند : أقصد .. مــا .. مادري انا شو يالسة أخربط .. بس انا احاتي خالد وايد

شلت ميرة التيلفون وحطته جدام اختها وسارت تكمل قراية الكتاب اللي بدت فيه ..

هند حست عمرها غبية .. كيف ما فكرت اتها تتصلله من التيلفون ..! القلق مأثر على مخها بلا شك .. شلت السماعة وضغطت ع الارقام .. مرة .. مرتين .. ثلاث .. رن و رن و رن بس بدون فايدة ..
كررت هند الاتصال على فترات متقاربة بس بلا جدوى .. خالد ما بيرد .. اكيد زعلان وما يبا يرمسني .. اكيد اكيد ..

صدت هند صوب اختها وكانت على وشك انه ترمس .. بس شافتها تقرا .. حب ميرة للقرائه بدا يزداد يوم عن يوم ..
هند : شو تقرين ميراني .؟
ميرة : كتاب " افعل شيئا مختلفا "
هند ابتسمت بحنية : شكله مشوق
ميرة: وايد وايد يا هند .. أحب كتابات هالكاتب .. وايد مبدع .. يعني يجذبج عشان تكملين اللي بديتي فيه
هند : منو الكاتب ؟
ميرة : طارق السويدان
هند : ماشالله ..
ميرة : من اخلصه بعطيج اياه تقرينه
هند : اكيد لازم اقراااه .. ما بفوت شي

ميرة : ممم هند بغيت اقولج شي ..
هند : قولي يا عيون اختج
ميرة : ما تحسين انه نحن وايد مبتعدين عن قوم عمي .. يعني عاللي يسوونه عشانا بس ولا مرة فكرنا نيلس وياهم ع الغدا ولا العشا .. والله فشله
هند استغربت من ميرة .. كانت تظن انها حابسه عمرها عشان اللي صار .. بس طلعت تفكر بنفس اللي تفكر فيه هند ..

هند : عاد تصدقين انتي تقرين افكاري .. انا كنت افكر بهالشي
ميرة : شو رايج ننزل اليوم نتعشى وياهم .؟
هند : تامرين امر .. تبين الصدق مليت انا من زود ما اجابلج .. ابا اغير الاشكال شوي
ميرة : لج الشرف انه الشيخه ميره مجابلتنج .. كم تسوى اليلسه ويايه
هند ضحكت وكانت مستانسه انه ميرة بدت تتعدى شوي شوي الحالة اللي كانت فيها ..وكان هذا انجاز كبير .. بس تم خالد شاغل تفكيرها وتمنت لو يجبر بخاطرها ويتصل

* * *

في ستار بو**
سلطان : أما سالفة عيال عمك سالفة .. كيف جيه فجأة دشوا في حياتكم وفرضوا عمارهم
مايد : تعرف سليطين .. ما قدر احكم عليهم احس فيهم طيبه بس يمكن ويا الايام يوم بتأقلمون يطلعونها
سلطان : انته دومك تحسن الظن
مايد : واعتز بهالشي
سلطان : كل شي جايز يا صديقي العزيز
مايد : بس تدري .. مسويلنا اكشن ف البيت .. يعني اليوم الوضع كان متدهور بين ابويه وخالد .. الا اني كنت مستمع
سلطان : ماصيب قوم عند قوم فوايد طال عمرك
مايد : المهم انا يايينك بسالفة بس اباها تكون مبينا يا خويه
سلطان : افا عليك عزيزي سرك ف بير
مايد : اخويه عبدالله يا سلطان .. احسه مستوي انسان غريب ..تصرفاته مب طبيعيه بالمرة .. والشله اللي طايح عليها مول مب شي ..
سلطان رافع حاجبه : يعني كيف تصرفاته مب طبيعيه ..!؟
مايد : يعني مثلا اليوم كنت يالس عند ارمسه ف سالفة ولد عمي .. وكان عادي متفاعل ويايه .. وفجاة تغير .. سلطان نظراته فيها شي .. جنه بياكلني .. حتى انه راغني ..!
سلطان : غريبة ..!
مايد : وازيدك .. ربيعه اليوم دق ع البيت وانا رديت عليه .. يقول انه عبدالله كان يقوله رمسه غريبه .. تقول سكران !
سلطان : ومنو الشلة اللي وياه ؟
مايد : قوم نويصر وحسون ..
سلطان : اللي ف الجامعه .. هاييل ما غيرهم ؟!
مايد : هم
سلطان : ما حصل غير هالخرابه ..! وبعدين هو اكبر عنهم :!!!
مايد : وهاللي قاهرني .. يعني ما حصل حد غير هاليهال ..!
سلطان : انزين رمسته !
مايد : ما تجرأت .. يوم حاولت افتح فتن علييه
سلطان : واللي رمسك واحد منهم ؟
مايد : لا لا هذا محمد ولد عبدالرحمن .. ربيع جديم لعبدالله .. بس سافر ويوم رد .. رد تواصل ويا عبدالله .. بس شكله يا متأخر

سلطان : الله يهديك يا عبدالله
* * *
بعد أسبوع
في صالة بيت حميد
الكل كان مجتمع ومن ضمنهم عيال احمد اللي قرروا يتخلصون من عزلتهم ويختلطون ويا عيال عمهم .. بس كانوا مستحين شوي من وجود مايد و عبدالله لانهم اول مره يشوفونه ..
عبدالله كان يتفحصهم بنظراته مثل اللي بياكلهم .. كان يبا يمسك عليهم أي شي .. والكلام المكتوب ف الورقة يدور ف باله

حميد : نورت الصالة بنزلت عيال الغالي ..
هند بأدب : تسلم يا عمي .. هذا من ذوقك
حميد : وعبدالله ومايد مثل اخوانكم لا تستحون منهم
مايد : هيه لا تستحون ترانا ما ناكل ..
هند : ههههه ولا يهمك يا مايد
مايد : واي شي تبونه انه جاهز اييبلكم اياه ..
شيخة : ما حيدني يبت دريول انا
مايد : انا في خدمة الشعب يا امايه ..
شيخة : ف خدمة الكل الا امك ..
مايد : افا عليج يا بنت ضاحي .. جد طلبتي مني طلب ورديتج ؟؟!
شيخة : لا فديتك يا شيخ الشباب انته .. يعلني ما خلى منك
مايد لوى على امه : فديت امايه انا .. شو تبين امري تدللي
شيخة : ابا سلامتك يا ولدي

حس عبدالله بغيره بس حاول يطنش هالشعور

ريم : ابويه ابويه .. نبا نظهر باجر .. والله هالاسبوع ما ظهرنا
شيخة وهو تشوف عيال احمد: هيه اكيد ما بتظهرين هالاسبوع
ريم وهيه تحاول تلطف الجو : هيه اكيد الغاليات عدنا ف البيت .. فديت هنود وميرانه والله البيت منور بوجودكم
هند : تسلمين حبيبتي .. وان شاء الله ما نكون مثقلين عليكم خالو شيخه؟
شيخة وهيه تحيس بوزها : لا لا مب مثقلين
هند وميرة حسوا انه الرمسه من ورا خاطرها .. وهالشي حز ف خاطرهم بس طنشوا مهما كان هاي مرت عمهم ولازم يحترمونها
ريم : المهم ابويه شو قلت ..
حميد : أي مكان تبونه انا حاضر اوديكم له .. بس انتوا امروا
ريم : ها هنوده وميره وين تبون تسيرون ؟
هند : لا ريماني ما نبا نثقل عليكم ..
ريم : ويا ويهج .. مب مثقلين والله انكم خفاف ع القلب
هند : تسلمين
ريم : بابا نبا نسير بوظبي مول والمارينا .. نسير نتسوق شوي .. ونغير جو
حميد : مثل ما تبين .. بنسير المارينا وبوظبي مول
ريم : فديتك يابويه .. ما تقصر .. ها امايه بتين ؟ وانتي نوره ؟.
شيخة : لا شو يوديني .. سيري انتي وعيال عمج .. انا بظهر ويا نورة
ريم :خلاص برايكم
هدا الجو لدقايق .. وكان فيها عبدالله يشوف هند بطريقة مب طبيعية بس هيه ما لاحظت هالشي .. كانت جميله جميله جميله .. بس شو فايدة الجمال دام انه القلب مليان طمع .. كانت هاي وجهة نظر عبدالله
" ماعليه يا عيال الفقر .. انا براويكم .. بس خلني افكر بخطة اظفركم فيها .. و تنندمون على اللي يتوا عشانه"

قطع حبل افكاره صوت نورة
نورة : ميرة شحالج الحينه ..؟ ان شاء الله احسن ؟
الكل صد صوب نورة وهو مستغرب .. هيه طرحت سؤالها بشكل عادي بس المغزى كان غير .. وبدا الجميع يمرر نظراته بين ميرة وهند

ميرة ارتبكت وحست بنظرات الكل عليها .. حست انها تعرق معنها حاولت انه تبين طبيعيه ..: أ أ انا بخير ..
نورة : يلا زين زين .. نتمنالج التقدم المستمر .. وان شالله ما عليج شر
حميد بعصبية : نورة .. بس اسكتي بنت عمج ما فيها شي
نورة : انزين انا ما قلت شي .. سألتها عن احوالها .. ولا حرموا هالسؤال؟
حميد : نورة قلنالج بس .!
شيخة : حميد بنتك ما قالت شي .. ليش العصبية ..!
حميد : شيخه !
ميرة بعيون دامعه .. وقلوب م**ور :عن اذنكم بسير ارقد .. احس راسي يعورني

طلعت ميرة من الصالة .. وحميد توعد انه يأدب بنته على نغزاتها وانه يحطلها حد .. هند من صوبها تضايجت بس حاولت تبينلهم انه كل شي طبيعي .. وانه ميره صدق كانت تعبانه ..
هند : الحين بترقد وبيخف ويع الراس
حميد : الله يعافيها .. فديت ميرة ما تتحمل
هند : ماعليه عميه لا تحاتي ما بيصـ
عبدالله قاطعها : المهم ابويه .. انا بقطع الاجازة .. السنه مب ناوي اسافر .. واشوفني متملل ..
حميد انقهر من حركته بس طنش: برايك يا عبدالله سو اللي تباه ..
مايد : وانا يابويه باخذ اجازته شورايك ..الله يخليك وافق .. بس مليت من كثرة الشغل
حميد : عنبوك انته ما تشتغل الا شهرين وبعد تعبت!! . قلنالك ماشي اجازة لين شهر 8 .. تفهم ولا لآ
مايد : ابويه الله
حميد يقاطعه : بس جب ..
مايد : عشان خاطر هند بنت عميي .. الله يخليك
هند فتحت عينها ومسكت ضحكتها : انا ما يخصني عمي
حميد : بروحها البنت تبرت منك .. خلاص ماشي
مايد : امحق بنت عم يا هندوه

هند ضحكت على مايد اللي خذا عليهم بسرعه وهالشي كان مونسنها ..

حميد : هند ..؟
هند : نعم عمي ..
حميد : أنا ادري انه اللي صار الاسبوع اللي فات ضايجج .. والله انه خالد ما يهون عليي .. وانا وعدتج من قبل اني برجعه ... ومن باجر انا بنزل الشارجة وبراضيه وبخليه يرد البيت

هند: بس يا عمي انته ما غلطت عليه .. هو الغلطان .. وانا ابغيك تمسحها في ويهي هالمره.. واذا سمحتلي يا عمي انا بسير الشارجة و برمسه وباخذ بخاطره ... لاني عيزت وانا اتصل فيه بس ما يرد .. الظاهر انه مب عارف الرقم ..

حميد : خلاص انا باجر باخذج ويايه ونسيرله رباعه والله يكتب اللي فيه الخير ..

هند : وصدقني خالد طيب .. بس هو كان معصب عليي ساعتها عشان جيه سمعك كلام قوي ..
حميد : وانا عارف هالشي يا هند .. وخالد مثل ولدي ..
هند : فيك الخير يا عمي
شيخة : بس تشترط علييه يا حميد انه ما يسويلنا مشاكل في هالبيت... نحن طول حياتنا عايشين بهدوء وبيتنا هذا من سنين ما دخلته المشاكل ..

هند وميرة تضايجوا لانهم حسوا انه وجودهم عكر صفوة هالبيت..
حميد : لا تقولين هالكلام يا شيخة ... وولد اخويه عمره ما كان صاحب مشاكل ...
ريم : صدقه ابويه .. عيال عمي مثل الدوا ع الجرح ..
شيخة : جب انتي بس
ريم : ليش تسكتيني .. امايه دومج تكبتيني
شيخة : امحق عيال .. كل واحد منكم لسانه متر
ريم : فديتج يامايه خلاص اكبتيني .. بس لا تزعلين

لوت شيخه بوزها بضيج و سكتت

* * *
في الشارجة ..
عمر : فهمت عليي يا خالد ..
خالد : بس يا عمر والله صعبة ..!! أنا ما اتحمل الاهانة ... وبعدين افرض اني سرتله وقالي لا انا ما أبغي اشوف رقعة ويهك في هالبيت ..!!

عمر ابتسم بخبث : ساعتها بتستعمل سلاحك الثاني ..
خالد بحيرة : أي سلاح ....!!
عمر : خواتك ..!
خالد : بس خواتي من صفه ولا انته نسيت انه العلاقة اللي كانت من بينا انهدمت ..
عمر : بس ممكن تتصلح ..
خالد : كيف ..!!
عمر : اسمع يا خالد ... انته لازم توصل حق خواتك .. وتستمح منهم ... وتحسسهم انك غلطان و معترف بذنبك ... ومهما صار يتمون اخوانك وقلبهم عليك .. وعقب ما ت**بهم و تنال رضاهم وترد المياه لمجاريها .. تسير عند عمك و ترمسه بحضور خواتك .. وانا ما اقولك ذل عمرك حقه ..لا .. بس حسسه انك ما تروم تعيش بدون خواتك وهو بيفهم انك تبا ترد البيت .. و حسسه يا خالد انك بالرغم من انك عارف بكل سواياه الا انك راضي على هالوضع ...!

خالد تم يفكر بعمق .. منطق عمر مقبول .. وشوية ذل لعمه ما بيأثر ف شي .. وبالذات انه في النهاية بيوصل للي يبغيه

عمر : خالد؟
خالد وما زال يفكر : هممم
عمر : انته شو اللي تبا بالضبط ؟
خالد ابتسم بخبث : ابا انتقم يا عمر .. ابا اخلي عمي يندم على ما بدر منه في حق ابويه ..
عمر : كل ظني انك تبا البيزات
خالد ورفع حاجبه : اخر شي .. اخر شي يا عمر بنرمس عن البيزات ..
عمر : يعني على شو ناوي ؟
خالد : ناوي انهي عمي ..
عمر بخوف : بتجتله ؟
خالد : هه لا يا فالح .. لو بغيت اجتله جان سويتها من زمان .. بس انا بنتقم منه عن طريق احب شي لقلبه
عمر : البيزات ؟
خالد : لا .. عياله
عمر : خالد !! دخيلك لا تضر حد .. هم مالهم ذنب
خالد : عمر انته لازم تفكر ويايه .. انا ف بالي خطه بس مب واضحه .. ف بالي وايد اشياء يبالها ترتيب .. وانته لازم تساعدني
عمر : خالد انا مستحيل اضر حد
خالد : ضرر مؤقت يا عمر .. وعقبها بيرد الكل لحالته الطبيعيه ما عدا العم العزيز .. عمر .. انته لازم تساعدني .. لازم

عمر : انته ما تدري يا خالد ... يمكن يكون هو ناوي يردلكم الحلال ويا مرور الزمن ...
خالد بخبث : ومنو قالك اني بقبل بهالشي .. لا يا عمر .. عمي لازم يتعاقب .. وأكبر عقاب له ان ينفضح بيين اهل بيته وعربانه
عمر : والله انك خبيث يا خالد ...
خالد : وبتشوف شو بسوي ...
عمر: انته رد لبيت عمك ومن هناك بنبدا

خالد كان فعلا يكره عمه.. يكره كل شي في عمه وكل شخص اله خص بعمه .. كان يحس انهم حرام يتمون

* * *



* * *
في اليوم الثاني .. توجه حميد ويا بنت اخوه هند للشارجه بهدف انهم يراضون خالد و يستسمحون منه .. ويقنعونه انه يرد .. وهند حست انه اخوها بيعاند بس ان شاء الله بتقدر عليه هالمره

في بيت أحمد ..
يندق جرس البيت .. وما عدت دقيقتين الا وخالد في ويههم .. انصدم خالد من الزائرين الغير متوقعين .. واصلا هو كان ناوي يتصل ف هند ويراضيها .. بس هيه يت بريولها

خالد : هند !!
هند : هيه نعم اختك هند
حميد : شحالك يا خالد ؟
خالد طنش عمه وشاف هند : تفضلوا

تضايج حميد من هالحركه بس فضل السكوت ..

في الميلس :

هند : ماظنك يا خالد قادر تعيش في هالبيت بروحك ...!! ويا اخويه الكلام اللي بدر مني مب صحيح ..انا ساعتها ما كنت حاسه بعمري .. انا اكثر انسانه تعرف بطيبتك و حنيتك .. بس الشيطان لعب في مخي ساعتها .. دخيلك سامحني
صد خالد عنها وما رد عليها
هند : خالد .. دخيلك لا تعور قلبي .. خلاص انا اسفه .. والله قلبي مب متحمل اكثر
خالد استمر ف سكوته وكان يشوف المكتبه اللي مجابلتنه
هند : انزين شو تباني اسوي عشان ترضى .. قولي وصدقني بنفذ اللي تبا بس انته ترضى ..
خالد شافها بطرف عينه : شو المطلوب الحين ..؟؟
هند : انك ترجع ويانا ..!!
خالد : هه .. انتي تحلمين .!
هند : عيل نحن بنرد اهنيه
حميد : لا يا هند .. هذا ما عاد بيتج .. ولا صدقوني بزعل عليكم
هند : شو قلت خالد ؟
خالد شاف عمه : بس عمج ما يباني ..
حميد : لو كنت أباك جان ما ييتك للبيت
هند : ها يا خالد شو قلت!؟
سكت خالد وكان مبين عليه الضيج ..

هند : ليش سكتت يا خالد ..؟؟ وبعدين عمي الله يطول بعمره ما قصر علينا .. وقايم فينا جنه عياله .. وهو عمنا وأجربلنا من الغريب

خالد شاف هند بنظرةغريبه .. وحرك ايده بحركة عصبية وحطاها على ركبه
خالد : انا مابا منه شي
حميد : وانا اعترفلك اني غلطت في حقك يوم اني سبيتك .. بس امسحها في ويهي يا ولد اخويه .. وان شالله ما يصير خاطرك الا طيب ...
خالد تذكر كلام ربيعه عمر
خالد : ياما غلطت في حقنا يا عمي ..

هند فتحت عينها من كلام اخوها الغيرمنطقي .. بس حميد حس بنغزة وكان على وشك انه يرمس بس خالد سبقه
خالد : بس مع هذا انا ما بردكم .. وبرجع وياكم عشان خاطر خواتي ولاني انا المسؤول عنهم .. سمعت يا عمي .. انا المسؤول
حميد : النعم فيك والله ... وانا اوعدك اني اشغلك عندي .. سعرك بسعر عيال عمك .. واعتبرني مثل ابوك الله يرحمه

ابتسم خالد باستهزاء وفضل الصمت .......!!!

* * *
رجع خالد للبيت ويا اخته وعمه ..

واول ما وصل توجه لغرفته اليديدة ولحقته اخته هند ...

هند مبتسمه : واخيرا ...!! والله انك لك وحشه يا خالد
خالد : وانتوا اكثر يا هند وانتي تدرين اني مالي غنى عنكم ..
هند : أنا ادري ومتأكده من هالشي...وانا اسفه ع الكلام اللي قلته ..
خالد ابتسم : وانا اسف ع الكلام اللي قلته
هند بحنية : مقبول اعتذارك يا شيخ الشباب
خالد : قصورج بعد ما تقبيلينه
هند : ههههههه المهم يا خالد انا لي عندك طلبين
خالد : بعد !!
هند : احم اا ممكن يعني
خالد : ع حسب .. شو هم ..؟؟
هند : اول شي انا عارفه انك ما تحب عمي ولا عياله .. ويمكن من المستحيلات انك تحبهم في يوم وليله .. بس يا خالد حاول انك ما تحتك فيهم وايد ... لين ما تحس انه قلبك صفى من ناحيتهم ...
خالد : انزين وثاني طلب ...؟؟
هند : أختك ميرة ..محتاجه انها تحس باهتمامك فيها عشان تزول كل الحواجز اللي انبنت من بينكم
ابتسم خالد : وهالشي انا مفكر فيه ..
هند : شو ناوي تسوي ؟؟
خالد : ممكن توديني عندها ...؟؟
هند : ممكنين ...
خالد : يلا قمنا
هند : بس لا تتوقع انها تسامحك بسرعه يعني خذ وعطي وياها لين ما تحس انها استجابت
خالد : اوكي .. أي اوامر ثانيه انسه هند ..؟؟
هند : ممممممم نو
خالد : وحليلج انتي
هند : يلا مشينا

طلعت هند ووراها خالد من الغرفة وتوجهوا ناحية غرفة هند و ميرة .. وفضل خالد انه يدخل بروحه .. دق الباب وما انتظر أي رد .. دخل خالد الغرفة وتم يدور اخته و حصلها ف البلكونة ...

خالد : شويسوي الحلو برع؟
ميرة نقزت من الخوف ويوم شافت خالد تغير لون ويهها وبانت عليها ملامح الخوف ...: انته شو تبغي مني ..!!
خالد ابتسم : انا اخوج يا ميرة ولا نسيتي ... ومهما صار نحن مالنا غنى عن بعض ...!! وانا ياي اعتذرلج .. لاني غلطت بحقج ساعتها .. وانا ادري انه قلبج كبير و بيسامحني ..
ميرة بخوف اكبر : مابغي اعتذارك .. وخلني بروحي
ركضت ميرة ودخلت داخل الغرفة من بعد ما كانت في البلكونه
خالد مسكها من ايدها : يا ميرة انا تعذبت من ورا اللي صار ..وصدقيني انا حسيت بغلطتي وياي اصلح كل شي ..!

ميرة بصوت يرتجف : هدني ..
خالد : ميرة انا اخوج .. اخوج خالد اللي ياما تعبت عشانج انتي واختج واخوج .. لا تنسين كل اللي بينا عشان موقف .. والله لو يرد في زمن ما خليتج ولا لحظه بروحج .. سامحيني يا ميرة .. دخيلج سامحني ... يلا لا تأخرين الشيخ خالد ..
ميرة وهيه تصرخ : هدني اقولك

خالد ابتسم وسحب ميرة للبلكونه وبند الباب : ما بهدج شو بتسوين ..!

ميرة مر جدامها شريط اسوأ حادثة تعرضت لها .. حست انه اللي جدامها مب خالد .. اللي جدامها هو نفس الريال اللي حاول انه يعتدي عليها .. يودها من ايدها وسحبها لداخل الغرفة بند الباب ... نفس الاحداث تكررت الحين ...

صرخت ميرة بأعلى صوتها : هند ...
***

في المستشفى ..

الدكتورة : ان شالله مافيها الا العافية .. بس هي لازم اتم في المستشفى على ما تستقر حالتها ..
خالد : يعني هي بخير ... الله يخليج لا تخبين عنا شي..
الدكتورة ابتسمت : اطمن ياخوي مافيها شي.. انتوا بامكانكم تردون البيت الحين .. لانها بتم تحت تأثير البنج ع الاقل 6 ساعات ..
خالد : مشكورة ..

صد خالد صوب عمه اللي كان واقف حذاله ..
حميد : يالله يا خالد ..
خالد نزل راسه وما رد على عمه ..
حميد : ما سمعت رمسة الدكتورة يعني ماله داعي انك اتم ..

خالد مشى جدام عمه .. كان متضايج من الخاطر .. ليش كل حاول يصلح شي .. هدم شي ثاني .. !!


في البيت ...

دخل حميد البيت ..
هند : طمني يا عمي شحال ميرة ..؟؟
حميد : اطمني يا هند .. ميرة ما فيها الا العافية ..
هند : عيل وينها عنك ... ليش ما يبتوها .. ووين خالد ؟؟
حميد : ميرة اليوم بتتنوم في المستشفى بس عسب تكون تحت الملاحظة ..
هند : وخالد ..؟؟
حميد : خالد يوم وصلنا ركب سيارته وسار .. عقولته متواعد ويا واحد من الربع .. انا بسير غرفتيه

شيخة : شو اللي ياها ... ليش تعبت ..؟؟
هند : مادري ..
نورة : لا تحاولين تتسترين على أخوج ..؟
هند فتحت عيونها : أنا ما اتستر على حد ..
نورة : أختج من يت وهي الحمدلله عال العال .. بس من شافت اخوج انجلب حالها ..
هند : هذا اخوها مثل ما هو اخويه .. وبعدين خالد مب شري مثل ما انتي متصورة ..
نورة : تعالي اضربيني بعد ...
هند قامت : عن اذنكم ..
طلعت هند من الصالة وهي متضايجة من أسلوب نورة ..
ريم : يعني ارتحتي الحين ..!!
نورة : هي ارتحت ... مادري شو شايفه عمرها هالهند .. حشى كل ما قلنا شي تضايجت ..!!
ريم : يعني اللي قلتيه مول ما يضايج ..!!
نورة : لا ما يضايج .. انا ما جذبت ..
ريم : الله يهديج بس ..
شيخة : وانتي دوم واقفة وياهم .. مادري شو مسوين فيج .. اخاف الا ساحرينج ؟؟
ريم : شو هالرمسة يا امايه .. شو ساحريني وما ساحريني ..!!
شيخة : وبديتي ترفعين صوتج عليه يا بنت حميد .. هذا اللي تعلمتيه منهم ..
ريم سارت يلست حذال امها وباستها فوق راسها : السموحة يا الغالية ما كنت أقصد ...
شيخة : اسمعيني يا ريم ..انا مب عايبتني يلستج الزايدة وياهم ..
ريم : امايه يعني هم عايشين ويانا في نفس البيت وما تبيني ايلس وياهم !!
شيخة : ايلسي وياهم بوجودنا .. مب تسيرن تتخششن في الغرفة ومحد يدريبكم شو تقولون وشو تخربطون ..
ريم : يا امايه يعني نحن شو نقول ..!! سوالف عادية .. بس ولا يهمج بسحب نورة ويايه يوم بعزم اني ايلس وياهم
نورة : لا اختيييه ... ما فيني ع المغثة هالناس ما وراهم الا الحزن والمصايب ..
ريم : حرام عليج ..
نورة : انتي كم دافعيلج عسب تتدافعين عنهم .. ولا الاستاذ خالد معطنج كم كف عسب تسكتين .!
ريم : ما برد عليج ..
نورة : لانه ما عندج حجة ..
ريم : لا بس لاني ماحط عقلي في عقلج ..
شيخة : احترمي اختج العودة ..
ريم وقفت : غلطنا ومنكم السماح .. ممكن أسير غرفتي عسب اتلبس لاني بسير عند علاية ..
شيخة : سيري بس لا تطولين عند علاية ..
ريم بضيج : ان شالله ..

ريم صعدت الدري وهي تتحرطم : اف شو هالعيشة .. اوامر في اوامر .. حشا حتى يوم بكح لازم استئذن .. اف اف اف
مايد ساعتها كان نازل من الدري .. وشافها وهي ترمس عمرها
مايد :"حوه حوه .. اللهم سكنهم في مساكنهم ..!! يالخبلة انتي منو ترمسين ..!! "
ريم ضحكت على عمرها : ارمس عمري حرام ...!!!
مايد تم يحب ايده من ورى و جدام : الحمدلله على نعمة العقل ... اللهم لا اعتراض ..
ريم : والله قهر .. تخيل عاد ما يبوني ايلس ويا بنات عمي ..!!
مايد : منو هم ..؟؟
ريم : أمك واختك ..
مايد : أمج وا ختج ..!! ليش عاد .. شو سووا عيال عمي ..
ريم : علمي علمك ..
مايد : خل عنج .. أمج تستعبط ..
ريم : ميود تأدب ..
مايد : هههههه انزين شو رايج نظهر ..!!
ريم : والله ..!!
مايد : هي ولا ما تبين .. خلاص على هواج ... مع السلامة ..
ريم : اصبر اصبر ... بسير بسير .. انا اول شي كنت مخططة اسير بنت عليوه بس لاحقة عليها ...
مايد : و بنت عمج ..
ريم ابتسمت : شو رايك ناخذها ويانا .. وناخذ علاوي و شما ونسير نلعبهم ..
مايد : وازقري بنت الييران بعد .. وبنت المزارع .. ولا تنسين عيال الدريول ..
ريم : ههههههه .. انزين شو بيستوي عليك ..!!
مايد : انزين ما عندي مانع .. بس يمكن بنت عمج ما تقتنع ..
ريم : خلها عليي أنا بقنعها ..
مايد : اوكي انا يالس تحت .. متى ما تخلصين انزلي ..
ريم : اوكككي ..
مايد : شوي شوي عالكاف ..
ريم : هههههههههههه ماصخ ..

دخلت ريم الغرفة اللي كانت يالسة فيها هند ويا علاوي وشمامي ..
ريم : هنوده قولي تم ..
هند : هههههههه أخاف أقول وعقب ابتلش ..
ريم : لا .. بس انتي قولي تم ..
هند : تم ..
ريم : يالله البسي عباتج ..
هند طرطرت عيونها : ليش ان شالله .!!
ريم : بنظهر ..
هند : وين بنسير ..!!
ريم : مادري .. ميود بيظهرنا ..
هند : لا .. لا فشلة ..
ريم : ميود أصغر عنج .. يعني مثل أخوج الصغير ..
هند : أدري .. بس انا استحي
ريم : يالله عاد هند بلا مصاخة .. وبعدين حرام عليج .. علاوي ما ظهر من زمان .. بناخذه هو وشمامي ويانا ..
هند : مممممم .. بفكر ..
ريم سحبت هند من ايدها : يالله عاد ..
هند : هههههههه اوكي بس على شرط ...
ريم : واللي هو ..؟
هند : نرجع بسرعه ..
ريم : ما طلبتي .. يالله بسرعه تلبسي عسب ما نتأخر على مايد..

لبست ريم بسرعه و نزلت عند مايد اللي كان يالس ويا امه واخته في الصالة
ريم : ميود .. وافقت ...
مايد : والله ..!! منها المال والعيال ..
شيخة : منو هاي اللي وافقت ..؟؟
مايد : بصراحة يا امايه أنا أبا اعترف لج بشي .. انا خطبت من وراج .. وبما انها وافقت .. فأنا مضطر اني اقولج ..
شيخة : ميود ..!!
مايد : بلاج تصرخين ...!! يا امايه نحن في زمن الديموقراطيه والحريه .. وانا شفتها مناسبه لي وخطبتها ..والسموحه
شيخة : انته من صدقك ؟؟؟؟
مايد : هههههه طاع ويهها كيف استوى .. اطمني اطمني .. بس انا نويت اظهر ريم وهند والصغاريه ..
شيخة : ما حيدك دريول حقهم ..!
مايد : لا مب دريول .. بس انا بخاطري اني اظهرهم عندج مانع ..!!
شيخة بقهر واضح : لا ..
مايد : فديتج يالغلا .. أقول ريمو انا في السيارة ..
ريم : ثواني و نكون عندك

نهاية الجزء التاسع

يسلمك ياالغاليه ماقصرتي .. واعذريني عن غيابي الايام اللي فاتت ..

وبانتظار على احر من الجمر الجزء الجديد ..