الجزء الرابع عشر

مغمض عينه بالقو .. حاس بغصة من الموقف اللي صار اليوم .. اهانة وضرب وتجريح ونظرات تأنيب .. كل هالامور بغيضة عند خالد .. ونفسه ما ترضاها .. اللي صار اليوم بيكون بمثابة نقله في تفكير خالد .. خالد اللي ممكن يبيع الكل عشان كرامته .. اليوم تنداس ومن خصمه اللدود .. عمه ضربه على مرأى من الجميع .. وبدون سبب يذكر .. وهالشي بحد ذاته جريمه في عين خالد ..

حط خالد ايده ورا راسه ونفخ بالقو .. حس انه مب يالس يجدم بسرعه في خطته .. كل شي يمشي بالبطئ .. بطئ شديد .. ما يدري هو خوف ولا تريث .. بس خوف من شو ..؟؟ من شي مجهول .. شي في هالبيت يخوفه ..

تم خالد يتأمل السقف ويتذكر طابور المسبات اللي انفرت عليه اليوم ..

" الله لا يخليني اذا ما بهدلتك يا عمي .. والله وانا حلفت لتدفع ثمن كل شي .. وحقي باخذه من عيونك .. بس مب قبل ما اشوفك منهار .. مب عقب ما اخليك تشك بكل اللي حولك .. حتى اقرب الناس لك .. بيي اليوم اللي تشوفني فيه فووق واشوفك تحت ريلي وساعتها بيي دور الفلوس .. وبسحب منك كل بيزة خذتها .. مثل ما ينسحب الدم من ايدك .. "

ابتسم خالد للحوار الداخلي اللي صار من شوي .. وحس بشوية تفائل قطع عليه حبل تفكيره صوت الموبايل ..

بس هو ما رد عليه وطنشاه .. حس انه ماله بارض يرمس حد .. وهذا اكيد عمر .. محد غيره ممكن يتصل فهالوقت .. وعمر لاحقين عليه .. بنخبره بكل شي باجر مع مسح بعض الحقائق ..

سكت الموبايل ورد خالد حق افكاره ..

" نورة وريم بدينا فيهم ..وبتطيح كل وحده منهم في قصة حب خربوطية .. ونهايتها معروفه .. باجي عبدالله ومايد ..مممم .. مايد امره سهل .. ما يهش وى ينش .. بس عبدالله غامض بالنسبه لي ... مادري بشو يفكر ... احس انه مب طبيعي من يوم شفته هاك اليوم .. بس ماعليه بنرسمله خطه محترمه ..اوكيه منو بعد .. هيه شما ..لالا .. شما نطلعها من الحسبه حرام هاي ياهل .."يا حنون" .. ممم منو تم ؟ هيييييييييه عيوز النار .. بس هاي صدمتها من صدمة ريلها .. ماعليه اذا حصلنا شي بنسويه شو المانع ..؟ كله واحد

.. احس اني بطيء وايد .. بس ماعليه اهم شي اني بوصل حق اللي اباه في نهاية الموضوع .. وبشوف نهاية البطل =)"

رن الموبايل مرة ثانيه .. وهالمره رفعه خالد وشاف رقم غريب .. بس بعد الرقم لفت نظره كأنه شايفنه من قبل ..

رد خالد ع الموبايل عشان يشوف اخرتها ويا هالارقام الغريبة ا

خالد : نعم ..
.... : مرحبا عزيزي
خالد اعتفس ويهه .. هذا نفس الريال اللي رمساه هاك اليوم : اهلا ..خير؟
....: الخير بويهك طال عمرك
خالد : شو تبغي متصل ف انصاف الليالي .؟
....: ولهت على حسك .. من كم يوم اتصل وما ترد
خالد : وليش ارد ؟
....: انا ممكن افيدك وايد
خالد : بشو بتفديني ..؟
....: في أي شي .. وماظن انه انته وايد عندك مخططات تبا توصللها ..
خالد : هالشي من خصوصياتي .. انته شلك .!؟
....: حاب اساعد
خالد : ومنو طرشك ؟
....: محد طرشني .. عمل الخير ما يحتاي توصيه
خالد : هه الخير !! أي خير هذا اللي بيي من وراك ؟
....: الخير اللي بيحل عليك
خالد عقد حواجبه : عن شو ترمس انته !
....: انا فاهمنك عدل يالغالي .. وادري شو اللي تبا توصله ..
استغرب خالد من المتصل وكيف انه واثق من عمره و قرر يسايسه : اها .. وشو اللي تعرفه يا اينشتاين زمانك ؟
.... : اعرف انك تحب الفلوس
خالد ضحك : ههههه وفي حد ما يحب الفلوس ؟
.... : في ناس يحبون الفلوس بس ما يركضون وراها .. وفي ناس مستعدين يبييعون اهلهم عشانها ..
خالد : يا سلالالالام .. ابدعت صراحه .. عاد هزرك انا من أي نوع ؟
....: من الثاني يطولي بعمرك
خالد : هه يا واثق .. عموما حلل ع كيفك .. تحليلاتك ما تهمني .. وانت بعد ما تهمني ..
.... : تبا حلال عمك ؟
خالد اعتدل في يلسته واختبص : انته عن شو ترمس .. وبعدين انته منو ؟
....: احلفلك بالله اني بعيد عنك كل البعد
خالد : شوف يالاخو .. انا مالي بارض لناس سخيفه مثلك .. ومساعداتك خلها حق اللي يحتاجونها .. وانا لو بغيت الشي بسويه .. وما بنتظر حد يساعدني .. عندي مخ يعادل اضعاف مخك .. ومالي بحايه لك .. مع احترامي يعني ..

بند خالد التيلفون ع ويه المتصل .. وتم معصب .. هاي ثاني مره يحس بهالاحساس .. يحس انه يلعب ع المكشوف .. بس منو ممكن يكشفه .. كل خططه يرسمها عند عمر .. معقوله يكون هو !! .. لا لا اكيد لا .. عمر مب خوان .. عمر ربيع عمري .. بس الحذر واجب ..

خالد تم يهز راسه وكأنه يبا يطلع الفكره

" لا عمر ما يسويها .. امنته ع سري .. لا مستحيل يخونني .. هذا ربيعي .. يا ربي انا شو أألف .. الحذر واجب وانا لازم اشوف الموضوع "

وصله حزتها مسج .. وعلى طول رفع الموبايل .. واستغرب يوم عرف انه من ريم

" خالد .. ممكن ارمسك شوي تحت "

خالد استغرب من جرأة ريم .. شكلها ابد ما يوحي .. هو من نفسه يستحي يرمسها بروحه .. فكيف هيه تتجرأ .. شو اللي تبغيه ريم .. وليش هيه بايعه عمرها لهالدرجه .. معقوله تكون حبته صدق .. استانس خالد للفكره .. وقال ف نفسه

" مستعيله ع رزقها الحلوه.. خلاص بنشوفج يا ريم .. بس مب تحت .. اهنييه "

رد عليها مسج ..

" انا تعبان .. تعالي الغرفه اذا ماعليج امر "

ركض خالد صوب غرفة الملابس ولبس بجامته ع السريع وعدل شعره وتعطر ..وشاف عمره بالمنظره ..

" أي ده الجمال ده كلوو "

ريم ما يت للحين .. شكلها تفكر .. بس اخرتها بتي .. تم خالد يفكر بالشي اللي يخلي ريم تطلب انها ترمسه .. يمكن تعترفله بمشاعرها الصادقه .. وهذا المطلوب .. أو يمكن تبا تسولف .." وايد متأمل "

وفعلا اندق الباب ف حينها ..
و ابتسم خالد من خاطره وسار صوب الباب .. بس قبل ما يفتحه عقد حواجبه ومثل دور المعصب ..

فتح الباب وتم يشوف ريم .. اللي استحت يوم شافته واختبصت وما عرفت شو تقول ..أصلا شكلها ف هالمكان من الاساس غلط

ريم منزله راسها وتحس انه الدم متيمع في ويهها : خ .. خالد انا ..
خالد : تفضلي ..
ريم : لالا .. ماله داعي
خالد : ولو ..!! انا ولد عمج وما باكلج ..
ريم : لا صدق خالد ما يحتاي..
خالد : لا في داعي ..

خالد هد الباب وسار صوب الشبريه يلس عليها .. وهالشي اضطر ريم انها تدش داخل الغرفة خطوتين ..

خالد بابتسامة صفرا : بندي الباب لو سمحتي ..
ريم بخوف : ل ليش؟

خالد وقف وسار صوب ريم ووقف جداها
خالد : لا تخافين يا ريم .. انا خالد ..
ريم : مــ مب خايفة بس شكلنا غلط اهنييه .. وانا اصلا مب مطوله بس بقولك كلمتين ..
خالد : أفضل يكونن على انفراد ..

بند الباب..وعقب رد شبريته ..

ريم والخوف واضح :أأ انا مب خايفه .. بس صدق الموضوع ما يستاهل .. انا بس كنت بطمن عليك .. وبعتذرلك

خالد حط ايده ورا راسه و تم يشوفها بغموض ..: تعتذرين ..!
ريم : هيه ..
خالد : على شو ؟
ريم : ع اللي صار اليوم ..
خالد : اهاا .. لا بس انتي مالج ذنب ..!
ريم : ولو .. حبيت اسوي الواجب ..
خالد : وقفتج ويايه كم تسوى
ابتسمت ريم : انا ويا الحق يا خالد ..
خالد : حتى لو كان الحق عند غير ابوج ؟
ريم : كيف يعني ..
خالد : لا طنشي .. بس ماله داعي تعتذرين انتي ما سويتي شي ..

ابتسم ريم ونزلت راسها

خالد ابتسم وقرر انه يتمادى شوي .. : ريم .. رفعي راسج شوي ..

ريم فعلا رفعته بس عينها ع الارض ..

خالد ضحك ف خاطره على ريم اللي لاعبه الدور مثل ما يبا : ريم شوفيني ..

ريم حطت عينها في عينه .. وشافت ابتسامته اللي تريح النفس .. وخالد بالمقابل رفع حاجبه بمكر وقال

خالد : احس انج تحمليلي مشاعر خاصه

ريم ردت نزلت راسها : ها ..!

خالد : شو هو اللي " ها "
ريم: ك كيف يعني ..؟

خالد غمزلها : مادري .. بس جيه احس ..

ريم بخجل : انته تقرا افكار غيرك
خالد : لا بالعكس .. انا افهم لغة العيون ..

ريم اكتفت بابتسامه .. حست انه الدم تيمع في ويهها
خالد : على فكرة مشاعرج تشبه مشاعري ..ماله داعي تستحين .. الانسان اصلا كتله من المشاعر ,, " استانس على كتله .. ما جد استخدم هالعبارات "

ريم وحست بخجل فظيع وفرحه غامره : خ خالد .. انا لازم اسير .. عن اذنك ..

خالد : لحظة يا ريم ..

ريم وقفت وعطته ظهرها بدون ما تصد .. كانت مستحيه من الخاطر ونظرات خالد جريئه

خالد: ممكن اسأل سؤال ؟
ريم: اكيد ..
خالد : مب متعود اسأل حد وهو صاد عني ..يا تصدين او ما له حايه السؤال

عدلت ريم من وضعها بس تمت تشوف الارض ..

خالد : ليش كنتي زعلانه من يومين ..؟
ريم ارتبكت : ها ..
خالد : وعينج كانت تدمع بعد
ريم : لا ماشي بس صارت مشكله بيني وبين ربيعتي وكنت متضايجه شوي ..
خالد : عليا ؟
ريم فتحت عينها ع الاخير .. : كيف عرفتها .؟
خالد ابتسم : لا تخافين ما ارمسها ..
ريم بنظرة ترجي ..: خالد كيف عرفتها ..؟
خالد : ممم جني لمحتها كذا مره ف البيت
ريم : بس شفتها ؟
خالد : لا .. لمحتها ما شفتها
ريم نزلت راسه بضيج: هيه .. تضاربت ويا علايه
خالد : ممكن اعرف شو السبب ..؟
ريم وحاسه بارتباك : ممم لا سبب عادي ..
خالد : شو هو السبب العادي ؟
ريم : ماشي بس كانت تظن اني ..
خالد : انج ؟
ريم : خالد السالفة صدق ما تسوى
خالد : ابا اعرف السالفه .. وبدون أي مسح للحقائق. .
ريم وتحت التأثير القوي لخالد قالت : كانت تقول اني وايد ارمس عن شخص معين وهيه ما عيبها هالشي ..
خالد : اها .. وليش ما عيبها ؟
ريم : مادري .. يمكن هيه تكنله مشاعر خاصه .. وانا هاللي حسيته ..
خالد : منو هالشخص .. ؟
ريم :.. لا ماشي .. خالد لازم اسير الغرفه ..

تحركت ريم ويوم وصلت عند الباب قالها خالد : ربيعتج هاي ما تسواج يا ريم .. طنشيها اخرتها بترد ..
بندت ريم الباب وحست انه قلبها بيظهر من مكانه .. ركضت ريم وماتدري شو اللي خلاها تركض .. بس فجأة اصطدمت في شخص خلاها تطيح ع الارض..

***
غرفة نورة ..

تهللت الاسارير .. وارتسمت البسمة على ويه نورة عقب ما رن التيلفون معلن عن موعد سماع صوت خليفة الدخيل اليديد ..

نورة قررت انها تسمعه وتقضي وقت وياه .. قنعت عمرها انها مب سلعة رخيصه وانها مستحيل تخليه يتجاوز حدوده وياها .. وقالت مجرد لعبه ويوم بمل منها بفرها .. وما كانت تدري انه خليفة هو نفسه عمر ربيع خالد الروح بالروح و جناحه الايمن والايسر .. وانها دخلت في شباك الخطه

نورة بدلع : ألو ؟
خليفة : هلا والله بناعم الصوت .. هلا بنور العين
نورة ضحكت بصوت عالي: خلصت مجاملاتك ؟
خليفة : مجاملات !! .. أفا يا نورة .. تسمين مشاعري مجاملات .. الله يسامحج
نورة : وتعرف تزعل بعد !!
خليفه : وليش انا مب انسان ..؟
نورة : المهم خلصنا .. شحالك ؟
خليفة : انا متعذب .. والعذاب كلمة جليله ع اللي احس فيه ..
نورة : يا ويل حالي .. وليش عاد ؟
خليفة : يوم تحب انسان وتحس انه ما يقدر مشاعرك اكيد بتحس بهالشي ..
نورة حست بتأنيب الضمير : ومنو الشخص المقصود ..؟
خليفة : خليها على الله .. المهم وينج اتصلت بج فوق ال3 مرات خلال اليوم .. وما رديتي عليي..
نورة : ما كان فيني ارد
خليفة : اها .. خلاص عيل برايج بخليج ..
نورة : اندوكم انتوا .. صدّق الريال .. كنت اسولف ..
خليفه استانس : فديتج انتي
نورة : حدودك يا خليفه .. خلنا بعيد عن الخطوط الحمرا
خليفة : حاضر يا انستي الصغيره
نورة و حز ف خاطرها : ومنو قالك اني انسه ...
خليفة " عمر اختبص": ههههه ادريبج تبين تتهربين من السؤال .. قوليلي ليش ما ردييتي ؟
نورة : كانت مستويه عدنا سالفة .. وانشغلت فيها ..
خليفة : شو مستوي ؟ خير ان شالله ؟؟ طمنيني نورة
نورة : لا سالفة ما تسوى
خليفة : كل شي يخصج يسوى
نورة استانست : انته ترمس جد ولا تقص علييه ؟
خليفة : انتي ليش ما تبين تصدقين ..؟
نورة : لاني ماصدق انه في مشاعر تتولد بهالطريقة
خليفة : مشاعر الانسان يا نورة غريبة .. ما تعرفين على منو تصفى ف النهايه .. بس انا متأكد انها اختارتج انتي ..
نورة : اموت واعرف منو هاي اللي خبرتك عني
خليفة : وحده امها راضيه عليها .. ووحده تبالي الخير
نورة : بس انته ما تعرف عني ولا شي .. غير اسمي على ماظن
خليفة : صح ماعرف غير اسمج .. وادري انج ما بتخبريني عن شي زياده .. وهذا من حقج .. بس اعرفي اني مب ناوي على شر .. وانج في نظري الانسانه اللي مستحيل اضرها
نورة ابتسمت وما ردت
خليفة : نورة انتي ويايه ..؟
نورة : وياك يا خليفة ..
خليفه : تعرفين انج اول مره تنطقين باسمي ..!
نورة : صدق ..!! ما لاحظت
خليفة : الله يا نورة .. ما تصدقين شكثر انا مستانس اليوم ..
نورة : ان شالله دوم
خليفة : خبريني نورة شو مستوي اليوم في بيتكم ..
نورة : ماشي .. بس ولد عمي كان طلع ويا اختي وضيعها .. ويوم رد البيت و عرف ابويه طاح فيه سب وضرب .. وعقب ظهر ورد يدورها مرة ثانيه وحصلها .. وهاي الخلاصه

عمر تم مستغرب .. خالد ما خبراه يعني عن هالشي ..!!
خليفة : وضحيلي اكثر .. ولد عمج شو يسوي في بيتكم ؟
نورة : ولد عمي يسكن عدنا ف البيت ... هو وخواته .. توفى ابوهم فانتقلوا وسكنوا اهنييه
خليفة : هييييه .. عيل اليوم ابوج ضرب ولد عمج ..!! وشو كانت ردة فعله ؟
نورة : ممممم ماشي دش غرفته ومنها ما شفته
خليفة : هو تعمد يضيعها يعني ..!!
نورة ضحكت : هههههه اكيد لا .. بس ابويه ما ينلام هذي بنته .. وولد عمي طبعه شري ..
خليفة : كيف يعني شري ..؟
نورة : يعني شكله مب ناوي على خير ..وبعدين بنقضي طول الليل نرمس عن ولد عمي ..!!
خليفة : لا لا لا .. بنرمس عن اللي تبينه .. بس انتي ترضين

ابتسم نورة وحست بصدق خليفة
***
" انتي شو تسوين اهنييه ! ..؟؟ "
ريم والخوف يتطاير من عينها وكانت تتطالع اللي جدامها باستغراب وخوف وارتباك
ريم : أنا .. انا ما ما كنت اسوي شي .. !
حميد : كيف ما تسوين شي ..!! انتي تعرفين الساعه كم الحين ..!!
ريم بخوف واضح : ابويه صدقني انا ما كنت
قاطعها حميد : ريموه ..!! القسم هذا ما فيه غير غرفة وحده
ريم فتحت عينها وحطت ايدها على حلجها : ابويه انته شو تقصد .!؟
يودها حميد من ايدها : انتي يايه من غرفة خالد ..!!!!!!
شهقت ريم بصوت عالي : لا لا يابويه .. انته شو تقول ..!! انا كنت
حميد وهو يحاول ايود عمره : كنتي شو ..!!
ريم ترتجف : كنت أدور ساعتي ..
حميد : تدورين ساعتج اهنييه ..! وبعدين هاي اللي ف ايدج شو ..!!
ريم : ا ابويه افهمني .. انا عطيت الساعه علاوي كان يبا يلعب فيها .. وعقب ضيعها .. ونجلت البيت كله وما حصلتها .. قلت يمكن قبل ما يظهر ويا اخوه .. وحصلتها اهنيه عند هالممر
حميد تم يشوفها بشك : ريم .. انتي ما تعودتي تجذبين ..
ريم وهيه تشوف ابوها وتحاول تمثل دور الصامده : ابويه صدقني .. انا بنتك وتربيتك .. يعني مستحيل اسوي اللي ف بالك يا بويه
حميد هد ايدها وصدقها : اسمحيلي يا بنتي .. اعصابي مشدوده ع الاخير .. ومب رايم ارقد
ريم وهيه تاخذ انفاسها : خير يابويه ..؟! شو مستوي ..!؟

حميد مشى شوي ودش للغرفة الصغيرة اللي كانوا معتبرينها صالة تلفزيون وريم لحقته
حميد : كل ما ييت اغمض عيني .. يظهرلي خالد ..!
ريم حست بالارتباك يوم سمعت باسمه : خــ .. خير يابويه!
حميد : كل ما غمضت عيني تراوتي نظرته لي اليوم .. نظرة ما تنوصف يا ريم .. ما تنوصف

حط حميد ايده على ويهه وكان صدق مهموم .. ريم اول مره تشوف ابوها بهالحزن والضيج . وكان صدق منقهر ومتغصص من خالد وتعامله وياه .. حنت ريم لابوها .. ابوها اللي ما قصر بحياته لا عليهم ولا على عيال عمها .. ليش يعامله خالد بهالطريقة .. شو سر الحقد اللي متولد في قلبه ..!

ريم : ابويه .. قول اللي ف خاطرك ..
حميد رفع راسه وتم يشوف ريم : نظرات حقد وكره يا ريم .. حسيت للحظة انه خالد يبا ينتقم مني ..
ريم خافت من الفكرة : ينتقم ..!
حميد : هيه ينتقم .. يبا يذلني .. يبا يحقرني .. ماعرف كيف اشرحلج .. بس خالد مب ناوي على خير .. نظرته تفسر كل شي ..
ريم : ابويه ينتقم من شو .!!

حميد نزل راسه .. سؤال ريم ياه ف الصميم .. هالسؤال طول حياته يحاول يتجنبه .. يحاول يتفاداه .. اذا جاوب عليه بيكون فضح عمره ..

حميد : يا ليتني اعرف

اكتفى بهالاجابة .. تمت ريم تشوف ابوها اللي في ويهه مليون شعور و احساس .. اللي جدامها انسان مهموم و مغموم .. ريم حطت ايدها على جتف ابوها ..
ريم : اكسبه ف صفك يا بويه .. خالد طيب صدقني ..
حميد تم يشوف الارض : لا يا ريم .. لا تنخدعين بالظاهر .. خالد غامض لابعد الحدود .. وخوفي انه مشاعره كلها تكون عكسيه ..
ريم زاد خوفها من افكار ابوها : كيف يعني عكسيه ..!!
حميد شاف بنته وابتسم : عليج ببنات عمج ولا تشغلين عمرج في خالد .. خله يعيش حياته بروحه .. انا ابغي احميكم منه .. مابا حد يتمشكل وياه . .. او يعطيه فرصه انه يمسك عليه شي ..

ريم ارتبكت ..ابوها شو يقصد وشو اللي يبا يوصلله .. : على امرك يابويه ..على امرك ..
حميد وقف : يلا سيري ارقدي .. وانا بعد بسير ..
ريم : تصبح على خير ..
حميد : وانتي من اهل الخير ..

مشى حميد بالبطئ وتمت ريم تشوفه .. شوي شوي اختفى خيال ابوها وسمعت صوت صكة الباب .. ريم انسدحت ع القنفة وتمت تشوف السقف .. تشوفه بنظرات حزينه ومتربكة وخايفة ..
حزينه لانها جذبت على ابوها ..

مرتبكة .. من كلام ابوها المبهم .. واللي يتنبأ بوجود خطر يحيط ف العايله مصدره خالد
و خايفة من تحقق هالكلام .. خايفة انها تنصدم من الانسان الوحيد اللي تعلقت فيه .. خايفه انه يكون مكار ويلعب بمشاعرها ..

انجلب ريم وخشت ويهها في المخده ويلست تصيح بصمت ..

" سامحني يابويه جذبت عليك ..سامحني بس خفت .. وكيف ما بخاف وانا اللي سويته مليون بالميه غلط .. كيف رخصت عمري بهالطريقة ..! كيف سرتله لين غرفته ..!! يمكن هو كان يختبرني وانا فشلت ف الاختبار .. يا ربي انا شو سويت ..!! .. سامحني يا بويه .. سامحني بس وعد ماكررها .. "

***
يوم الجمعة .. قبل الصلاة ..

في غرفة حميد وشيخة

عبدالله بدا يفكر بألف طريقة و طريقة توصله لهند .. قبل ما ياخذها هالراشد .. فكر بكذا طريقة .. وقرر انه يمشي خطوة خطوة .. واول خطوة عنوانها " السابقون السابقون "

شيخة : اسمعني يا عبدالله يوز عن خبالك هذا ...
عبدالله : شوفي عاد يا امايه غير هالرمسة ماعندي .. وغير هالبنت ما بغي ..
حميد : وشوفيها بنت أحمد يا شيخة ... الكل يتمناها
شيخة : بس انا ما احبها ما اطيقها ...
عبدالله : انا اللي بتزوجها يا امايه مب انتي ..
شيخة : يا عبدالله انا كم مرة قتلك علاية بنت عبدالرحمن ربيعة ريمو .. هاي بنت ناس وعز .. مب هند .. !!
عبدالله : مابغي عليا .. وايد صغيرة ..
شيخة : وهند وايد كبيرة ....
عبدالله : بيني وبينها سنة ... يعني سنها مناسب ..
حميد : يا شيخة هو يبغي البنت .. انتي ليش واقفة في طريجه...
شيخة : انا مب واقفه في طريج حد .. بس هالبنت ما تناسبه ..
حميد : ليش ما تناسبه ..!!
شيخة : مب من مستواه المادي ولا الثقافي ولا حتى الاخلاقي
حميد : لا ترمسين عن البنت جيه ..البنت ما فيها منها .. خلوقة ومؤدبه وفوق هذا ربة بيت شاطره
شيخة : لا يا حميد .. البنت ما تناسبه ..
حميد تم يشوف عبدالله .. اللي كان يشوف امه وهو مغيض ..
عبدالله : امايه قتلج ما باخذ غيرها
حميد : هد اعصابك انته الثاني .. خلنا نحل الموضوع بهدوء ..
عبدالله بصوت عالي : شو اهدي اعصابي يابويه ..!! يوم بغيت اعرس لقيت امييه اول من يوقف في ويهي .. انا مابا وحده من هالبنات اللي يعيبونج .. كلهم دلوعات وما يمشون الا بالبيزات .. انا ابا هند .. هند هيه اللي دشت مزاجي .. تفهمين يا امايه .. هيه اللي دشت مزاجي
شيخة : شوف عاد هي كلمة وحده بنت أحمد ما بتاخذها ..
عبدالله وقف وهو معصب : انزين يا امايه ما باخذها بس لاتفتحيلي سيرة الزواج مرة ثانية ..لاني والله ثم والله اذا ما خذت هند ما بعرس ...
شيخة : يا عبدالله ...
حميد قاطعها : شيخة خلاص ... يا عبدالله لازم نشاور البنت قبل
شيخة : حميد ..!!
حميد : شيخة دخيلج لا توقفين في ويهه ..
شيخة : حميد لا تحاول ويايه ..
عبدالله تم يشوف امه : انزين يا امايه .. رايي ما بغيره .. يا هيه يا ولا حد .. عن اذنكم ..

طلع عبدالله من الغرفة عقب ما رض الباب وراه .. كان يتعامل ويا امه وكأنه هو صدق خاطره في هند .. ما يدري ليش تملكه حب هند فجأة .. طلع عبدالله وكان مصر انه ما يطوف هاليوم الا وهند من نصيبه ..

حميد : يا شيخة صدقيني ما بتحصلين أحسن عن هند ..
شيخة : لا بنحصل .. اللي خلقها ما خلق غيرها ..!!
حميد : بس هند غير ... يعني جريبة منا ومن دمنا ولحمنا .. ليش نبعد ..؟؟
شيخة : انا قلت رايي يا حميد ..
حميد : عن خاطري فكري .. لا تكسرين بخاطره ... يعني يوم بغى يعرس وقفتي في طريجه..!!!
شيخة : يعني ما حصل غير بنت أحمد !!
حميد : وشو فيها بنت أحمد .. اخلاق وتربية والنعم فيها
شيخة : بس هاييل ماوراهم الا الهم والغم
حميد : مب الكل ..!
شيخة : مب كفايه اللي يا منهم امس .. وتباني بعد اعطيهم ولدي ..!
حميد ابتسم : عبدالله كبير .. ومتسحيل يضيعونه ..
شيخة : بيمصون بيزات ... وعقب بيفرونه
حميد : مب كلهم خالد ..!
شيخة : لا كلهم نفس الطينه يا حميد .. ودخيلك مابا ارمس ف هالسيرة
حميد : لا توقفين بطريجه يا شيخه .. عن خاطري .. عبدالله يباها .. وهيه صدقيني ماشي منها .. وصدقيني هيه اللي بتعدله ..
شيخه : ولدي ما في شي عشان تعدله الانسه هند .. وبعدين هاي عاشت طول هالمده بدون زواج .. ما سألت عمرك ليش ..؟
حميد : لانها تربي علاوي
شيخة : خل عنك يا حميد .. البنت معيوفه .. محد يباها .. وهيه اللي لعبت في راس ولدك عشان تضمن انها تعرس .. ولدك لا يغرك ذكائه في الشغل .. ف الامور العاطفيه يروم أي حد يلعب ف راسه ..
حميد : ومحلله كل شي ما شالله عليج ..!!
شيخة : ولدي وانا اكثر انسانه ممكن افهمه ..
حميد : دخيلج يا شويخ فكري ..
شيخة :يصير خير.. انته ما وراك صلاه ...!! ولا هند هاي بتأخركم عن صلاتكم بعد ..
حميد ضحك : ههههههههه عليج رمسة تضحك يا شيخه .. يلا انا بسير اتسبح .. دخينيلي الكندوره والسفره وعطريهم ...
شيخة : ان شالله ..

***
يالسة في غرفتها تحاوط في عالم النت بدون هدف .. من 3 ايام ما رمست ريم ولا شافتها .. معقولة تكون ريم نستها وتخلت عنها بهالسهوله ..!! لا مستحيل ... ريم ربيعتها وما تسويها .. عيل كيف ما فكرت تتصل فيها طول هالمده ..!! ... تمت عليا تتطالع شاشة اللابتوت وفي خاطرها مليون سؤال وسؤال ..
" انا ما غلطت بحق ريم .. هيه فعلا كانت ترمس عنه بزياده ومب بس انا اللي لاحظت .. كذا وحده لاحظت .. ليش رفضت ريم الحقيقة ..! يمكن حست انها نكشفت .. بس انا ربيعتها .. وهيه مب متعوده تخش عني شي .. بس الكلام اللي قالته عقب .. معقوله كان من خاطرها ..! انا صح حبيت خالد من رمسة ريم .. وصح انه من اول يوم طاحت عيني عليه حسيت برعشه .. بس هذا ما يتفسر بالطريقة اللي فهمتها ريم .. احس اني متخربطه .. مب عارفه شسوي ولا كيف افكر .. كل وحده منا غلطت .. بس غلطاتنا كانت في مشاعرنا .. وهاللي يخلي الاعتذار صعب .. اه يا ريم .. يا ترى انتي تفكرين فيني كثر ما فكر فيج ..!! ولا نسيتيني وافتكيتي مني ...! "

حزتها اندق باب غرفة عليا ... وكان محمد اخوها ..
عليا : ادخل ..
دش محمد وهو مبتسم كالعاده .. : مرحبا علايه
عليا بابتسامة متصنعه : مرحبا محمداني .. تعال ايلس ..

يلس محمد في الكرسي اللي مجابل مكتب عليا وتم يشوفها بنظرة غريبه اربكتها ..
عليا : محمد ..! بلاك تشوفني بهالنظره ..!
محمد : معجب .
عليا باستغراب : محمد ..!!
محمد : اسولف وياج .. بس انتي فيج شي .. من يومين وانتي مب ع بعضج ..!! خير يا علايه شو فيج ..!
عليا نزلت راسها : ولا شي ..
محمد : تخشين عن اخوج ..! وهذا وانا اعتبرج مثل صديقتي ..
عليا : ماشي .. بس انا متواجعه ويا ربيعتي .. والموضوع حاز في خاطريه
محمد : ريم .؟
عليا : هيه ريم .. تغيرت وايد يا محمد .. مادري ليش ..!!
محمد : كل انسان يتغير يا عليا ...
عليا : بس مب بيوم وليله ..!
محمد : اكيد فيه سبب ..
عليا نزلت راسها : فيه .. بس كله سوء فهم ..
محمد : حاولتي تفهمينها ..؟!
عليا هزت راسها بالنفي ..
محمد : عيل كيف تبينها تفهم وانتي ساكته ..!
عليا : وهيه بعد ساكته .. وما فكرت تطيب خاطري ..
محمد : محد منكم فكر يطيب خاطر الثاني ..

عليا تمت تشوف محمد وما ردت ..

محمد : بلاج تشوفيني .. كلامي في شي غلط ,,.؟
عليا : لا .. بس مادري .. شسوي يا محمد ..
محمد : البنت عزيزة عليج وايد ..؟
عليا : اكيد .. هاي ريم .. ريم ربيعتي واختي وكل شي ف حياتي ..
ابتسم محمد : عيل اسعي انج تردينها مثل قبل .. ولا تخسرينها عشان سوء تفاهم
عليا : يعني اعتذر ..؟؟
محمد : مب شرط الاعتذار بحد ذاته .. بس حسسينها بقيمتها ..
عليا : خلاص على امرك .. بتصل فيها عقب وبحل الاشكال ..
محمد : ولا تضيجين بخاطرج .. ريم طيبه وما بتهونين عليها ..
عليا ابتسمت : فديتها يا ربي .. ما تهون عليي
محمد : ممم انزين الحين دوري اتكلم ..
عليا وقفت وسارت صوبه ويلس مجابلتنه ..
عليا : يلا قول شو عندك ؟
محمد : مممم استحي
عليا رفعت حواجبها وضحكت : شو ..!!
محمد : ههههه اسمعيني انا عزمت ع الزواج
عليا : انزين ما يبت شي يديد ..؟
محمد : يعني خلاص اخترت ..
عليا : كيف يعني ..؟ وافقت ع البنت اللي نعتتها لك امايه ..!؟
محمد : لا لا .. وحده ثانيه ..
عليا : وحده ثانيه ..! لا تقولي وحده من الاجانب اللي كانوا وياك ف الدراسه .. والله لتذبحك امايه ..
محمد : هههههههه لا لا وين سار فكرج .. وحده بنت ناس وعرب ..وانتي تعرفينها ..
عليا : اعرفها ..!! انته عن منو ترمس ...!

سكتت عليا شوي وفجأة شهقت ... : تقصد ريم .......!
محمد : لا مب ريم .. ريم مثل اختي .. وما اتخيلها زوجه لي ...
عليا بخيبة امل : عيل منو ..؟؟ منو البنت اللي انا اعرفها ..؟ وكيف انته عرفتها ..!
محمد : ميرة بنت احمد .. بنت عم ريم

عليا نصعقت من اللي قاله اخوها .. اخر وحده يت ف بالها هيه ميرة ..
عليا : ميره ..!!
محمد : هيه .. ليش مستغربه ..!
عليا : لا مب مستغربه .. بس انته من وين عرفتها ..!!
محمد : ممم نعتلي اياها ولد عمها ..
عليا : شو ..!! كيف يعني ..!! وبعدين من متى الولد يخطب حق بنت عمه ..!!
محمد : يا عليا نحن تطورنا .. العادات والتقاليد هاي ما عاد لها ذاك الصيت .. وبعدين البنت فيها شي ..؟؟ ليش معارضه .!
عليا : لا مب معارضه .. والبنت ما في منها .. بس استغربت من معرفتك لها .. واستغربت اكثر يوم عرفت انه عبدالله خبرك عنها ..
محمد : المهم .. الحين لازم تساعديني ..
عليا : بشو ..!! لا تقولي ارمس البنت ..!
محمد : لا نحن بندش البيت من بابه .. بس انتي عليج امايه
عليا: ويتراوالك بترفض ...!
محمد : مادري.. بس قوليلها انج رمستيني عنها وانا صليت استخاره وارتحت .. وامدحيها جدام الوالده ويعني انتي ادرى بالباجي ..
عليا : والله يا محمد ما وعدك اني اقنعها .. بس بحاول ..
محمد : دخيلج يا علايه .. حاولي .. انا البنت هاي اباها ..
عليا : ها ..! اشوفك تعلقت ..!
محمد : مادري انا ماقص عليج .. صليت استخاره وارتحت .. وما شي احسن من اختيار رب العالمين ..
عليا : والنعم بالله .. خلاص ولا يهمك ..
***

عقب المغرب في بيت حميد ..

ريم وهي طالعة : أشوف وشكو على خير ..
شيخة : وميروه وينها عنج ..!! مب ع القولة بتسير وياج بيت اختييه ظبيه
ريم : ميرة على أخر لحظة غيرت رايها .. اونها بتكون غريبة .. تستعبط هالانسانة ..
شيخة بصوت واطي .. : فكة ..
ريم : ها امايه ما سمعتج ..؟
شيخة : أقول لا تطولين عند بنت خالتج ..
ريم : لا لا انتي قلتي شي ثاني ..
شيخة : بتحاسبيني على كل كلمة ولا شو ..!!
ريم : انزين حياتي بخليج ... باي ..
شيخة : في وداعة الرحمن ..

صدت شيخة صوب بنتها نورة ..
شيخة : اختج هاي وايد متعلقه ف بنات عمها .. وانا خايفه عليها ..
نورة وهيه تقرا المجله : من شو خايفة ..! البنات ما ضروج بشي ..
شيخة : قلبي ناغزني منهم .. احس انه وراهم شي يا نورة
نورة : امايه شو وراهم يعني .. صدقيني انهم اغبى من الغباء نفسه .. بس انتي وايد مسوتلهم سالفة ..
شيخة : اليوم قصوا على عبدالله .. وباجر ما يندرى على منو بيلعبون ..!
نورة : عبدالله .!!
شيخة : اليوم طلعنا بطلعه .. يبا بنت عمه ..!
نورة في خاطرها " سوى اللي ف باله ..! " : أي بنت عم .!؟
شيخة : هندوه العيوز ..
نورة : وانتي شو قلتي .. ؟ وافقتي .!؟
شيخة : لا طبعا ما وافقت .. بعدني ما استخفيت ..
نورة : يعني رفضتي ..! ليش ..!
شيخه : انتي تسالين ليش ..!!؟ البنت هاي معيوفه محد يباها .. ولعبت ف مخج اخوج وتباه ياخذها .. بس حامض على بوزها .. ولدي ما ياخذ هالاشكال ..
نورة ضحكت : انتي وولدج ابخس ببعض ..

ظهرت ريم من البيت .. وعلى ما توصل السيارة فتحت شنطتها الصغيرة عسب تتأكد انه كل شي موجود .. وما حست انه في شخص يشوفها من سيارته ... رفعت ريم راسها وكملت دربها للسيارة ويوم فتحت الباب .. انفتح باب السيارة الي حذالها و طلع منها خالد .. اللي كان لابس كاب أسود .. ومبتسم على غير العادة

خالد ابتسم : شو قصدج من هالحركة ..!!
ريم بخوف من وجود خالد: أي حركة ..؟؟
خالد : يعني اذا يت الشياطين ذهبت الملاائكة ..!!
ريم استحت : لا والله مب القصد ..
خالد غمز لها : على وين ..؟؟
ريم وحست انه مخها وقف : شو على وين ؟.
خالد " اسميج ذكيه " : قصدي وين سايره ..!
ريم : بسير بيت بنت خالتي ..
خالد : ايوا ... درب السلامة ..
ريم ابتسمت : مشكور
خالد : أقول ريم ..
ريم : هلا ..
خالد : لا تطولين ..

ريم نزلت راسها و ركبت السيارة و خالد كان يتطالعها .. لمعت في باله خطة .. ولازم بيسويها ..
ركب سيارته ومشى ورى سيارة الدريول .. وعلى طول الدرب وهو يضحك على طيبة ريم وسذاجتها ..

وصلت السيارة للمكان المطلوب وهوبيت خالتها ظبية ... ويوم نزلت ريم خطف خالد حذالها بسرعه بسيارته وهو منزل الدريشة .. ريم استغربت من اللي سواه بس بنفس الوقت استانست .. هذا ان دل فيدل على اهتمام خالد فيها ..

أما خالد فكان ميت من الضحك بالسيارة لدرجة انه قام يدمع من الضحك
" اسمحيلي أقولج يا بنت حميد انج أغبى انسانه شفتها ... يعني انتي ما تعرفين اني ماحب ابوج .. فكيف بحبج ... بالعقل خبريني .... هههههههههههههههههههههاي والله انج تحفة .... "
كمل خالد دربه .. وما كان عارف وين يسير من وناسته .. وقرر يتصل ف مايد

في جهة ثانية من بوظبي مايد و سلطان يالسين في المقهى يسولفون وكانت الساعة بحدود التسع فليل
سلطان : عيل وينه ولد عمك ما يبته وياك..؟؟
مايد : ها .. أشوفك حبيته ؟؟؟
سلطان : ليش تغار .؟؟
مايد : أغار من منو عاد من خلود ..
سلطان : بس ما شالله عليه شرح و دمه خفيف
مايد : ما يدري شو يصيبه من يدش البيت .. ينجلب حاله

وحزتها يرن تيلفونه وكان خالد المتصل

مايد : عمرك طويل
خالد : منو كان يحش فيني .. اعترف ..
مايد : سلطان كان يتخبرني عنك ..
خالد : هيييييييي .. انزين انته وين ..
مايد : في الكوفي .. وانته ..
خالد : احوط مب عارف وين اسير .. بلادكم تضيع يابوك ..
مايد : انزين تعال الكوفي نتونس فيك ..
خالد : شو شايفني لعبة تتونس فيها ... وبعدين انا ما انزل مستوايي ..
مايد باستغراب : ها ..!!
خالد : ويا ويهك ... وين انتوا
مايد : كم مرة بقولك انه في الكوفي ..
خالد : اوكيك .. بمر على عمور وبييكم ..
مايد : نترياك ...


مرت ربع ساعة وعقبها وصل خالد ووياه حبيب عمره عمر ..
عمر : مرحبابكم ..
مايد + سلطان : مرحبا بالشيخ ..
عمر : شحالكم يا الثنائي الزفت
خالد : ها ها ها حلوة منك ..
عمر : ادري انزين
مايد : شو كان عندكم الظهر ....؟؟
خالد : أقول عمر يمدحونها الرزة ..
عمر : أقول ميود خشمك هذا لا تحشره في كل شي .. مب زين والله انه اخر شي بيطيح في حلجك .
سلطان مات من الضحك على هبالة عمر وخالد المقصودة
مايد : ها سلطان أشوفك درت وياهم ..
سلطان وهو يمسح دموعه من الضحك : ياخيي الواحد لو حاول يمسك عمره جدام هالاثنين ما بيقدر ..
مايد : منو الثنائي الزفت ..؟؟
خالد : حقوق الطبع محفوظة ..
عمر : هاهاهاي افحمته يا حبيبي يا خالد .. أقول ميمو لقط ويهك .. والله مب زين عليك خلاص اسكت لا تجادل
مايد : اقول انا الغبي اللي قلتلكم تعالوا
عمر : لك شوبنا ميمو عم نمزح معك .. شو كفرنا لسمح الله
خالد كان يستانس يوم يشوف مايد مقهور : أقول يا بو لسان ملتوي . بسك مجاملات ..
عمر : لا كفاية لليوم .. باجر بنكمل ..
مايد : هاي خطة وانا مادري .......!!
خالد : له له له يا بوسلطان ... نحن نخطط ضدك .. افا عليك والله .. ما توقعتها منك ..
مايد : حشا حشا .. ليش هذا كله .. بس يابوكم ما برمس .. جان على كل كلمة كلتوني
عمر : خالد شو رايك نحول ع الثاني ..
خالد بخبث : يالله ..

وتموا الشباب يسولفون لين الساعة وحدة تقريبا و عقبها كل واحد ركب سيارته وسار البيت وطبعا خالد كان لازم يودي عمر لشقته ويلس وياه شوي

نهاية الجزء الرابع عشر

الجزء الخامس عشر
يوم السبت
الساعة 5 العصر
في شقة عمر

خالد مب عارف كيف يبدا الموضوع ويا عمر ربيعه .. فضوله تاعبنه .. يبا يعرف منو هالريال اللي يتصل فيه ويرمس بكل ثقه .. وكأنه ثالثهم الحين .. هو متأكد انه من ناحيته ما خبر حد .. غير عمر ..!! بس في داخله مب مقتنع انه عمر ورا هالاتصالات .. لانه امين .. امين امين امين ..

عمر لاحظ شرود خالد و عدم اهتمامه بالكلام اللي يقوله .. وفسر هالشي بتفسير معين رسمته نورة ف باله بدون ما تحس وحب يتأكد منه ..

عمر : خالد ..؟
خالد : همم
عمر : بلاك ..؟؟
خالد : ماشي .. ليش ؟
عمر : مادري احس انك مب على بعضك ..

تم خالد يلعب بالاقلام اللي جدامه ويسوي فيها اشكال عشوائية .. صدق حس انه مكشوف .. وانه في حد عارف عنه كل شي .. شخص غير عمر ..!!

عمر :ممم انزين ليش خشيت عني اللي صار ..؟
خالد صحصح وتم يشوف عمر بنظرة استفهامية : شو خشيت عنك ..؟؟
عمر : سالفتك امس ويا عمك ..
خالد عقد حيايه : أي سالفة ...؟؟ انته عن شو ترمس عمر ..؟
عمر : لا تحاول تتناسى وتسوي عمرك مب فاهم شي .. انا عرفت كل شي ..
خالد خاف من رمسة عمر ..وسأل بإلحاح : شو اللي عرفته ..؟
عمر : ضرابتك ويا عمك امس بسبة بنته الصغيره اللي ضيعتها ..
خالد وقف بعصبية : انا ما ضيعت حد .. وبعدين انته تراقبني يا عمر .!
عمر وقف وصار من مستوى ربيعه : اراقبك ..!
خالد : اكيد تراقبني .. ولا كيف عرفت ؟؟ خبرني كيف عرفت
عمر :لا يا خالد .. بس جنك نسيت انك مكلفني اني اتولى بنت عمك .. وهيه اللي خبرتني بالسالفه
خالد راح عن باله موضوع بنت عمه ويا عمر .. وحس عمر غبي=\ .. وبغى يرقع السالفة ..: وخذتها وسيلة تعرف منها اخباري .. !
عمر : خالد ..! لا تغلط ..
خالد : انا ما غلطت .. بس انا اشوف انه قمت اشتغل ع المكشوف .. ومادري كيف تنتشر الاخبار ..؟
عمر فتح عيونه : شو قصدك يا خالد ...؟
هز خالد راسه بالقو : ما اقصد شي .. بس انا تفكيري مب ويايه
عمر : بلاك مشتط اليوم ..؟
خالد يلس ع الارض بعصبية : مب مشتط .. بس منقهر ..
عمر : من شو منقهر ..؟

خالد صد وتم يشوف بعيد وكأنه ما يبا يجاوب ..
عمر على صوته : من شو يا خالد ..؟
خالد بصوت اعلى : من هالاتصالات اللي توصلني كل يوم .. عمر اللي يتصل عارف عنا كل شي .. كل شي .. عمر تصور قالي انته ناوي على حلال عمك .. هذا اكيد واحد يعرفنا .. او واحد رمسنا جدامه بالغلط .. او واحد منا زل لسانه جدامه ..!!
عمر يلس هو الثاني ع الارض وتبادل ويا خالد نظرات الحيرة : بس نحن ما نرمس عن خططنا الا اهنييه .. ف هالشقه .. وهالصالة بالاخص .. يعني محد يروم يسمعنا ..
خالد : يمكن واحد من الشركة ..؟؟
عمر هز راسه بقوة: لالالا ماظن .. انا حذر وايد ف الشركه .. وبعدين نحن مانسوي شي مب طبيعي .. ترانا نداوم ونرد ..
خالد : عيل شو يا عمر ..؟
عمر : خلني اشوف الرقم ..

طلع خالد الموبايل .. بس قبل ما يعطيه عمر انتبه انه فيه 2 مسد كول .. والمكالمتين من راشد ..
خالد : لحظه شوي .. راشد ما يتصل الا اذا كان فيه شي ضروري ..

ضغط خالد ع زر الcall
راشد : مرحبا بو وليد ..
خالد : مرحبتين راشد .. شحالك الغالي ..؟
راشد : بخير بس بكون احسن لو تميتوا عدنا .. وما ودرتونا
خالد ضحك : هههههه يا ريال تعرف توله بعد ..!!
راشد : والله يا خالد لك وحشه .. وكل ما اسير دكان الفريج اتذكرك .. واذكر الارنامين سي اللي حشرتنا فيه
خالد : هههه خسك الله ما تذكرنا الا بهالشي .. انا عبالي بتقول اذكرك كل ما سرت المسيد .. ولا كل ما نشيت الصبح ..
راشد : لا وازيدك في شي ثاني يذكرني بك ..
خالد : شو ؟
راشد : كل ما شوف سيايير قرمبع اتذكرك انته وسيارتك
خالد ضحك بصوت عالي : هههههههه ويا هالويه .. لا تذكرني فيها .. لها وحشه هالقرمبع .. بس يالله الواحد يوم يرتقي لازم يرتقي كل شي وياه
راشد : وشحالكم ربكم الا بخير ..؟
خالد : والله بخير وسهاله ..
راشد : علاوي شحاله ..؟
خالد بنغزه : علاوي وجاريته كلهم بخير
راشد : ترا ما سمحلك تقول عن حرمنا المصون جاريه ..
خالد : يا سلام .. فصلت ولبست اشوفك..
راشد : ليش ...!! لا تقول انها بتأجل العرس لين ما يتخرج علاوي من الثنويه ..؟!!
خالد : ههههه تصدق فكره ..!! وعقب بنسويلكم حفله ف دار المسنين .. واليوم الثاني بنسويلكم جنازة ..
راشد : فال الله ولا فالك .. لا بس طمني العروس بعدها موافقه .. ؟
خالد : هيه موافقه و بكل سرور بعد ..
راشد : انزين خالد نحن نبا نيي نخطبها بشكل رسمي ..
خالد : ههههه حليلك خايف تغير رايها ..
راشد : لا بس كبرت انا يا ريال .. الحينه بوصل ال 30 وبعدني ما عرست ..
خالد : خلاص الشيخ .. حدد موعد ونحن بإذن الله بنوجبكم
راشد : مممم الخميس الياي زين ..؟؟
خالد : خلاص انا بشاور الاهل وبرد عليك خبر ..
راشد : بس لا تنسى يا خالد
خالد بخبث: بنشوف ان شالله
راشد : شو بتشووووف ..!!!
خالد : قصدي ان شالله .. والحين اجلب ويهك راد من الدوام وابا اخمد ..
راشد : خلاص برايك يا بو وليد .. سلم ع الاهل
خالد : يبلغ وانته بعد وصل السلام ..
راشد : ان شالله .. فمان الله
خالد : وداعة الله ..

بند خالد عن راشد وتم مبتسم .. واخيرا بيطمن على مستقبل هند .. الحينه بيضمن انه هند ما بتنضام بقية حياتها .. وانه بتعيش عيشه احسن بوايد من اللي كانت عليه واللي هيه فيه الحين .. خالد دايما كان يشوف انه هند ما انخلقت الا عشان تكون ام .. هند بالنسبة له تحمل كل معاني الامومه والحنان .. واكبر جايزه لها انه يقدمها عروس حق راشد .. الزوج المثالي ..

ابتسم خالد و تم يفكر بحياة هند المستقبلية ..
***
يوم السبت
الساعة خمس ونص
بيت حميد

دشت ميرة الغرفة بحركة سريعه .. وهيه اصلا دايما سريعه في حركتها وحركاتها .. دخلت وعلقت عباتها وفرت الجوتي ع الارض .. وكانت من النوع الفوضوي غير المبالي بنظافة المكان .. بعكس هند اللي ما كانت تحب تشوف نتفه ورقه ع الارض .. طلعت ميرة ثيابها من الكبت وكانت على وشك دخول الحمام " عزكم الله " عشان تتسبح .. لولا انه هند وقفتها ..

هند وهيه تنش من الشبريه : بسم الله الرحمن الرحيم .. بلاج داشه بدون لا احم ولا دستور ولا حتى السلام عليكم ..
ميرة وهيه تمثل انها حرانه : حر حر حر .. ابا اسير اتسبح .. احس اني مب نظيفة ..
هند وهيه تبتسم : من متى تعرفين النظافة انتي ..؟
ميرة : شو قصدج انسه هند ..ّ!!
هند : يعني شوفي جوتييج وين منتطر وعقب رمسي .. وشوفي عباتج
قاطعتها ميره : بلاها عباتي .. علقتها

هند قامت وشلت العباه ووحطتها بالسله ..

ميرة : ليييييش..!! انتي دوم تقوليلي علقي العبي يوم بتفصخهيم
هند : صح بس مب يوم تكونين حرانه و عرقانه .. ما فينا نكون سبب موت طالبات التقنيه ...
ميره طلعت لسانها : هه هه هه سخيفه .. ومتفيجه بعد .. المهم
هند : شو المهم ..؟
ميرة : مادري شو فيها ريم ..!! احسها مب طبيعيه بعلاقتها ويا علايه .. اليوم يلسنا ويا بعض .. وكنت انا الوحيده اللي ارمس .. وهم مثل اللي شالات ف خواطرهم ع بعض ..
هند : ممم ما حاولتي تعرفين من ريم ..؟
ميرة : حاولت .. بس قالت انه ما في شي .. وتبين الصدق حسيت انها ارتبكت وايد .. وشكلها ما تبا تقولي عن السبب ..
هند : مممم انزين وعليا ..؟
ميرة : ما سألتها .. بس مبين انها ما تبا ترمس .. ولا جان يت ورمستني بدون ما اقول شي
هند : مممم اليوم ردي رمسي ريم .. لا تضغطين عليها .. بس حاولي تحلين الاشكال .. ما حب اشوف علاقات تتهدم جدامي وانا ساكته ..
ميرة : ان شالله .. انزين الحين ابا اسير اتسبح .. ممكن يا مس نظافة ؟؟
هند : هههههه وبكل سرور بعد .. يلا سيري عطرتي الغرفه بما فيه الكفايه
ميرة : وانتي شكلج مزيده جرع السخافه زياده
هند : هههههه سخيفه .. يلا سيري فديتج بردي على عمرج وانا بسويلج عصير ليمون ..
ميرة : تشكرات حبي

دشت ميرة الحمام .. وهند سارت صوب الكبت وطلعتلها شيله بسيطه .. وغطت شعرها زين .. وكانت بتظهر بس عمها سبقها ودق الباب ..

فتحت هند الباب .. وابتسمت يوم شافت عمها حميد
هند : هلا والله بعمي حميد .. " باسته فوق راسه "
حميد : هلا بالغاليه .. شحالج الغاليه
هند : بخير عمي .. تفضل تفضل ..
حميد : مشكوره الغاليه ..

دش حميد ويلس ف القنفات الصغيره الموجووده ف كورنر الغرفة ..
هند : شحالك عمي ..؟
حميد : الحمدلله فديتج .. بس هالكني الشغل .. واتريا اليوم اللي يتمكنون فيه العيال من الشغل عشان اوليهم المسؤولية كامله ..
هند : الله يقويك عمي .. والله يعطيك الصحه والعافيه .. و ان شالله الله ييسرلكم اموركم ...
حميد ابتسم : طول حياتي اقول انج غير .. ودايما كلامج هو الي يريحني
هند استحت من الاطراء : تسلم يا عمي .. وهذا شرف لي ..
حميد : شحال ميرانه ..؟؟ ان شالله متوفقه ف الدراسه ..؟؟
هند : هيه الحمدلله .. ميرة ذكيه .. والحينه استوت مثقفه بعد .. ما ينخاف عليها ..
حميد : الله يوفقها هيه وريموه ..
هند : امين يا ربي ..
حميد : ويسرلج امورج ونيوزج ..

نزلت هند راسها .. وحست انه عمها يبا يقول شي .. بس عقب سمعت صوت ف الغرفة ورفعت راسها تدور مصدر الصوت .. بس حست انه عمها ما سمع .. فتوقعت انه اصلا ما شي صوت .. بس هيه يتهيألها

حميد : بغيتج ف موضوع يا هند
هند : تفضل عمي .. انا اسمعك ..
حميد : انتي كبرتي يا هند .. وصرتي في سن يأهلج للزواج ..

رفعت هند راسها وتمت تشوف عمها باستغراب ..

حميد : وفي واحد يا يخطبج .. وانا ياي اقولج عنه و اخذ رايج

اخفت هند ملامح فرحتها بالخبر .. اكيد هذا راشد ..راشد خطبها من عمها ومشى حسب الاصول .. واخيرا حلمها بيتحقق ..

حميد : ما سألتيني منو الريال ..؟.
هند نزلت راسها : كمل يا عمي اسمعك

حميد ضحك على هند اللي ما عرفت شو تقول ..: عبدالله ولدي خاطره فيج .. وهو يا بنفسه وقالي انه يباج ع سنة الله و رسوله .. وانا ما بحصل احسن عنج ولا بحصل واحد يناسبج كثر عبدالله

نزلت الكلام عليها مثل الصاعقة ... عبدالله ..!! عبدالله اللي كان مسببلها خوق طول هالمده يخطبها ..!! وراشد ! وينه راشد ..!!

تمت هند تشوف الارض باستغراب ..ما استرجت ترفع راسها وتشوف عمها .. ملامحها كانت اكبر دليل على الرفض ..

حميد : شو قلتي يا هند .. ؟؟

هند استمر ف السكوت .. وكانت تحت تأثير الصدمه ...

حميد ابتسم : بخليج على راحتج يا هند .. وردي عليي خبر متى ما تبين .. واعرفي اني بكون اسعد انسان يوم بزفج على عبدالله .. واني واثق انج ما بتخذلين عمج

طلع حميد من الغرفة عقب ما عق قنبلته على راس هند .. هند اللي تمنت لو انها ما فتحت الباب حق عمها ولا سمعت الكلام اللي دار ..

وبنص هالانفعالات طلعت ميرة من غرفة الملابس وهيه منصدمة ..
ميرة : شهالكلام اللي قاله عميي ..!! عبدالله خطبج
هند : انتي سمعتي ..!!
ميرة : هيه ظهرت من الحمام وسمعته وهو يقول انه يباج ف سالفة .. ما بغيت اقطع الحوار فتميت ف الدريسنج روم .. لين ما خلصتوا ..
هند وعيونها دمعت تلقائيا : شسوي يا ميره ... شسوي .!!
ميرة : انتي ما تبينه ..!!
هند : انتي تسألين هالسؤال ..!!
ميرة : موافقه ولا لآ .. جاوبي بهيه ولا لآ
هند : اكيد لا يا ميرة اكيد لا .. كيف اخذ عبدالله ..!!
ميرة : انزين ليش ما قلتي حق عمي انج ما تبينه ..! وليش تدمعين ..!!

هند بصوت عالي شوي : انتي متخيله الموقف اللي انحطيت فيه .. اول ما ياني عمي توقعت انه يرمسني عن راشد .. ويقولي عبدالله ..!! وسمعتي شو قال .. قال بيكون سعيد يوم بيزفني على عبدالله ..!! يعني يا ميرة عمي يبا هالشي .. عمي مرحب بهالزواج .. ونحن ف بيته .. !!

ميرة بحيرة : وضحي كلامج زياده وبهدوء يا هند ..
هند : ميره افهميني .. ميرة لو رفضت عبدالله عمي بيزعل .. ونحن ف بيت عمي .. يعني تخيلي موفقنا اتجاه عمي اللي استقبلنا في بيته و عطانا اللي نتمناه .. وحاول يوفرلنا كل متطلبات وكماليات الحياه .. تخيلي يوم تقدملنا هو بطلب نرده ..!! ونرد ولده فوقه ..!! احس اني انحطيت ف موقف محد يحسدني عليه ..

ميرة : بس هاي حياتج .. وانتي ابخس بها .. وبعدين راشد خطبج من خالد .. وعطيناه موافقه .. يعني هو اولى .. من غير انج تبينه ..!
هند : انا مستحيل اتخلى عن راشد .. بس عمي بيزعل .. ِشسوي يا ميرة .. قوليلي
ميرة : ممممم ماالج غير خالد ..!
هند ومثل اللي وصلت للحل ..: صح .. مالي غير خالد .. بخلي الرفض ايي من عنده .. واصلا خالد مستحيل يوافق .. وانا راي من رايه
ميرة تنغزها : رايج من رايه ها .. يالمكاره .!
هند : بس يا خوفي اولد مشكله مبينهم .. و نخسر عمي مرتين ..
ميرة : متعود اخوج على المشاكل .. يدخل ويظهر منها بسهوله .. يعني ما عليج .. بيدبرها .. بس انتي خبريه.. وشوفيه شو بيقول ..
هند : الحين بتصل ..
ميرة : اييه انتي لا تفضحينا .. خبريه عقب يومين .. مب الحين
هند : يومين!! ليش عاد !
ميرة : فشيله ..! تبين تردين عليهم بالرفض بنفس اليوم .. شو بيقولون ..!! اكيد بيقولون ولدنا فيه شي عشان جيه ردته بنفس اليوم ..!!
هند : بس وايد يومين .. هاليومين بجابل فيهم عمي ويمكن عبدالله .. وماحب امثل جدامهم بدور اللي تفكر وانا رافضه الفكرة من الاساس ..!!
ميرة : ممم انزين اسمعي .. قولي حق خالد اليوم .. وخليه يرمس عمي ويقوله انه راشد تقدملها من قبل وانه خالد عطاه كلمه .. وخله يقول بعد انه ابويه موصي براشد .. وبجييه بتفتكين من السالفة بسرعه .. وعمي ما بيقول شي يوم بيعرف انها وصاة المرحوم ..
هند : وانتي يبتيها .. خليني اتصل ف خالد .. واقوله

شلت هند موبايلها واتصلت في اخوها ..
خالد : هاااا
هند : السلام عليكم اولا
خالد : وعليكم السلام ..
هند : انته وين خالد ..؟
خالد : مممم جدا غرفتكم .. خير في شي ..؟
هند : هيه في شي مهم جدا جدا .. ممكن تشرفنا شوي ..
خالد : ممكن جدا جدا .. يلا ياي .. سي يو عقب ثواني
هند ابتسمت : اترياك ..

وطبعا ما طافت الا ثواني وكان خالد ظيف غرفتهم ..

خالد بلتفت صوب ميرة بحنيه : شحالج ميره ويا الدراسه والتيجرات ؟
ميرة : الحمدلله تمام ..
خالد : احيدج طمة بالانجليزي .. تفهمين شي ولا مفضحتناا..؟
ميرة : لا رافعه راسكم .. وبعدين كلن يرى الناس بعين طبعه ..
خالد : هاهاها .. انا اصلا بلبل بالانجليزي .. بس ما بين هالشي .. اخاف من العين
هند : خل عنك هالسوالف و اسمعني
خالد : اففف خلينا نكمل حوارنا ..
هند : خالد لاحق ع الرمسة بالانجليزي ..
خالد : شو تبين انزين انسه هند ..؟
هند : شو صار على موضوع راشد! بعده عند كلامه !
خالد انصدم .. خاف انها غيرت رايها : هيه بعده .. ليش ..! ليكون طلعتي بعلثه يديده !!
هند : لا .. بس ابغي استعيل ف هالموضوع بسرعه
خالد استغرب من لهفة هند : ليش ..!! شو مستوي ..!
هند : خالد عبدالله ولد عمي خطبني اليوم .. !
خالد وقف : شو !! عبدالله خطبج ..!! من منو ....!
هند خافت : من .. من من عمي بعد من منو !!
خالد : عمج ..!! وانا طرطور جدامه .. مب جني الراي من عقب رايج يرجع لي ..!!
هند : خالد مب هذا موضوعنا .. انا ما بغي عبدالله .. بس رفضي له بيسبب حزازيات نحن في غنى عنها ..
خالد : شو تقصدين ..؟
هند : اقصد انه هالشي بيحز ف خاطر عمي الا كلمني وهو واثق من الموافقه
خالد : ع كيفه ..! عمج عايبنه دور بوش !!
هند مسكت ضحكتها من تعليق اخوها : خالد مب وقته .. دخيلك طلعني من هالمشكله ..
خالد بجدية ..: انا ماشوف انه في مشكله دام انج رافضة عبدالله ..وعن الحزازيات فماشوف انه نخليلها وزن دام انه الموضوع متعلق بمستقبلج يا هند .. وكل شي قسمة ونصيب ..

تمت ميرة تشوف اخوها بنظرات افتخار .. كانت تتخبل عليه يوم يكون جاد يستوي شكله جنان .. وتحس انه كلامه يستوي موزون ومنطقي .. وانه لو تم على هالحال بيكسب احترام الكل ..

هند بضيج: بس يا خالد انا مابا ازعل عمي ..
خالد : ما تبين ولد عمج !! ولا تبين تزعلين عمج ..! عيل شو تبين يا هند ..
ميرة تدخلت : خالد ..اسمعني
استانس خالد وقال : اسمعج خيتو .. قولي
ميرة : نحن رتبنا الموضوع كالتالي ..
خالد : عاشت .. تعرف كالتالي بعد..!
ميرة ضحكت غصبا عليها : خالد خلني اكمل ..
خالد : كملي ...
ميرة : عساس انه هند رمستك .. و انته قلتلها انه راشد رمسك من جريب وانته عطيته كلمه عساس وصية المرحوم ..واكيد هو بيحترم وصيته وما بيهون عليه انه نعصيها .. واظن انه بهالطريقة بنتخلص من الحزازيات وبنوصل حق اللي نباه ..

خالد سكت وتم يفكر بكلام ميرة .. " هه .. بيحترم الوصيه ..! هو ما حترم الوالد قبل ما يموت .. بيحترم وصيته الحين ..!! حليلج يا ميره .. بوافقج ع طريقتج .. بس ما ظمن اني انفذها بنفس هدوئج هذا .. "

هند بقلق : ها شو قلت ..!!
خالد : خلاص على خير .. بشوفه اليوم فليل .. وبننهي السالفة ..
هند يودت اخوها من ايده بفرح : مشكوور يا خالد .. ما تقصر ...
خالد بمكر : يا عيني ع الحب .. كل هذا عشان راشد .. والله لو اخبره بيموت من الفرحه ..
هند استحت : بس عاد خالد ..

وقف خالد : يلا انا بسير الغرفة شوي .. وبوافيج بالاخبار فليل ..
هند : اوكي حبيبي ..

مشى خالد ويوم وصل عند باب الغرفة تذكر شي فصد عشان يقوله : آآآ .. قبل ما انسى
هند : آمر ..
خالد : ترى الخطبة الرسمية بتكون بالخميس .. راشد مستعيل ..
هند بحيا : الشور شورك ياخويه ..
خالد : هههه انزين خلاص عرفنا انج مستانسه .. وانا بخبر عمج .. يلا باي ..

صدت ميرة صوب هند وابتسمت وبادلتها هند الابتسامه
ميرة بفرح : واخيييييييرا ..!!
هند : الله يتمم على خير
ميرة يودت ايد اختها : بنتوله عليج يوم بتسيرين الشارجه ..
هند : لا تعورين قلبي من الحين .. خلينا نعيش يومنا
ميرة : فديت يا هنوده

لوت ميرة على اختها وما تدري ليش حست انها بتفارقها جريب .. و انه بفراق هند بتفقد احلا عاطفة ..!!

***

في الصالة

كانت يالسة شيخة ويا ولدها مايد اللي حاط راسه على ريلها .. وكانت نورة وريم وياهم ..

شيخة مبين الضيج عليها من يومين .. ومحد عارف السبب غير نورة .. كانت متضايجة من سالفة خطوبة عبدالله من هند .. كانت تحس انه هند مب من الناس اللي تتمنى شيخة انها تناسبهم .. وطيبة هند و سذاجتها ما تناسب المجتمع اللي تحب شيخة انه تقدمها له .. بالرغم انها ما تهتم وايد لامر عبدالله كثر باجي عيالها .. بس موضوع مثل هذا يباله تدخل اسري .. ومب قرار فردي بس ..

لاحظت ريم وكذلك مايد الشرود الظاهر على امهم خلال هالفتره .. وما كانو يعرفون شو سببه ..
ريم : امايه ..
شيخة : شو تبين !

ريم ما تشجعت عقب جواب امها وغمزت حق مايد
مايد اعتدل في يلسته : امايه فيج شي انتي ..!؟ احسج مب طبيعيه .. و تفكيرج شارد ..!
شيخة : ما فيني شي يا مايد .. بس تعبانه شوي
مايد : تعبانه ..!! شو يعورج يالغاليه ..! ظهرج !! بطنج ! راسج .. قولي شو يعورج !!
شيخه بتملل : ماشي بس راسي شوي يعورني .. لا تحاتي فديتك ..
مايد : كيف ما تبيني احاتي واماه مقلة عيني تعبانه ..! قومي بوديج الدختر
شيخة : ما يحتاي يا مايد .. بعدين تعال
مايد : وين !
شيخة : اخوك عبدالله وينه ..!! انا من يومين ما شفته ..!!
مايد : مادري والله يامايه .. تعرفين اني ايام الدراسه ماداوم ف الشركة دوم .. فما تشاوف وياه
شيخة : وانتي يا نورة ما تشوفينه !

نورة رفعت راسها عن الموبايل اللي قامت تجابله ليل نهار : لا
ريم : ليش امايه تسألين عن عبدالله !
شيخه : ويديه !! ولدي واسأل عنه !! حرام ..!
ريم : امايه ليش مستويه ما تتحملين مني شي .. ومستوي كلامي تجيل عليج ..!
شيخة : لانج تسألين اسئلة مالها معنى .. وينهم بنات عمج !
ريم : فوق ف غرفهم ..
شيخة : ما ارتاحوا لين ما خذوا الولد .. الله يكفينا شرهم ..

ريم ومايد تموا يشوفون بعض باستغراب ..وما كانوا فاهمين شي
نوره : امايه خلاص انتي قلتي حق ابويه انج موافقه .. ليش تردين تفتحين السيره !!
شيخة : موافقة غصب .. بس عشان ما ازعل ابوج واخوج جليل الذوق .. ولا انا ادعي ف الليل والنهار انه هالخطوبه ما اتم ..
مايد : اييه اييه اييه .. شو تخربطون انتوا ..!! أي خطوبه !!
شيخة : اخوك يبا بنت عمك هند .. قلن البنات ..!!
مايد : عبود يبا هند .. هذا وايد رافع راسه فوق ..!! عاد هند ابد ما تناسبه ..
ريم : صدق امايه .. عبدالله يباها ..!
شيخة : ومصر عليها بعد .. مادري شو شايف فيها .. كان بخاطري ايوزه علايه ربيعتج بس هو مصر على هالعيوز بنت عمكم

تضايجت ريم من طاري علايه اللي طنشتها من الخاطر اليوم ..
مايد : علايه صغيره يا امايه .. وهند سنها مناسب حقه .. و بتكون امه راضيه عليه لو وافقت
شيخة : ومنو امه يا استاذ .. !! مي جنييه انا امه ..!! ان شالله ما تتيسرله هالخطوبه .. وعقبها بقنعه بعلايه ..

ضحكن نورة على امها اللي كارهه هند من الخاطر : يا امايه لا تعورين راسج .. هو ما بيغير رايه .. اسمعي مني .. جان تبين الموضوع يتفركش .. رمسي الاستاذ خالد .. هو خبير بهالسوالف ..

تموا مايد وريم يشوفون نورة بنظرات حقد .. وخاطرهم يذبحونها ..
مايد : تنكتين انسه نوره ..!! وبعدين بسكم حش ف الاوادم .. وكل شي مكتوب ومقدر .. يعني لا انتي ولا امايه ترومون تغيرون المكتوب لا بخالد ولا بغيره

وصل مسج حق نورة ساعتها وكان طبعا من الغالي " ف الوقت الحالي " خليفة ..

________________________________________
دق الجهاز وخافق القلب له فز..
فزة فرح ما هي مثل كل فزة..
حي هالرسالة وحي منهو لها دز..
حي الكلام والزين واللي يدزة..
اهلا هلا بك يا عزيز معزز..
واللي يعزك لازم تعزة..

ابتسمت نورة من المسج .. وكانت تتريا مسجات خليفة بأحر من الجمر .. وكأنه هو الماي اللي يبل ريجها كل يوم بمسجاته ..

وبنفس الوقت وصل مسج بس هالمرة لريم وكانت كالتالي ..

" محتاجه اكلمج اليوم عشان ننهي هالخلاف .. اسفه مقدما يا نبض قلبي ..علايه "

فتحت ريم عينها من الخاطر .. ما عرفت تفرح ولا تصيح ولا ترقص .. واخيرا علايه ردت علايه .. مسجها واضح .. عليا تبا تحل المشكله وترد شرات قبل .. ضمت ريم الموبايل ووقفت وقررت انها ترمس عليا الحين مب عقب ..

مايد : اييه على وين .!! وبعدين شو سالفة موبايلاتكم انتوا الاثنين ..!!
ريم : بسير ارمس علايه .. من كم يوم ادورها وما احصلها .. وطرشت تقولي انها فاضيه .. يلا باي خيووو

ركضت ريم فوق وتم مايد يشوفها وهو متحسف على حاله .. المسجات يتشحتها شحاته من ربعه اللي ما يوزنون للمسج وزن =)

***
سارت ريم وشلت التيلفون واتصلت في عليا اللي كانت ولهانه عليها من الخاطر ..
عليا : هلا بحياتي هلا
ريم : هلا علايه حبيبتي .. ولهت عليج .. ولهت عليج وايد ..
عليا : وانا اكثر .. كنت اتغلى شوي عليج .. بس ما رمت اكمل ..
ريم دمعت : ويا ويهج تغليج يعور القلب ..
عليا : من حلاتج عاد .. مسوتلي اكبر طاف .. بس شو نسوي .. انتي الغاليه .. ولازم نصبر عليج ..
ريم : يعني سامحتيني ..!
عليا : ومن قلبي .. وانتي مكانج شاله فخاطرج!
ريم : لا اكيد نسيت كل شي .. ومابا اتذكر هالايام اللي قضيتها من دونج
عليا : اوه منو قدي
ريم : وشحالج علايه .. شخبار امج واخوج ..؟
عليا : كلهم بخير وسهاله .. شحالج اهلج انتي !؟
ريم : كلهم بخير الحمدلله .. فاتتج استوت ف بيتنا احداث ..
عليا : شو شو خبريني ...؟

خبرتها ريم عن سالفة ضياع شما والاحداث اللي صاحبتها كلها .. ومسحت بعض الحقايق ...

عليا : فديت شموه ما تستاهل ..وخالوه اكيد انهارت
ريم : هيه بغت تروح فيها امايه .. بس الحمدلله عدت على خير
عليا : الحمدلله .. المهم بخبرج بسالفة بس والله ما تخبرين حد
ريم : والله ما بخبر .. قولي ...
عليا : محمد اخويه بيخطب ..!
ريم : انزين !!
عليا : وحاط ف باله وحده مول ما يت عبالي ..!
ريم : منو هاي ..!!
عليا : وحده تعرفينها ..
ريم : منو هاي ..!
عليا :و اخوج مرشحنها حقه
ريم : ها !!! أي اخو !!
عليا : عبدالله
ريم : منو هيه البنت ؟ ليكون نوره اختييه !
عليا : لا .. ميروه بنت عمج
ريم منصدمه : ها !! ميره!
عليا : شفتي عاد ..! انا بعد انصدمت .. بس ميره بعد بنت زينه وجميله وكل حد يتمناها
ريم : بس ليش عبدالله رشحها ..! اصلا هو ما يحتك وياها ابد
عليا : مادري ليش ..!! بس هو استخار وارتاح
ريم : اها .. ومتى بيعزم ..؟
عليا : مادري .. بس امانه لا تخبرين حد
ريم : سرج ف بير خيتوو ...بس شورايج اجس النبض بطريقتي
عليا : اوكيه بس بدون ما تحس
ريم : اوكيه
عليا : ولهت عليج يا الطفسه
ريم : احم وانا اكثر ..
عليا : بخليج الحينه ..
ريم : ليش توه الناس ..!
عليا : ماما تباني .. تعرفين محد وياها غيري ..
ريم : اوكيه الغلا .. برمسج قبل ما ارقد
عليا : ويتنج فور يو .. يلا باي
ريم : باي


دشت ميرة الصالة الصغيره وين ما كانت يالسه ريم ..
ميرة : اعترفي من كنتي ترمسين !!
ريم ابتسمت : كنت ارمس علايه
ميرة : احلفي ..!
ريم : والله ..! ليش مستغربه!!
ميرة : مادري بس حسيتكم من كذا يوم مب على بعضكم
ريم : كانت تتغلى عليي .. بس ما رامت فديتها تصبر
ميرة : يا عيني ع الحب ..
ريم : المهم قوليلي .. انتي ليش ما عرستي للحينه
ميرة استغربت : شو !! وليش اعرس ! بعدني صغيره
ريم : ههههه لا بس يعني لو حد خطبج بتوافقين .!؟
ميرة : الحين !
ريم : هيه ...
ميره : مادري .. على حسب الشخص .. بس ليش ؟
ريم : مادري .. بخاطري حد من ربيعاتي يعرس .. اسميني بتخبل بعرسها
ميرة : ان شالله انتي اولنا ..
ريم استحت : عند لي ريل ..؟
ميرة : هههههه لا .. بس بدورلج .. مممم شو رايج ب .. مممم .. شو رايج بخالد ؟
ريم فتحت عينها : ها ..!! شمعنه خالد ..!
ميره : ههههه وينها عني فطامي .. بتذبحني لو عرفت .. هيه تموت بخالد بس هو ما يحس
تضايجت ريم : وشدراج انه ما يحس
ميرة : دوم كان يسويلها طاف .. وساعات حتى تصيح .. بس ان شالله ينجبر خاطرها
ريم سكتت وتضايجت من ثاني شخص ينافسها ف خالد ..

" كل مره وحده تتطلعلي ..!! متى بفتك من هالسالفه "
***
يوم السبت
الساعة تسع
بيت حميد
الصالة

الكل مجتمع ف الصالة الكبيرة الموجوده في الطابق الارضي .. من حميد لعلاوي ..ما عدا هند اللي حاسه انه ويهها محترق من عمها وعايلته عقب ما بترد ولدهم وبجرهم عبدالله .. وخالد وعدها انه بيرمسهم اليوم .. ووجودها اكبر غلط ف هاللحظة .. ميرة الفضول دفعها انه تيلس وياهم وبالاخص حذال خالد اللي مستانس عليها اليوم ... ريم طبعا لازم تتواجد ف المكان اللي فيه خالد .. كانت على امل انه تصير مبينهم مواقف جميله .. وهيه اصلا مستانسه اليوم لانه علايه ردت الاوليه ..

خالد قرر انه يتكلم بوجود الكل .. لازم يرد عبدالله جدام كل اخوانه وخواته .. وبطريقته الخاصه

حميد : ها مايد ..؟ شو الدراسه وياك ..؟
مايد : زفت ولله الحمد .. الدكتور يرمس وانا ف عالم ثاني .. افكر بالسيارة اللي حرمتني منها
حميد : وهالسالفة ما بتخلص
مايد : لا
حميد : ناوي ترسب السنه !! انته كبرت ع الرسوب يا مايد ..والله فضحتنا
مايد : يا بويه هلكت وانا اقولك اني مب فالح ف الدراسه .. واصلا ما حبها .. ولا احب هالتخصص اللي جبرتوني عليه .. يعني كل شي ضدي .. كيف تباني انجح وانا كاره المجتمع اللي حطيتوني فيه !

حميد : مب فالح ف الدراسه ولا في الشغل .. شو تبا تسوي عيل ..!! بس فالح حق السفرات والكشتات ويا ربعك لين انصاف الليالي .. ويوم تي امك توعيك الصبح تقص عليها بكلمتين .. يا تعبان يا راسك يعورك عشان ما تسير .. مب حاله وياك !!

مايد صد صوب امه ولوى بوزه .. وكان ما يحب ينزف جدام عيال عمه

شيخه : بلاك ع الولد انته ... كل ما شفته زفيته .. !! حرام عليك
حميد : انا ما ازفه الا لاني ابا مصلحته
شيخة : انزين مب لازم تزفه جدام خلق الله ..
حميد : منو خلق الله ...! وبعدين ولدج لازم يحس بالمسؤولية ..
شيخة : خلاص يا حميد كمل رمستك عقب داخل .. مب حلوه ف حق ولدك !!

خالد ابتسم بخبث وشاف ميرة .. كان يدري انه مرت عمه تقصدهم بكلامها .. بس هو ما بيتزحزح من مكانه

وريم كالعادة بغت تنقذ الموقف ..

ريم : بابا .. هالويكند نبا نسير دبي ..ولا تقول لا
حميد : وشمعنه هالويكند ؟
ريم : بس ملانين ... ابويه لا تقول لا ..
حميد : خليها الاسبوع الياي .. هالاسبوع واعد امج اوديها عند امها ف العين
مايد : جان تبون انا بوديكم .. بس تراني ما بركب ميروه سيارتي .. هاي نحسه وبتنجلب فينا السياره
ميرة : ههههه حرام عليك ..
مايد : ع كيفها الاخت تحرم وتحلل ...
ميرة : خلاص اوكيه ما بسير عشان تسيرون وتردون بالسلامه
ريم : اصلا انا ما بسير بدونج .. وميود غصبا عليه بيركبج ..
مايد : يا سلام ..
ميرة : خلاص غصبا عليك ..
مايد : بستخير قبل وعقب برد عليكم .. ونوروه وهند بعد لازم اييون .. عشان تكمل الوناسه ..
ميرة : واممره بناخذ علاوي وشمامي .. عشان نسوي جو
مايد : اسف .. هاذيل خليهم ف البيت ابركلهم

خالد تم يشوف الوضع الغريب بنوع من الدهشه .. اخته ماخذه على مايد اكثر عنه .. وهالوضع مول ما عيبه .. كيف ترمس ويا واحد ف نظره غريب .. نسى خالد تجرأه على ريم ... بس هالوضع فعلا مب طبيعي ... فقال خله يضرب ضربته الحين

خالد : آآآآقول عمي ..
حميد : آمر ..
خالد اعتدل ف يلسته : اليوم رمستني هند عن موضوع خطبة عبدالله ..
حميد خاف : هيه انا رمستها اليوم ف الموضوع ..
خالد شاف عبدالله بنظرة خبيثه : بس كل شي قسمة ونصيب

الكل قام يشوف خالد وهو مستغرب .. حتى ميرة .. لانه الاتفاق ما كان جييه .. الاتفاق انه يقوله عن وصية ابوها ويحل الاشكال ..

عبدالله : شو تقصد يا خالد ..؟
خالد ابتسم بمكر : اقصد انه البنت مخطوبه .. ومالك نصيب وياها ..

حميد وقف : مخطوبه ..!!
خالد : هيه مخطوبه .. ليش مستغرب يا عمي .!
حميد : من متى !!
خالد : من فتره
حميد : وليش ما قالتلي .. ليش مخليني اخر من يعلم!
خالد ببرود : الموضوع جديم .. وانته ما سألت عشان نخبرك .. والبنت استحت تردك حزتها ..
حميد بعصبية : ومنو خاطبنها ..؟؟
خالد : راشد ربيعي .. ولد يارنا الاولي .. ريال زين وانا مرتاحله ..
حميد : وهند ؟؟
خالد : هند وابوها موافقين ..!
حميد : خير ..!!

ميرة اهنه تدخلت عشان ما تكبر السالفة وما توصل بين خالد وحميد لابعد الحدود

ميرة : عمي راشد هذا كان يارنا وكذا مره خطب هند .. وهيه كانت تربي علاوي ساعتها .. وعطوه كلمه انه من يكبر شوي علاوي بيتم هالزواج .. وهيه موافقه .. وابويه الله يرحمه وصاها قبل ما يموت انها تاخذ راشد ..

خالد : وانته لو كنت ويانا حزتها كنت بتعرف .. بس للاسف العلاقات كانت متقطعه حزتها

حميد وصدق طفر : خالد ليش تفتح المواضيع الجديمة ..!!؟
خالد : لانه موضوع خطبة هند جديم .. وع العموم ماشي نصيب يا عبدالله .. واسمحلنا ..
حميد : ومتى بيي هالراشد يتقدملها بشكل رسمي ..!
خالد : يوم الخميس ..!
حميد : خالد انته تخبلت .!! تخطط و ترتب ع كيفك وانا اخر من يعلم !! عنبوه انا عمها .. واتوقع انه حضوري ضروري ولا شو رايك !!!
خالد : اكيد بتحضر .. لانهم بييون بيتك يخطبون .. ولا ما بتستقبلهم !!

حميد تم يشوف خالد بعصبية .. كان صدق منقهر منه .. لانه هالموضوع كان لازم ما ينفتح جدام الكل .. كان لازم يفتحه ويا عمه على انفراد .. بس خالد من يومه نذل ..

عبدالله تم يشوف خالد .. والغريبه انه ابتسم وبمكر .. وشكله كان مرتب الموضوع كله .. سواء تم الرفض او القبول .. خالد ما انتبه لهالشي .. بس لاحظ انه عبدالله ما تفاعل كثر تفاعل حميد ..

شيخة بفرح : انا من قبل حسيت انهم مب مناسبين لبعض .. وقتلك هالكلام يا حميد .. بس انته ما سمعتني
حميد : بس يا شيخه ... ومتى بيون أي وقت ؟
خالد بخبث : تقصد راشد وعايلته !؟
حميد طفران : هيه نعم ..!
خالد : مادري .. بشوفهم وبرد عليك .. المهم عمي انا بترخص بسير غرفتي .. تامريني على شي .؟
حميد : تصبح على خير
خالد : وانته من اهله

طلع خالد من الصالة وهو حاس بغيض كل اللي ف الصاله عليه .. بس ماعليه .. مب مهم .. المهم انه سوى اللي يباه

نهاية الجزء الخامس عشر

يسلمك يارب .. استمتعت طول اليوم أدش وأقرى يسلمك ماقصرتي ..

وبنتظرج كعادتي ..

ربــي يسلمج غلاي

الجزء السادس عشر


يوم الاربعاء
الساعة عشر بتوقيت الامارات
Pizza hut

عبدالله ومحمد يالسين في مطعم البيتزا هت يتعشون بهدوء .. وهالهدوء سببه انه محمد مرتبك ومب عارف كيف يبدا موضوع الخطبة ويا عبدالله .. ومن جهة ثانيه عبدالله يرتب شغله معينه في باله ..

محمد قرر انه يقضي ع السكوت المسيطر ع المكان .. وكح كطريقة للفت الانتباه .. بس بلا جدوى .. قرر بعدها انه يتكلم ويا عبدالله واللي فيها فيها

محمد وهو يشوف عبدالله: عبدالله .؟
عبدالله انتبه : هلا محمد .. شو كنت تقول .؟ اسمحلي سرحت شوي
محمد : ههههه ما قلت شي .. توني الا برمس .. ها خلصت عشاك ؟؟
عبدالله : لا بعدني .. ليش مستعيل .؟ بتسير مكان ؟
محمد : لا .. بس اذكر انه من عوايدك ما تحب ترمس وتاكل بنفس الوقت
عبدالله : وبعدني عند نفس العادة .. خير ؟
محمد : ممم ماشي بس انا اباك بسالفة عقب ما تخلص
عبدالله هد الشوكة والسجين وابتسم : ارمس ..
محمد : لالا .. كمل اكلك وعقب لاحقين ع السوالف ..
عبدالله : لاحقين ع الاكل طال عمرك .. قول شو عندك ؟
محمد : ممم بالنسبه لموضوع الخطبه
عبدالله جدم عمره صوب الطاوله : هيه ؟ بلاه موضوع الخطبه؟
محمد ارتبك: انا قلتلك بستخير ..
عبدالله : هيه هيه .. هيه صح قلتي بتستخير
محمد وفعلا استخرت ..
عبدالله : انزين وبعدين ..؟؟ طلعلك شي ؟
محمد : ارتحت الحمدلله ..
عبدالله وانفرجت اساريره : صدق ؟ يعني خلاص نويت ؟
محمد : هيه ان شالله نويت .. ومدحولي اياها بعد .. معني للحين متحسس من موضوع فارق السن اللي مبينا
عبدالله : فرق السن مطلوب يا ريال .. وبعدين انا دوم اشوفها تقرا .. يعني مثقفه .. والسن مب مشكله كبيرة .. حلاتها تييك صغيره عشان تشيب قبلها ..
محمد :ههههههه خلاص ان شالله هيه توافق ..
عبدالله بنظرة مكر : ان شالله .. وهيه بتحصل احسن عنك!
محمد : رمست الرضيعه .. بس حسيت مب حلوه انه تي السالفه منها .. انا ماحب سوالف اللف والدوران .. عشان جيه قلت بخبرك انته ...وانته ترمس ابوك بحيث يفاتحها .. واذا صارت موافقه نيي نخطبها رسمي
عبدالله شافه بنظرة ذات مغزى : ان شالله خير ..
محمد : تحسها بتوافق ؟
عبدالله : وليش ما توافق .؟ انته ما في منك اثنين
محمد : تسلم يا عبدالله .. وعقبالك ..
عبدالله هز راسه: ان شالله
محمد : البنت من النوع المحب للدراسه ؟
عبدالله : والله مادري .. بس ماظن ..
محمد : ليش ؟
عبدالله : عندي نظرية تقول انه اللي يدخل التقنية ما يحب الدراسه
محمد : هههههه اختي ف التقنيه وحليلها تنكرف كراف .. يعني نظريتك خاطئه ..
عبدالله : انزين لا تتفلسف .. بس ليش تسأل ..؟
محمد : استفسر عن زوجة المستقبل
عبدالله : انا احيد اللي يستفسر يسأل عن جمالها اخلاقها طولها حجمها .. مب حبها للدراسه!!
محمد :هههه يا خي كل واحد وميوله
عبدالله وهو يقطع البيتزا : الله يكون ف عونها ..
محمد : المهم انته ما نويت .؟
عبدالله وهو ياكل : على شو ؟
محمد : ما نويت تعرس ؟
عبدالله ابتسم بعد بغرابه : اكيد نويت ..
محمد : صدق ؟
عبدالله : هيه والعروس موجوده .. ان شالله جريب بتشوفني اقولك يلا محمد انا مسافر شهر العسل ..
محمد : ههههه شو اللي غير رايك ؟ وبهالسرعه بعد!
عبدالله : مادري .. الانسان يتغير بيوم وليله ...
محمد : الله يتمم على خير
عبدالله : امين

رن موبايل عبدالله .. وهالشي خلى ويهه يتغير .. لانه المتصل ناصر .. وهو كان يتريا اتصاله ..
عبدالله : عن اذنك دقايق ..
استغرب محمد : اذنك وياك

سار عبدالله بعيد بحيث ياخذ راحته ف الكلام .. اما محمد فحس بشي غريب وتم يشوف عبدالله ويحاول يلقط كلامه

" هلا ناصر .. بخير الله يعافيك .. ها حصلتلي حل ... صدق ؟؟ .. ها شو عندك ؟! ..... اوه والله ويبتها ... بس منو اللي بيسويها ؟؟ ... انته ؟ .. والله زين .. خلاص عيل موعدنا يوم الخميس .. هيه هيه يعني باجر ...مادري ...خلاص تم ..وانا بقولك عن الوقت .. اوكي الغالي .. باي .."

محمد لقط شويه من رمسة عبدالله .. بس ما فهم المغزى .. وتمت ف باله كلمة منو بيسويها ..؟ مايدري ليش حس انه مب متطمن

عبدالله : ها ييتك ..
محمد : منو كنت ترمس ..؟
عبدالله باستغراب : واحد .. ليش السؤال .؟
محمد : لا بس من باب الفضول .. واشوفك سرت بعيد .. قلت يمكن في شي جايد ؟!
عبدالله : لا بس هذا واحد من الشركة .. ويابلي معلومات عن الصفقة اليايه .. وسالف شغل انته ما تعرفها ..
محمد بشك : اها .. على خير .. على خير ..
عبدالله :الحينه ممكن اكمل اكلي ؟
محمد : ياخي غير هالعادة .. باجر يوم بتعرس بتملل حرمتك ..
عبدالله كان يرمس وعينه ع البيتزا : يوم بعرس ببرمج حرمتي على عاداتي .. وبعدين مب مهم تتملل ولا لآ .. المهم اني اعرس واييب عيال وهيه تنجلع
محمد فج عيونه : خير .!
عبدالله : ههههههه اسولف بلاك انته .. خل العروس توافق .. وان شالله عقبها بنغير العاده ..
محمد : بس خلنا نعرس ويا بعض ...
عبدالله : ولا يهمك .. فالك طيب
محمد : هيه والمصاريف عليك .. انته ما عليك قصور
عبدالله : هههههه يالزطي ..
محمد : هههههههه اسوولف
عبدالله :المهم ناوي تسافر عقب ما تعرس ؟
محمد : والله اخطط اني اكمل دراستي برع .. بس خلني ارتب امور العرس قبل وعقب ان شالله بنرتب سالفة السفر
عبدالله : الله ايسرلك امورك يا محمد ..
محمد : امين

تم عبدالله ومحمد يسولفون لين ما خلصت السوالف وعقب كل واحد رد لبيته ..

***
رد عبدالله البيت .. وكانت الصالة فاضية .. والظاهر انهم ف الصالة اللي فوق .. او كل واحد بغرفته كالعادة .. قرر انه يفاتح ابوه بسالفة ميرة اليوم .. ويفتك منها عشان يتفرغ حق الحدث العظيم اللي بيستوي يوم الخميس اذا كل شي ترتب .. كان في داخله مزيج من المشاعر
من صوب هو منقهر من الموقف السخيف اللي حطاه فيه خالد ..
وقلبه محترق من هند اللي حس انها قويه .. وانه حركتها سخيفة ..
وحاس بعد بفرح لانه باجر بيرد عليهم حركتهم بشي ما يتوقعونه..
بس شعور الخوف ملازمنه لانه الضحية بيكون انسان ماله ذنب .. ذنبه الوحيد انه اسمه انذكر جدام عبدالله


صعد عبدالله فوق وسمع حس البنات ف الصاله ... ويوم سار حصل انه ريم وهند وميرة يالسات ويا بعض .. ويوم لمح هند حس بنار شابه ف داخله .. وحس انه يبا يحرق قلبها ..

" بيي اليوم اللي تكونين فيه بذمتي يا هند .. وان شالله ما بيطول هاليوم .. انتي لي انا .. والمسأله استوت اكبر من تحدي .. المسأله صارت رد اعتبار "

دش عبدالله الصاله بدون لا احم ولا دستور .. و البنات عاقات شيلهن وما انتبهوله ..

عبدالله : ريم وين ابويه ..

ريم خافت يوم سمعت حسه والبنات حطوا الشيل عراسهن بسرعه

ريم : عبدالله كيف جيه تدش ولا تدق الباب ..
عبدالله : ادق الباب وانا ف بيتي .. ! المهم انا سألتج سؤال وين ابوج ؟
ريم : ف غرفته ويا امايه ..
عبدالله : انزين

طلع عبدالله من الصاله وهند كانت منزله راسها .. حست انه عبدالله متضايج منها ومن وجودها ف البيت .. ما تدري تلومه ولا لآ .. بس خالد الله يهديه فتح السالفة جدام الكل .. واكيد هالشي سببله احراج .. وعبدالله واضح انه ما يحب حد يحرقله ويهه جدام الكل .. وخالد سواها .. وهيه السبب .. تضايجت هند من الموقف ..
ريم : ماعليه .. عبود متعود يدش بدون ما يستأذن ..
ميرة : هيه طبعا الاثم علينا مب عليه ..!
ريم : هههه ماشالله الاخت مسلمه!
ميرة : استغفر الله !! شو شايفتني مرتده !
ريم : نص و نص ..
ميرة : اما عليج رمسات غريبه .. مادري منو معلمنج اياها
ريم : هههه انزين تعالي .. شحالها فطوم ؟
ميرة : بخير .. وان شالله بتي وياه اخوها يوم الخميس ..
ريم وهيه تشوف هند اللي واضح عليها الضيج : ليش بيون ..؟
ميرة غمزت وشافت هند : مادري .. بنعرف يوم بيون ..
ريم : شورايج تتصلين الحين وتسألين ..؟
ميرة : لا لا حلاتها يوم تكون مفاجأة ..
ريم صدت صوب هند: هنوده شو تتوقعين يايين يقولون ؟ يمكن يايين يتعرفون على قوم ابويه .. ممممم لجظه خليني افكر .. يمكن عندهم حق عدنا يوم ياخذونه .. لالا ماظن .. اكيد يايين عندهم هدف نحن ما نعرفه
هند شافت ريم وابتسمت : مفاجأة ...
ريم سارت ولوت على هند : تصدقين بوله عليج ..
هند ابتسمت : فديتج والله .. عاد اللي يقول مول انا ما بييكم .. الا ساعتين وانا عندكم ..
ميرة : لا يوم بتشوفين راشد بتنسينا .. وعقب بتم وحيده بدون خوات .." وتمثل انها تصيح "
هند : وريماني وين سارت ..؟
ميرة : انتي وايد مخدوعه فيها .. من تسيرين بتتطلع على حقيقتها ..
هند : لا حرام .. ريم ما في منها .. وان شالله يوم بترضى عني ام راشد بقولها تخطب ريم حق ولدهم الثاني ..
ميرة : اندووووووكم !! وانا !
هند : انتي ما تبينه ..
ريم : لا لا .. تبين توديني الشارجه! خليني اهنييه .. وخلي فارس احلامي ايي ويركبني على حصانه الابيض ونحلق في سماء الحب

طاحت ريم على القنفه وهيه متفاعله ويا الموقف ..

ميرة : خل عنج .. فارس احلامج اللي فيه كل هالمواصفات مستحيل يكون اماراتي .. جان لبناني بصدق .. بس اماراتي ورمانسي .. لا .. ماظن هذا موجود

ريم : وايد ماخذه فكره سيئه عن عيال الامارات ..!
ميرة : شايفتني هنديه ولا باكستانيه !! تراني راعية البلاد .. بس صدق الخليجي بشكل عام شكله غلط يوم يكون رومانسي ..
ريم : ينشوف عاد اللي بياخذج .. اخاف يكون رومانسي وتصدمينه بهالرمسه يقوم يطلقج من ثاني يوم ..
ميرة : فال الله ولا فالج يا ريموه ... شوفيها هنوده تفاول علييه ..!
هند : ههههههه والله انكم تحف .. ان شالله اييج يا ريم الرومانسي .. واييج يا ميرة اللي خاطرج فيه ..
ميرة تغمز لاختها ..: وانتي ياج اللي تبينه ؟
هند : الحمدلله .. ياني الريال اللي ابويه كان يحبه ويتمناه ..
ميرة : اونح انتي عاد بتمشين ع وصية المرحوم .. انتي اصلا تترين هاليوم .. بس تتعلثين
هند : هههههه انزين ما انكر انا ابغي راشد .. الحمدلله اخلاق وادب
ميرة : اوه وقمنا نغازل ونصرح
ريم : الحب يسوي اكثر عن جييه
هند استحت : بس عاد لا تحرجوني .. المهم انا بسير عند حبيب قلبي علاوي ..
ميرة : بذمتج حبيب القلب علاوي ؟
هند : للحين علاوي .. ف المستقبل ما ظمنلج ...

ابتسمت هند ابتسامة زادت من جمالها .. وطلعت من الصالة .. وهيه تمشي مرت صوب غرفة نورة وكان الباب مبطل شوي .. سمعتها تقول

" لا حبيبي .. بس الموضوع حز ف خاطرنا كلنا "

انصدمت هند من اللي سمعته .. مستحيل تكون نورة من هالنوع اللي يكلم شباب .. مهما كانت ومهما وصلت فيها .. لا مستحيل تكلم شباب .. اكيد فيه لبس .. وكلمت حبيبي استوت تنقال حق الجنسين .. اكيد فيه لبس ف الموضوع .. كملت هند دربها .. ودشت غرفتها ..

***
في غرفة حميد ..

حميد وشيخه وعبدالله يالسين .. وكان التوتر بعده مسيطر على حميد خصوصا .. اللي كان ميت من القهر من خالد والموقف اللي صار ..

شيخه : ها ياي تخطب بنتهم الثانيه اليوم ؟
عبدالله : يعني انتي ما ترتاحين الا اذا غثيتيني ..!
شيخة : عشان تمشي على رمسة امك .. وما تكبر راسك وتقول ما باخذ غيرها ..
عبدالله : وانا بعدني ع كلمتي ..
حميد : انته شو تقول يا عبدالله .. خلاص البنت تبا راشد .. !!
عبدالله : بذمتك يا بويه انته سألت عن الريال ؟ اذا كان زين ولا شين ..!
حميد : وليش اسأل .. عيال عمك معتمدين ولا خذوا براينا اصلا .. انا منصدم من هند .. كيف ما خبرتني حزتها .. كيف خلتني اتعرض لهالموقف !
شيخة : عشان تسمعون رمستي .. وتصدقون انها حيه ..!
حميد : لا تقولين شي عن البنت !
عبدالله : امايه انتي شو قلتي ..! قلتي انه البنت تباني عشان الفلوس .. وكلامج كله طلع غلط .. البنت مب نيتها شي من هالاساس .. والحينه تقولين انه حيه .. ! وباجر مادري شو بتقولين .. بسج حش ف الناس!
شيخة وهيه تحاول تقنعه : اسمع رمستي وخلني ايوزك عليا ..انا اعرف
قاطعها عبدالله : مابا عليا ..
شيخة : انزين بيوزك غيرها بس وافق
عبدالله : امايه انا عارفنج زين .. تبين تيوزيني عشان تتفشرين جدام العرب وتسوين عرس ما استوى ولا صار وترمس عنه بوظبي كلها ان ما كانت الامارات كلها .. انا مابا نهاية مثل النهاية اللي اخترتيها حق نورة .. وانا ما باخذ غير اللي ف بالي ..
شيخة : تسمع يا حميد .. يحملني مسؤولية طلاق اخته .. مب جنه هو اللي وقف ورا هالطلاق .. هاي رمسة يقولها يا حميد حق امه !
حميد : عبدالله تأدب ويا امك .. وبعدين خلاص فكونا من سالفة الزواج هاي .. عبدالله انته ياي كنت تبا تقول شي .. شو عندك ؟
عبدالله : بغيتك في موضوع يخص ربيعي
حميد : شو هو الموضوع
عبدالله : حساس شوي
حميد : شوتقصد ..؟؟
شيخة : شو يقصد بعد ! يباني اظهر ..!
عبدالله : انا ما قلت جيه .. جان تبين تمي .. و لا اظهري كيفج
شيخة وقفت : استح يا ولد ..
عبدالله طفر : امايه انا مب ولد .. وبليز خليني اكمل ..
حميد : شيخه .. عبدالله .. بلاكم .. شو مستوي عليكم ..! بس خلاص ..

شيخة صدت عن حميد ويلست وهيه مغيضه على ولدها اللي زادت قلة ادبه هاليومين ..

حميد : ارمس يا عبدالله
عبدالله تنهد وكان طفران من امه: ابويه انته تعرف ربيعي محمد بن عبدالرحمن بن مبارك .. اللي اخته تستوي ربيعة ريموو
حميد : هذا اللي رد من برع من جريب وتوظف ف الاتصالات .!
عبدالله : هيه هو بذاته
حميد : هيه ..بلاه..؟؟
عبدالله : ياني اليوم يخطب من عدنا ...
حميد : يخطب..!!!!
شيخة : يخطب منو ؟

عبدالله ما سوالها سالفه وتم يشوف ابوه ..

حميد : يخطب منو يا عبدالله ؟
عبدالله : يخطب ميرة بنت عمي
حميد : ميره !!!!
عبدالله : هيه ميره ..ليش مستغرب ..انته تعرف انه ميره استوت ربيعة عليا فالكليه .. والظاهر رشحتها حق محمد .. ومحمد ريال ما ينعاب والف بنت تتمناه ..
شيخة : اشهد انه بنات اخوك يا حميد مب هينات .. امس هند واليوم ميرة .. !
حميد : انتي كيف تفكرين يا شيخه .. البنت ما عليها قصور .. واكيد ربيعتها رشحتها حق اخوها مثل ما قال عبدالله
شيخه : لو مثل ما تقول جان رشحت بنتي ريم .. مب ميره ..! هيه تعرف ريم من زمان .. وانته تعرف انها تعزها وتغليها .. ولو كانت بترشح حد جان رشحت ريم مب ميره ..!

عبدالله و حميد تبادلووا النظرات

حميد : شو قصدج يعني ؟
شيخة : مادري .. اسأل بنت اختك .. يمكن لاعبه بعقل الريال ..!

ضحك عبدالله صوت عالي .. اما حميد فوقف معصب ..

حميد : شيخه ! انتي بلاج على عيال اخويه .. ليش تبين تشككيني بأخلاقهم ..!
شيخة : لاني مب مرتاحه لهم من يوم ما شبرت ريلهم هالبيت ..
حميد بصوت عالي : ميرة ما عندها هالحركات وانتي ادرى .. انا ممكن اشك ف عيالي ولا اشك ف بنات اخويه ! تفهمين

وقفت شيخه وتمت تشوف حميد بعصبيه ..
شيخه : يعني انا ماعرفت اربي عيالك يا حميد! .. مشكور وايي منك اكثر .. ومشكور على الثقه .. عن اذنكم ..

طلعت شيخه من الحجرة وصكت الباب بالقو .. وحميد تم يطالع الباب وكان شكله متلوم .. وحس انه جرح حرمته .. وطعن امومتها ..

عبدالله : ابويه شو قلت ؟
حميد وهو متحسر : بشو ؟
عبدالله : بسالفة خطبة محمد ..
حميد : ونعم الريال والله ... بس لازم نشاور البنت واخوها
عبدالله : تشاوروا على كيفكم .. بس تراه ما يتعوض
حميد وهو شارد : صدقت ياحميد صدقت
عبدالله : بس يابويه في شغله لازم انبهك عليها ..
حميد انتبه : وشو هيه ..؟؟
عبدالله : اذا رمست خالد لا تقوله انه محمد ربيعي ... اخاف يرده لانه من طرفنا ..
حميد : شو يعني لو كان من طرفنا ..!!
عبدالله : ابويه انته تعرف خالد و تفكيره
حميد :صدق ينخاف منه
عبدالله : خلاص رمسها ورد عليي عشان ارد ع الجماعه خبر
حميد : خلاص انا برمسها
عبدالله : يلا انا بظهر .. وانته سير راضي امايه .. اكيد زعلت ..
حميد : على خير ..

طلع عبدالله من الغرفه وتم حميد يشوف الارض وهو متلوم من الخاطر .. كيف تجرأ وقال هالكلام .. كيف يشكك ف اخلاق بناته اللي رباهم على ايده وايد حرمته ويثق ف عيال اخوه اللي ما كملوا 5 شهور عنده .. الله يقطع الشيطان ..

***
في غرفة نورة ..

دشت شيخة على نورة اللي كانت ترمس ف التيلفون .. ومن شافت امها ارتبكت ..

نورة بارتباك : اوكيه حبيبتي .. برمسج بعدين .. يلا فمان الله ..

دخلت شيخه ويلست حذال بنتها وهيه مغيضه ع الاخير ..

شيخه : منو كنتي ترمسين ؟
نورة : ها ..!
شيخه بعصبيه : اقولج منو ترمسين !!
نورة : هيه .. كنت ارمس ربيعتي ..
شيخه : أي وحده ؟
نورة : ربيعتي خوله .. ليش ؟
شيخه : بس ! حرام اسأل يعني ..!
نورة : لا .. بس انتي بلاج معصبه ..! شو مستوي .!
شيخه : وين ما تبيني اعصب وهالنحس ميلسين في بيتنا ويسرقون رياييلنا !
نوره ما فهمت وتمت تشوف امها بحيره : شو تقصدين امايه ؟
شيخه دمعت : انا ما برتاح لين ما يظهرون عيال عمج من بيتنا ..!
نورة قربت من امها : امايه انتي تصيحين ؟!
شيخه مسحت دمعتها : ابوج من يووا تغير علينا يا نورة .. واستووا هم اصحاب البيت ونحن الضيوف !
نورة : شو السالفة امايه .. عورتيلي قلبي .!
شيخه : اليوم كنت يالسه ويا ابوج .. وقال كلام ما يقوله الا واحد مسحور يا نورة
نورة : وشو قال ؟
شيخه : قال انا ممكن اشك ف عيالي ولا اني اشك ف عيال اخويه.!! تتخيلين يا نوره..!!

خافت نورة .. خافت وايد وحست انه ابوها ما قال هالكلام الا انه اكتشفها : شو ..!! و و و ليش قال هالكلام !
شيخه : مب طبيعي ابوج .. تخيلي يشكك بتربيتي لكم ... وواثق بتربية هالزلمه مرت اخوه ..!وشاك بتربيتي .. حتى عبدالله انجلب عليه .. وريم ..هاذيل شو يبغون منا .. شو يبغوون ؟!
نورة بخوف : امايه شو صار ..
شيخه : بنت عمج العقربه ..
نورة : هند ؟
شيخه : لا الثانيه .. ميروه المينونه!
نورة طفرت : بلاها ميره ..!
شيخه : انخطبت ..
انصدمت نورة من رمسة امها .. : شو !
شيخه : خطبها اخو علايه ربيعة ريم .. هذا اللي كان يدرس برع ..

نورة حست انه قلبها احترق .. ميرة تنخطب ..! وهيه اللي يالسه ف البيت .. واللي سنها اقرب حق محمد ما تنخطب .. ما تدري ليش حست بالغيره اتجاه ميرة .. ما تدري هيه غيرة ولا شعور المطلقة اللي يعصر قلبها كل ما سمعت عن وحده بتعرس ..

شيخه : انتي ويايه ؟!
نورة انتبهت : هيه امايه وياج ..!

شيخه : انا شكيت ف الموضوع .. وقلت حق ابوج انه مستحيل تكون عليا رشحتها حق اخوها .. لانها لو بترشح .. جان رشحت ريم او رشحتج .. ما بتسير بترشح وحده توها متعرفه عليها .. صح ولا لآ !!
نورة : همم
شيخه : جان يهب عليي ابوج وقالي الكلام اللي قتلج اياه من شوي ..
نورة : هيه
شيخه : انتي بلاج .. انا محترقه وانتي تقوليلي هيه .!
نورة اخفت ملامح الحسره اللي ف ويهها : امايه كلامج صح .. مب علايه الي رشحتها ..
شيخة : عيل منو ؟
نورة : شعرفني !
شيخه : اكيد ميرة قاصه علييه .. يمكن شافته وهو يمر على اخته وعيبها .. وقصت عليه .. هيه اكيد اكيد

نورة فجأة تذكرت كلام عبدالله اللي قاله