الجزء الواحد والعشرين ###########################
- انته شو تسوي اهنه .؟!
شهق خالد بالقو يوم سمع الصوت الياي من وراه مباشره .. وهو بوضعيته هاذي الاقرب للتجسس.. وشكله كان معتفس وحالته لله ..
عدل خالد من وضعيته .. وتم يشوف الشخص اللي جدامه وويهه كان محمر من الفشله ..
- خالد : آآآآ .. كنت اتريا عمي يخلص رمسته عشان ارمسه .. بس الظاهر انه بيسولف ويا حرمته .. ماعليه بعدين برمسه ..
نورة تمت تشوفه بشك .. وكانت نظراتها تربك اللي جدامها وتخليه يشك في عمره
- نورة : جان زقرته .. احسلك بدال ما تتصوخ عليهم .. وتسمع كل شي يقولونه
خالد اصطلب في مكانه .. وعقد حيايه ..
- خالد : انا ما اتصوخ على حد لو سمحتي .. وبعدين انا حر .. انتي مالج علاقه فيني .. تفهمين ؟ لازم ترزين بويهج يعني في كل شي يخصني ..؟
- نورة : ومنو تكون عاد عشان ارز بويهي بكل شي يخصك .. ان سرت ورديت اتم خالد
خالد تيمع الدم في ويهه .. نوره قاصده تستفزه اليوم .. تم يطالعها من فوق لين تحت وما رد عليها .. وهيه استغربت من ردة فعله .. وفقلا كانت تبا تحرق اعصابه
- نورة : عيب عليك يا خالد .. عيب عليك اللي تسويه .. ترضى حد يتصوخ عليك ولا على اهلك ؟! قولي ترضى .؟ وبعديت عادة التجسس مرفوضه عند كل حد .. عيب عليك انته ريال عود وفاهم
حس خالد بالمقابل انه الدم تيمع في ويهه .. وانه نوره فعلا احرجته بكلامها ..قبض ايده بالقو وعض على شفايفه وقال بهدوء متصنع
- خالد : بس انا ما كنت اتوصخ يا نورة ..تفهمين ولا لآ
- نورة : خالد يعني بتقص عليه وانا شفتك بعيني .. كنت واقف اهنيه شو تسوي يعني ؟ خبرني شو تسوي ..؟ ريال وحرمته يرمسون شو موقفنك جريب منهم ؟!
خالد بصوت عالي وبانفعال وضح في حركات ايده
- خالد : قتلج كنت اترياهم يخلصون عشان ارمس عمي .. بلاج انتي ؟!
- نورة بازدراء : أحاول اصدقك
خالد انفعل وبدون مقدمات ولا سابق انذار ..
- خالد : نورة انتي شبلاج عليه ..! ليش تتعمدين تطلعيني قليل اصل وذوق ..؟ انا ولد عمج مب غريب عنج .. كلكم في هالبيت نفس الطينه ..! كلكم شكاكين ؟!
نوره استغربت من ردة فعل خالد .. اللي نهد عليها بالكلام مره وحده ..
- نوره : انا ما قلت شي يا خالد عشان تنهد عليه ..! بس وضعيتك اهنيه غلط .. مليون بالميه غلط .. انا ولا غيري كان بيقولك نفس الكلام .. وبعدين انته بلاك مستوي متناقض .. يوم زين وخمسين لا .. ملينا من نفسيتك هاذي ياخي .!
خالد وقف جامد .. صدق حس انه متناقض في مشاعره وخصوصا وياها هيه .. وميود عمره ع الاخير .. وسح انه نوره اهانته ..
- خالد : انتي اييه .. مب اني سكت عنج تاخذين راحتج .. ولا تقولين كلام اكبر منج .. لانه هالشي مب مصلحتج .. وبعدين انتي اخر وحده ترمسين عن العيب .. انتي ما عرفين العيب اصلا ..!
نوره طاحت عليها الكلمات مثل السجاجين من خالد .. شو قصده ؟! وليش هيه بالذات ..
- نوره : انا اخره وحده ارمس عن العيب .! ليش ان شالله ؟! انا شو مسويه استاذ خالد ؟
- خالد : كل واحد منا يعرف شو مسوي .. وماله داعي اقولج ولا تقوليلي .. وانتي ادرى بعمرج ..
نوره حست بالدم متيمع في ويهها .. وان اعصابها وصلت على حافة الانفجار
- نوره : انتي اصلا ما تستحي على ويهك .. وانا الغبيه اللي مضيعه وقتي ويا واحد تافه شراتك .. انا الغبيه اللي واقفه ويا واحد قليل ادب وما منه خير ..
- خالد : حدودج يا نوروه .. ما سمحلج تغلطين عليه يا بنت حميد ..
- نوره : بنت حميد هاي تاج راسج .. تعرف شو يعني تاج راسك .. حميد هذا اللي ترمس عنه باستخفاف .. هذا اللي بنالكم حياه مثل الناس بدل من حالتكم اللي ما يعيشها افقر فقير ف هالدنيا ..
- خالد بصوت اعلى : تخسين .. تخسين .. مب من جيب حميد .. هذا كله من حقوقنا .. حقوقنا الليي " عض خالد على شفايفه وما كمل "
- نورة : كمل رمستك .. كمل رمستك لو فيه خير .. أي حق هذا اللي ترمس عنه ..! اظهر علي حفيفتك .. طول الفترة اللي طافت وانا اقول انك حاسد وجاحد
- خالد : كفينا من شرج يا نوره .. وحلي عن سماي ..
- نورة : ما بحل .. شو بتسوي يعني ؟؟
- خالد : انتي شو تبغين مني .. لاحظي انه انتي اللي تتحرشين فيني مب انا .. وبعد تطولين لسانج ؟! انتي شو من البشر انتي .؟! حلي عني عاد
- نورة : مب من زينك عشان اتحرش فيك .. ! اقصاك حرامي ياي تسرق حلالنا وتفل .!
- خالد : حرامي في عينج يا مسوده الويه .. وتراج زودتيها وايد .. واي كلمه ثانيه لا تلومين الا نفسج .!
- نورة : لا بقول وبقول .. كيفي .. انا حره .. ومب انته اللي بتوقفني وبتملي عليه اوامرك .. انا نورة يا خالد .. مب ريم تقص عليها بكم كلمه ..
- خالد : انتي اقصاج وحده مطلقه معيوفه محد يباج ..!
نوره يتها الكلمات مثل القنابل تفجر اوصالها نتفه نتفه .. حست انه الكلمات يتها في الصميم .. وانه جرحها جرح كبير ما بينبري .. دمعت عيون نورة وهيه تشوف خالد .. وفجأة و بدون مقدمات ..
رفعت ايدها .. وصفعت خالد بالقو .. صفعه ما توقع انه يتلاقاها بحياته .. وبالذات من حرمه ..تم خالد يطالعها وهو حاط ايده على خده اللي غدا احمر في وسط بياض بشرته .. اما هيه فتمت تمر نظراتها بين ايدها .. وكانت ترتجف وتصيح بنفس الوقت ..
- نورة بصوت مرتجف : انا .. انا ..
حطت نورة ايدها على ويهها وانفجرت صياح .. كانت تصيح بصوت عالي وجسمها كله يرتعش من فوق لتحت .. نورة كانت حاسه بخليط من المشاعر .. مجروحه وبنفس الوقت خايفه ومب مستوعبه شو اليي صار .. وكيف قدرت تسوي اللي سوته
اما خالد .. فما زال يشوفها .. حس انه يبا ينقض عليها مثل الفريسه اللي ظفر فيها .. يبا ينتفها .. كيف تجرأت ومدت ايدها عليه ..
وفجأة وبدون مقدمات .. ياهم شخص ما كان متوقع حضوره .. ياهم يركض .. بس يوم شافهم بهالوضعيه انجبر انه يسكت ويبلع لسانه .. مب عشان شي .. بس عشان يستوعب شو اللي يصير .. نوره تصيح من خاطرها وخالد ماسك خده ويشوفها بنظرة غريبه مب مفهومه ..
ريم تمت واقفه مثل الهبله .. تشوف شخصين في وضع غلط .. شخصين ما توقعت انها تشوفهم بهالوضعيه بحياتها .. ما عرفت شو تسوي .. وكيف تصرف انتباههم لها .. ما عرفت غير تغير هالوضعيه اللي ما حبتها بالمره ..
ريم : خالد .!؟
صد خالد بسرعه لمصدر الصوت المفاجئ ... ريم ..! لا مب وقتها .. مب وقت ريم الحين ...! تم خالد يطالع ريم اللي كانت تبادله نفس نظرات الصدمه .. ونورة رفعت راسها هالمره وتمت تشوف اختها ودموعها مغطيه ويهها الجميل .. ما عرفت شو تسوي .. وحست انه اختها انجرحت .. واكيد فهمت الموضوع غلط .. استحت من وضعيتها .. وبكل هدوء انسحبت وخلت الحلبة بمصارعين بس ..
خالد يوم شافها مركزه فيه .. نزل راسه
- خالد : كانت ..
- ريم قاطعته و بنظرة خاليه من التعابير : اختك فوق تدورك .. تباك توديها المستشفى ؟!
خالد من سمع اسم المستشفى .. انتفض .. وتم يحدق في ريم ..والخوف وضح على عيونه
- خالد : المستشفى ؟ ليش شو مستوي ؟ منو متعور
- ريم وهيه ما زالت تخفي تعابير الصدمه والحزن ع اللي شافته : محد .. بس علاوي مريض .. تباك توديه المستشفى ..
- خالد : خلاص .. قوليلها اني ف السياره .. لا تطولون اوكيه
ركض خالد بسرعه نحو سيارته لسببين .. اولهم انه خايف على اخوه ويبا يوديه المستشفى بسرعه .. وثانيهم انه يبا يتخلص من نظرات ريم اللي حرقت قلبه
تمت ريم تشوفه لين ما ركب السياره بنظرة حزن وألم يعتصر قلبها .. الافكار تييبها وتوديها ..
" شو كانوا يسوون ؟! وليش نوره كانت تصيح وخالد يشوفها بنظره غريبه .. اصلا ليش هم الاثنين ويا بعض بهالمكان ... معقوله خالد يحب نوره .. لالا مستحيل ... هو ما كان يواطنها .. بس شو سبب كل اللي صار بهالبقعه ..! "
مشت ريم شوي شوي وحست انه ريلها من تشلها من الي شافته .. كانت تمشي وافكارها السودا تحاصرها .. كانت تتخيل انه اختها يالسه تسحب خالد منها شوي شوي .. وبدون ما يحس او تحس ..
دخلت ريم للبيت ومنها صعدت الدري ووصلت لغرفة هند وقالتلها انه خالد يترياها .. وعقبها دشت غرفتها وقفلت على عمرها الباب وانخرطت في بكاء طويل ..
###########################
في معمعة الصياح و النواح اللي امتلك نورة عقب كلمات خالد .. كانت نوره تصيح من خاطرها مثل اللي فقدت ناس غالين على قلبها .. تحس انه خالد كان ماسك خنجر ويضربها فيه .. لين ما ماتت وماتت احاسيسها ومشاعرها .. حست انه مسكها من ايدها اللي تعورها وعرف نقطة ضعفها
نست نوره في هاللحظه خليفه وحبها لخليفه .. نست كل شي جميل في حياتها .. وكان الشي الوحيد اللي تقدر تتذكره .. هو الخنجر اللي طعنها فيه خالد .. !! ...
دفنت نورةه ويهها في المخده وكانت ماسكه اطراف الشبريه بقوه .. وشعرها كان مغطي ويهها بطريقه عشوائيه ..حست نوره انها تبا ترقد .. ترقد وتنسى كلمات الحقير خالد .. كانت تتمنى انها ترقد وتنش تحصله ميت .. مطعون .. مذبوح .. بس المهم ما تشوفه بعد اليوم .. ولا تسمع حسه الشيطاني ..
غرست نورة ويهها في المخده اكثر .. وكانت تباغم بصوت خفيف .. بس حزتها انفتح باب غرفتها .. ودخلت شيخه امها .. اللي وقف قلبها يوم شافتها بهالوضعيه الكسيفه .. تمت شيخه تشوف بنتها بحيره وصمت .. تشوف نورة القويه اللي في هاللحظة تحولت لطفله.. كانت خايفه تسألها ... تخاف تسمع خبر يهزها .. توها يايه من الصاله ومتأكده انه كل عيالها بخير .. عيل نوره ليش تصيح ؟! شو اللي مخلنها تنهار لهالدرجه ..!!
قربت شيخه من بنتها شوي شوي .. ويوم وصلت يلست حذالها وحطت ايدها على راس بنتها عشان تهديها .. وتتخبرها عن اللي عاصر قلبها .. .. وبمجرد انه تلامسوا .. نقزت نوره وهيه تشهق بالقو ..ويلست على ركبها وهيه تشوف امها بنظرة خوف
شيخه وهيه حاطه ايدها على قلبها ..عقب ما سوتلها نورة فلم رعب سريع
- شيخه : بسم الله الرحمن الرحيم ... نواري ؟ حبيبتي يلاج ؟! بسم الله عليج الرحمن .. شو مستوي .. ليش الدموع تارسه ويهج !!
نورة تمت تطالع امها وجنها اول مره تشوفها .. او كأنها ما تعرفها .. . كان قلبها يدق بالقو .. وانفاسها متتابعه
- شيخه وهو تهز بنتها : بسم الله عليج نواري ؟ بلاج تتطالعيني جيه .. خوفتيني عليج ..؟
نوره اخيرا استوعبت انه اللي جدامها امها ..امها وملاذها الوحيد .. وردت الدموع تضايق عينها .. وبلحظة ضعف .. حطت نورة راسها في حضن امها ...وغرسته بالقو مثل اللي يبغي يحتمي فيه
- نوره بصوت حزين: امايه انا تعبانه
شيخه كانت مستغربه من ردات فعل بنتها الغير متوقعه بالمره .. اللي يشوفها يقول انها مينونه ..
- شيخه : من شو فديت عمرج ؟؟ قولي حق امج شو مستوي .. شو صاير ..؟منو مضايجنج وجالب حالج ؟
رفعت نورة راسها وتمت تشوف امها لنظرات حزينه ..وكانت تحاول ترمس بس الكلمات ضاعت منها .. وهالشي خوف شيخه زياده .. وحست انه بنتها طايحه في ورطه .. وسار فكرها بعيد ...بعيد وايد .. كانت تفكر في انه نوره يمكن تكون سوت شي غلط .. او او او
- شيخه بعصبيه : نوروه ارمسي لا تحرقين اعصابي ؟ شو مستوي عليج ؟؟ ليش جيه مسويه في عمرج .. ؟!!!
- نورة : امايه ماشي .. بس انا ضايجه .. ضايجه وايد يا امايه ..
- شيخه وهيه ترفع راس بنتها : من شو الغلا ..؟ شو اللي مسوي فيج جيه ؟!!
- نورة : ماشي يا مايه .. خليني في حالي ..خليني
- شيخه : لا ما بخليج .. عنبوه انا امج مب غريبه عنج .. قولي شو مستوي .. والله لخلي اللي مسوي فيج جيه يندم على اللي سواه .. بس ارمسي فديت عمرج
نورة ماعرفت شو تقول .. وما كانت تبا تييب طاري خالد لانها تدري انه امها ما بتسكت .. وبتسويله سالفه مالها اول ولا اخر .. هيه في الواقع ما كانت خايفه على خالد .. لا .. بالعكس خايفه على امها من خالد .. اللي شكله ما عادت تفرق وياه .. فقررت تألف سالفه من عندها
- نورة وهيه تمسح دموعها : ماشي بس وحده من ربيعاتي عقت عليه رمسه ما تنقال .. يا امايه تعايريني لاني مطلقه وتقول انه محد يباني .. ومن هالكلام .. قهرتني يا امايه .. ذبحتني بكلامها ..!
- شيخه : هههههههههه بس هذا هو اللي قاهرنج ؟!
- فتحت نوره عينها ع الاخير : يعني كلامها ما يقهر يامايه ..!ما يذبح .. امايه اقولج تعايرني ..!
- شيخه بخبث : اكيد لا .. لانها كلامها غلط ..
- نورة : لا مب غلط .. هذا هو الواقع .. انا من تطلقت الكل نفر مني .. حتى الخطاب اللي كانوا يبوني قبل وما عرسوا للحين .. ما ردوا مره ثانيه .. انا محد يباني ..!
- شيخه : كلامج كله غلط يا نوير ..من فتره كذا خاطب ياج "مبالغه " بس انا رديتهم شفتهم مب مناسبين لج .. وانا ماباج تكررين نفس تجربتج الاوليه ... .. بس اليوم ياج اللي يستاهلج .. والريال اللي اشوفه مناسب لج .. واللي اكيد ما بفرط فيه
نوره تمت تشوف امها بهبل ..!! اليوم ياي واحد يخطبها ..؟! اليوم ؟! شمعنى اليوم ؟! معقوله يكون هو .. ؟ معقوله يكون خلييفه سواها ويا خطبها .. يعني هو كان صادق ؟! .. يعني ما كان يقص عليها .؟! وليش تشك بهالشي ؟؟ هو من يومه صادق وياها ...
حست نوره انها مب فاهمه شي .. ونظراتها الهبله ما زالت ملتصقه بعين امها ..! ..وتحاول تحصل تفسير
- نوره بكلمات بطيئه ومبهمه : بهالسرعه .!؟
- شيخه باستغراب : أي سرعه .. ليش انتي من يوم ولا يومين مطلقه !. من فتره .. وبعدين ربيعتج هاي لا تردين عليها .. بييها الرد يوم بنطرشلها بطاقة العرس ..
- نورة بلهفه : منو خطبني ..؟!
- شيخه : ولد ربيعتي حمده .... ولد زين و ولد عز .. وبيعيشج احسن عيشه .. بالذات انه عاش تجربه جريبه من تجربتج ..يعني مستحيل يكررها ... وهالشي من مصلحتج .. و مبارك شارنج يا نوره ..
نورة تمت تطالع امها مستغربه .. واحد ثاني ياي يخطبها .!؟ مب خليفه يعني ؟! وليش الحين ...؟ ليش يوم خليفه بغاها ياها الخاطب الثاني ...وبعدين وينه خليفه ..! ؟
- شيخه : الريال كذا مره تقدملج بس الوقت ما كان مناسب ..بس الحين يا الوقت اللي نرد فيه على رمسة الناس .. انا قربت بالجماعه .. وهو ما عليه كلام .. يعني تبين الصدق دش مزاجي ... وانتي بنتي المطيعه وما بتردين كلمتي صح ولا ..؟
نورة تمت تشوف امها اللي يالسه تخطط و ترتب على كيفها .. وكأنها هيه اللي بتعرس ..! ولا كأنه نوره مالها وجود .. او ماتت في لحظة بدون ما تدري .. تلون ويه نورة باللون الاحمر .. وهالمره من العصبيه .. كيف تقرر وتوافق بدون ما تاخذ رايها .. مستحيل تفرط بخليفه لو شو ما كان
- نوره بعصبيه : لا يا امايه برده .. انا مابا هالريال ..! تسمعيني .. ماباه ..!!
شيخه صعقتها الكلمات .. كانت تتوقع انه بنتها تسايرها في كل شي .. كانت تظن انه نوره ما بتردلها طلب .. وانها تفكر بالزواج والحين أكثر .. عقب ما استوت علج في حلوج الناس ..
- شيخه : عيدي مره ثانيه .؟! شو قلتي ؟1
- نوره : قلت مابا هالريال .. والزواج هذا بكبره ما بغيه ...! يوزيه ريموه جان تبين .. بس انا لا
- شيخه : وليش ان شالله ؟!
- نورة : لاني مب مرتاحتله ..!
- شيخه : وانتي عرفتيه عشان ترتاحيله ..!
- نورة : امايه انا مابا اعرس الحين .. ودخيلج لا تضغطين عليه .!
- شيخه : شو هالرمسه اليديده ..!شو مابا الحينه ومابا بعدين .. ! ليش هو ع كيفج ؟!
- نورة : عيل ع كيف منو امايه ! اكيد راييي اهم راي
- شيخه : لا حبيبتي .. ما عدنا بنات يتمن بدون عرس .. انتي تتحرين كل مره حد بييج .. انتي الريال يوم بييج لازم تتيودين فيه بايدج وضروسج عسب ما يطير منج .. وبعدين عيبتج رمسة ربيعتج .. هاي وحده .. وباجر كلهن بيعيدن نفس الرمسه .. تبيني اشوفج كل يوم على هالحاله ..
- نوره : امايه انا ,,,,
- قاطعتها شيخه : لا امايه ولا ابويه .. هيه كلمة وحده .. الريال هذا انا ما برده .. وبتاخذينه .. وشكلج يا نوره ما عقلتي .. ولازم انا اختارلج شو المناسب لج من غيره .. تفهمين ..الريال هذا بتاخذينه
وكانت تعيد كلماتها الاخيره ببطئ عشان تفهّم نوره ..
- نورة بنظرات رجاء : امايه شو هالكلام.. انا مابا اعرس .. مابا .. مب غصب ..انا مب ياهل عشان تغصبيني على شي انا ما بغيه
- شيخه : اللي عنديه قلته ... وزهبي عمرج عقب خطبة بنت عمج يوم الخميس .. بشوف موعد وياهم .. ولا تحاولين تقولين شي .. لاني قررت خلاص ..ورايج احتفظي فيه لعمرج .. لانه ما بيفيدج في شي
- نوره : بس يا امايه .!
طلعت شيخه من الغرفه وخلت نورة مغيضه ومنقهره من امها ..ومب عارفه شو تسوي ..! امها حزمت امرها وجنها هيه اللي بتعرس .. ولا خذت رايها وجنها بايره و ما صدقوا حد يتقدملها .. شيخه كانت ترمس ونوره تسمع صوت خليفه وهو يقولها انه بيتقدملها .. وكأنهم ردوا خمسين سنه ورا .. يوم كان راي البنت ما ينأخذ .. يوم كانت البنت تنخط اليوم وتنزف باجر ..
فجأة نقزت نوره من مكانها .. و نظراتها ما زالت معلقه في الباب
نورة بصوت مسموع : لا مستحيل اخونه ..! مستحيل اقبل بهالزواج .. مستحيل .. هيه انخلقت عشان تكون لخليفه .. وما بفرط في حبي له لو كان على حساب رضا امايه .. خليفه انا لكأ .. لكـ بروحكـ
شلت نورة موبايلها واتصلت في خليفه ..
" خليفه انا لازم اشوفك الحين ... الحين .!! "
يتبع >>>
08-09-2007, - 02:20 AM
رد: انتقام خالد
