صباح الخير للجميع يشرفني ان اتقدم بهذه المشاركه كمصافحه اولئ لاعضاء المنتدئ..........
وأرجو أن تنال على اعجابكم....
الجريمه
علم لفانـي كـدر البـال تكدير
وبيح سدود في ضميـري خفيـات
يهتز منه يا مـلا كشـب والنيـر
وطويق مع ثهلان من عقب ابانات
احسبه حلم وقمت اعبـر تعابيـر
واثره حقيقه والدواهـي سريعـات
قالوا ترا بن ....شيـخ المناعيـر
عطىو.............. عطاياه جزلات
ساق الهنوف اللي تغنى بها الطيـر
للشايب اللي فيه رجفـه وميـلات
يوم انتبهـت الا دموعـي مناثيـر
و جريت لي ونـه وونـه وونـات
للهم في صدري سنـودو محاديـر
ومن العنا عديت روس الطويـلات
هو صدق؟قالو صار من دون تفكير
وشلون؟قالوا خلص الوضع بسكات
والبنت؟؟قالو خانهـا كـل تعبيـر
ولحدن شاورها على فايـت فـات
عجزت انـا ادور مبـرر وتفسيـر
والوضع كايد مالنـا فيـه حيـلات
تكفى يابو ....زبـون المخاسيـر
والحر مثلـك يفعـل المستحيـلات
كليب يوم ان نخـى سالـم الزيـر
جرع بني مره حسايـف وويـلات
وانا انتخي بك بل وقـع المحاذيـر
وقـع ينـوخ حامليـن الثقيـلات
تكفى ترا الموضوع يحتاج تغييـر
والدرب واضح مانبي فيـه لفـات
مانتـه ببيـاع البنـي الغنـاديـر
يكرم جنابك وانت نبـع المـروات
ولا انت عبـد وجيـه والا دنانيـر
نفسك عزيزه عن دروب المـذلات
والعظم لو يكسر نفع فيـه تجبيـر
لكن ماتجبـر كسـور الزجاجـات
ولو ان للشاطر اذا اخطـا معاذيـر
ما كان عدت زلتـه عشـر زلات
ومن يقترب يا شيخ من نافخ الكير
لا بد ما يصـلاه صالـي وكيـات
ياشيخ عطها شايب يـم كشميـر
اهـون ولا.....,,وجـه النـذالات
جريمتـك كبـرى بكـل المعاييـر
وبناتكـم ماهـم لمثلـه حليـلات
والله لو جاب الذهب حمله بعيـر
تحرم عليه اغلى البنات العفيفـات
يارب وانت اللي بيـدك التياسيـر
تبري جروح في ضميري خفيـات...
وأرجو أن تنال على اعجابكم....
اخوكم (ناصر بن سعد بن ناصر ال جارالله الدحيمي القرني )...
الجريمه ... 
