كان في رجل اسمه الشيبي عنده ضاحية((نخل)) , وكان عنده بنغالي اسمه عبدالجبار, راعي النخل.
وكانوا دوم يشتغلون في النخل من الصباح حتى قريب المغرب, وكان عبد الجبار وايد يشتغل مسكين وعلى نياته, من الدوام للبيت, ومتعود يوم يروح البيت صارفله الشيبي حمار, علشان يوصله, ليش ان البيت شوي بعيد.
وفي يوم من الأيام قال الشيبي لـ عبدالجبار انت روح لا تنتظرني عقب بي البيت, قال عبد الجبار ان شاءالله أرباب. وتموا على هذا الموال,إلى أن جاء يوم لاحظ فيه عبدالجبار أنه كل ما وصل البيت يلاقي الشيبي داخل البيت واصل قبله. وكرر الشيبي السالفه كذا مره, مع إن عبد الجبار يطلع من النخل قبل الشيبي, الريال (جن جنونه) وموعارف شو السالفه وفي ذاك اليوم مافي اختراع اسمه سياره.
على العموم فكر عبد الجبار وقال ( أنا اليوم لازم أعرف أرباب كيف سير داخل بيت قبل أنا). وضع عبد الجبار الخطه وهي: لما يقول أرباب سير بيت أنا مافي سير بيجلس ورا نخل شوف أرباب كيف ايجي سرعة.
فقعد عبدالجبار ورا النخل بعد ماقاله الشيبي روح, وكان طبعا قريب المغرب, فشاف العجب المسكين ما صدق طلعت اعيونه وطاح قلبه في بطنه.
سمع الشيبي يقول: (((*ع*ع*ع*ع*ع*)))...وطار الشيبي على ظهره بعد ماقال هذه الكلمات الغريبه اللي ما فهم منها عبد الجبار ولاكلمه. بس المسكين عرف كيف المعزب يوصل قبله للبيت, يعني عرف ان المعزب ســـــــــــــاحر . وتم عبد الجبار يراقب الشيبي كل يوم إلين ما حفظ الكلمه السرية.
وفي أحد الأيام أمر الشيبي عبد الجبار انه يروح البيت, قاله ان شاء الله أرباب, فسارعبد الجبار وانخش في مكان, بعد ما حلق وطار المعزب في الجو, وانطلق في رحلته, قال المسكين ليش ما ألحقه على نفس الطريقه الجويه الأسرع.
فقال عبد الجبار المسكين((*ع*ع*ع*ع*ع*))) وشاف نفسه طاير في الجو.
على العموم الشيبي وصل البيت, وانتظر عبد الجبار ساعتين لكن ماوصل. طلع يدور عليه مني مناك ما في حد, ورجع البيت ويتسائل وين راح البنغالي. على صوت دقات الباب طلع الشيبي يركض ويقول منوه عالباب؟ قاله واحد من الرياييل: روح شوف البنغالي المسكين يزقر(ينادي) عليك اشو سويت به يالشيبي . يقول الشيبي: وينه ودوني له. وأخذ هذا الريال الشيبي للموقع اللي تفاجأ فيه الناس والشيبي ..شافوا المسكين عبد الجبار طاير ومو قادر ينزل ما عنده الكود نمبر مال النزله. وانفضح الساحر الملعون وانكشفت قصته بسبب عبدالجبار.
يحليله الله يعينه:D