lililiـــــــــــــــــــــــــــــــ في البيت ـــــــــــــــــــــــــــــــlilili


حميد:- أمايه ... اريد ارمسج شويه...
أم ظبيه:- لبيه الغالي... شي في خاطرك؟!
حميد:- والله في سالفه أريدج اتكلمين أبويه فيها...
أم ظبيه:- ربك ما شر؟
حميد:- لا ما شي... إنتي تعرفين أني محير ميثه بنت عمي من سنين . وأنا خلاص نويت أكمل نصف ديني...
أم ظبيه:- هذا الشور الزين والله... ترى العرس ستره للحرمه والريال..ز
حميد:- ما أدري بس أريدج اترمسين أبويه عشان يرمس عمي...تراه حمد ولد عمي بيرد البلاد عقب أسبوع وبيرتبشون العرب برجعته وأنا إللي بضيع بين الريول...
أم ظبيه لا أفا عليك محشوم يا الغالي... مره لا تحط في خاطرك شي أنا برمس بوك وبخليه يرمس عمك...
رمست أم ظبيه ريلها وقالتله إن حميد يريد يملج على بنت عمه ميثه... وبعدها بيومين رمس بو ظبيه خوه وقاله يشاور البنيه علشان يملجون بسرعه... وتكون الملجه عقب ردة حمد للبلاد...
ظبيه:- ما تتخيل يا سعيد شوه العرب مرتبشين بييت حمد البلاد وزاد عليهم حميد بملجته الله يعين والله ... من يومين ما نمت عدل والله حتى الجامعه طنشتها اليوم وما رحت لها...
سعيد:- لا والله؟! لهدرجه ردت حمد تعنيلج وايد...
ظبيه:- سعيد... حمد ولد عمي وبس وأنا عمري ما فكرت به غير جيه... وبعدين احنا مرتبشين عشان ملجت حميد مب عشان حمد...
سعيد:- ممممممممممم...
ظبيه:- لا والله؟! شوه معناه هذا؟! حبيبي تغار؟
سعيد:- أغار؟؟؟ إلا بموت من الغيره ...يكفي إنه ولد عمج...
ظبيه:- وشوه يعني ولد عمي... حبيبي هو ولد عمي صدق ... بس مستحيل يفكر بلَي في بالك ...
سعيد:- ليش مستحيل؟! هو بس بيشوفج مره وبيموت عليج...
ظبيه:- ههههه... بس أنا ما بموت ... لأني ميته من أول يوم شفتك فيها...
سعيد:- قولي والله...
ظبيه:- والله... والله...والله...
سعيد:- فديت عيونج... ظبيوه تحبيني؟؟؟
ظبيه:- يمكن كلمة أحبك ما توصف إحساسي صوبك...
سعيد:- فديتج ... أحبج ظبيوه...

في الميلس
حمد:- شحالج عمتيه؟ ريج بخير؟
أم ظبيه:- بخير الله يسلمك... إنته شعلومك وشو علوم الدراسه؟
حمد:- الحمدلله ... خلصنا الدراسه وافتكينا... وردينا البلاد...
أم ظبيه:- فديتك لازم تخلص وإلا 5 سنين بعيد عن هلك وما يدرون بحالك مب شوي...
حمد:-يالله يا عمتيه تراني كنت ارد البلاد...
أم ظبيه:- وين ترد؟؟! ما نشوفك إلا بالسنه مره...
حمد:- شوه إنسوي عاد... أقول عمتيه وين الربع ماا اشوف حد منهم؟؟؟
أم ظبيه:- والله خليفه شال حرمته ومودنها صوب هلها... وحميد ما نشوفه والبنات في حجرهن... اصبر شويه بزقرهن يسلمن عليك...
راحت أم ظبيه صوب سلامه وظبيه وزقرتهن علشان يسلمن على حميد ولد عمهن... ورجعت الميلس فدخلت أم ظبيه الميلس وعقبها سلامه وظبيه وسلمن على حمد...
سلامه:- هلا بو شهاب شحالك؟
حمد:- هلا والله شحالج سلامه؟
سلامه:- بخير الله يسلمك..
حمد:- شحالج ظبيه؟
ظبيه:- بخير الله يسلمك.. إنته اشحالك؟
حمد:- بخير ونعمه دامنا في البلاد...
سلامه:- لازم من شرب ماي العين ما صبر عنه...
حمد:- هيه والله... هاه سلامه وين موصله في الدراسه؟
سلامه:- ثاني ثانوي... احم احم ... علمي...
حمد:- يا سلام علمي بعد... وانتي ظبيه؟
ظبيه:- أنا ثاني سنه جامعه...
حمد:- والله؟! أي كليه؟!
ظبيه:- علوم انسانيه...
حمد : ما شالله... عنبوج يا الدنيا والله آخر عهدي بج في الإعدادي...
ظبيه:- أفا عليك بو شهاب كبرنا...
حمد:- هيه والله...
فجأه رن تلفون البيت ونشت سلامه علشان ترد عليه وكانت خالتها متصله فزقرت سلامه أمها علشان تكلمها وفضى الميلس بظبيه وحمد...
حمد:- يالله يا الدنيا قدج تتغشين مني...
ظبيه:- كبرنا يا بو شهاب...
حمد:- بس ما كبرتي عليه... أنا حمد وإلا ما تتذكرين يوم إنا كنا نلعب ويا بعض...
ظبيه:- حمد إنته تتكلم عن 9 سنين طافن... كيف تتوقع إني بتم ياهل... السنين تطوف...
حمد:- السنين الطوف... بس هذا ما يخليج تتغشين عني... إذا سلامه ختج ما تتغشى عني... وترمسني عادي...بس إنتي وايد متغيره عن آخر مره شفتج فيها...
ظبيه:- حمد... زمن سلامه غير عن زماني... وأنا آخر مره شفتك فيها كانت من 5 سنين... فلا تتوقع إني ظبيه الجديمه...
حمد:- لا الظاهر إن الجامعه غيرتج... وأنا أشوف إنج وايد تغيرتي مب بس في أفكارج لا حتى بشكلج...
يلس حمد يطالع ظبيه من راسها لريولها لدرجه إنها حست أنه فيها شي غلط...
ظبيه:- اسمحلي حمد... عليه امتحان بروح أذاكر...
ونشت ظبيه رايحه صوب الباب فنش وراها حمد وسألها...
حمد:- ظبيه... قالولي عندج موبايل... فلو سمحتي أريد رقمج...
فالتفتت ظبيه صوب حمد وهي معصبع وقالتله...
ظبيه:- حمد... الظاهر أن العشره مع الأجانب ظيعت مذهبك...
حمد:- ظبيه... ظبيه...
طلعت ظبيه من الميلس وهي معصبه لدرجة أنها كان في خاطرها تذبح حمد...وكلمت ظبيه سعيد ذاك اليوم بس ما قالتله عن موقفها مع حمدوما حبت تزعجه بهسالفه التافهه... بس حمد كان في تفكيره شي ثاني

حمد:- والله يا بوغنيم ما كنت اتوقع ظبيه لهدرجه تغيرت...
سالم:- ليش حمد؟ إنته شو كنت تتوقع ؟ ظبيه كبرت وما شالله عليها ينعق فيها القصيد من حلاتها... وما فوق أخلاقها شي...
حمد:- آآآه ...إمبين عليها... ياخي قلبي فز يوم هلت عليه في الميلس والله لو مب المستحى ما أعرف شو كنت بسوي...
سالم:- هذا والبنت ظاهرتلك متغشيه وهاي حالتك الله يعين عيل لو إنك شفت ويها...
حمد:- والله ياخي قهرتني... أول شي ظهرت متغشيه وبعدين ما طاعت تعطيني رقمها...
سالم:- حمد إنته في الامارات مب في لندن... وعن هالحركات ترى ظبيه بنت عمك... والله والله لو بويه وإلا عمي دروبك والله بيذبحونك...ههههه... وإلا بيوزونك ظبيوه...
حمد:-يا ليت والله...
سالم:- حوه بو شهاب... شويا ليت والله؟ شوه طبيت خلاص؟
حمد:- لا طبيت ولا شي بس عيبتني ... وما بلقى أحسن من ظبيه...
سالم:- خلاص عيل رمس بويه يكلم عمي...
ورمس حمد بوه وقاله أنه يريد ياخذ ظبيه بنت عمه...

في الميلس

كان بو ظبيه مسوي عزيمه عردة حمدالبلاد وكان فيها كل هلهم إلل من العين وإللي في دبي إللي في بوظبي... وانحط العشى وتعشوا الرياييل وعقب العشى يلسوا يسولفون... فرمس بو حمد خوه بو ظبيه وقاله إنه يريد ظبيه لحمد...
بو ظبيه:- هاي الساعه المباركه... وحمد ولدنا وما بنلقى أحسن منه لظبيه... والولد ولدك والبنت بنتك...
نش خليفه من عند الرياييل وظهر عنهم من الميلس وراح صوب الحرمات وزقر حرمته مريم وقاللها أنه حمد يريد ظبيه وقاللها بلي دار بين أبوه وعمه...
فدخلت مريم على سلامه وظبيه وميثه وفاطمه...
مريم:- ظبيوه... يايبتلج خبر يسوى ملايين...
فاطمه:- شوه يايبه معرس حقها؟ يا ويلج إنتي واعدتني أنا تيبيلي معرس ...
مريم:- ليش إنتي اتبين حد غير بن بهيان...
فاطمه:- سكتن مب عرفته من وين هوه... طلع من هل الهير... يا ويلي لو قالي ني عيَبته والله بطيح مسلقايه...
ظبيه:- ههههههههههه... فطوم سكتي... هاه شو عندج الريم...
مريم:- استعدي لتلقي الخبر... حمد ولد عمج يباج وأبوج قرببهم...
ماتت ظبيه يوم سمعت مريم شوه تقول... مب قادره تصدق إللي تقوله مريم لها وحتى فاطمه إللي كانت تضحك سكتت ولفت صوب ظبيه... كانت ظبيه شرات الميته ما فويهها لون... ما عرفت شو تقول أو تسوي... فجأه نشت تربع صوب حجرتها وقفلت الباب عليها... وربعت وراها فاطمه ويلست تدق الباب عليها بس ظبيه ما طاعت تفتح الباب حق حد... ألين أبوها ما ياها ودق عليها... فنشت ظبيه وفتحت الباب حق أبوها...
بو ظبيه:- هاه ظبيوه قالولي قافله على عمرج وما تبين اتشوفين حد...
سكتت ظبيه ظبيه ما عرفت شو تريد على أبوها...
بو ظبيه:- ظبيه إنتي مب ياهل عشان اتسوين هالحركات وولد عمج أولابج... ومحد بيصونج شراته...
ظبيه:- بس أنا أريد أكمل دراستيه وما أريد أعرس ...
بو ظبيه:-ظبيه إللي في سنج عندهم عيال الحين..ز وسالفة الدراسه هذي بينج وبين حمد إذا هو بغاج اتكملين كملي وإذا ما بغى على هواه...
ظبيه:- بس بويه...
بو ظبيه:- أنا عطيت كلمه لعمج وللرياييل وإنتي ما بتطيحن رمستيه وإلي قلته هو إلي بيصير...
طلع بو ظبيه عنها وخلاها غارقه في أحزانها... وقالت مريم حق خليفه إلي استوى وردة فعل ظبيه يوم سمعت الخبر... فراح خليفه صوب حجرة ظبيه وسمعها وهيه تصيح... فتردد إنه يدخل وكان بيدخل حجرته بس حس انه لازم يكلم ظبيه... ويريد يعرف ردة فعلها هذي...
خليفه:- ظبيه... ظبيه...
ظبيه وهي تمسح دموعها:- الباب مفتوح ادخل يا خليفه...
خليفه:- ظبيوه بلاج حبيبتي... ليش هالدموع والصياح كله... إنت لازم تفرحين مب تصيحين...
ظبيه:- أفرح؟!! ليش إلي يحكمون بإعدامه لازم يفرح؟!!
خليفه:- أي اعدام ... ظبيه حمد شرانج وما أظني أنه ارتكب جريمه يوم بغاج...
ظبيه:- بس أنا ما أريده... ما أريده...
خليفه:- ليش؟؟؟ ليش ما تريدينه؟!!
قالت ظبيه حق خليفه عن إلي استوى في الميلس وعن حركات حمد معاها...
خليفه وهو منصدم من حركات حمد:- أنا ما أعرف ليش حمد سوى جذيه بس أكيد ما كان قصده... وأكبر دليل أنه طلبج... ولو كان تفكيره خايس والله أنه ما ياخذج...
ظبيه:- فديتك خليفه قول حق بويه قوله أنا ما أريد حمد أرجوك... حرام والله حرام...
خليفه:- ظبيوه... شو السالفه؟
ظبيه:- أي سالفه؟! خليفه أنا ما أريد حمد والعرس مب غصب...
خليفه:- ظبيه إلي يريد بنات الناس يدق باب أهلها... وإلي يستاهلج إلي اييج أول... ما يتريا ألين ما إنتي اتروحين...
طلع خليفه عن ظبيه وخلا كلامه وراه... يلست ظبيه تعيد رمست خليفه... وجفاها النوم وما عرفت شوه تسوي... تتصل بسعيد وتقوله وإلا تسكت وتشوف الموضوع عشوه بينتهي... دقايق وإلا يرن تلفونها (("مالي غنى عنك" يتصل بك)) ما عرفت ظبيه شو تسوي... ترد على سعيد وإلا لا... وقررت ما ترد عليه وتو يتصل بها سعيد أكثر عن عشر مرات كأن قلبه كان حاس أنه في شي مستوي حق ظبيه...
فيوم ما ردت عليه طرشلها سعيد مسجات يقول فيها:- ((حبيبتي ليش ما تردين عليه)), ((طبيوه... شو مستوي... ليش ما تردين عليه)), (( والله أحبج... والله العظيم))...
وتمموا على هالحاله لمدة يومين سعيد يتصل بظبيه ويطرشلها مسجات وبيموت علشان يكلمها وهو مب عارف كيف وظبيه كل ما تقرا مسج من سعيد تيلس تصيح...
فيوم كان سعيد خاطف من جدام بيت ظبيه و هو يسمع ..............
يا خفيف الدم شحوالك ... و كيف حال الي نشد عنك
اتصالك وين و رسالك ... وين دارك شاقني فنك
سعيد : ااااااااااه يا ظبيه وينج ....
و الا انا في حال من حالك ... و السبب في حالتي منك
ما قدرت اصبر و لا اتمالك ... لا حشى و لاني بناسنك
اتصال

فاطمه:- ظبيوه... إنتي لازم تكلمين سعيد...
ظبيه:- سعيد... فديت روحه والله... آآآه يا فاطمه والله ما أعرف شوه أسوي... أهليه محتشرين عليه وأولهم حميد... أونه والله بتخربين عليه...
فاطمه:- وحميد وين داخل بالعرض في السالفه بعد...
ظبيه:- داش عرض!!! أصلا حميد هو الي مكبر راس بويه أونه إذا احنا ما قربنا بحمد ولد عمي ما بيوز حميد لميثه وهو يريد ميثه...
فاطمه:- ظبيوه... بنصحج نصيحه لويه الله ... خذي حمد...
ظبيه:- شوه خذي حمد؟؟! إنتي بذات المفروض ما تقولين هالكلام أنتي تعرفين إني أحب سعيد وبموت إذا كنت لحد غيره...
فاطمه:- ظبيه بس سعيد ما سوى شي علشان ياخذج...
ظبيه:- أصلا إحنا ما تكلمنا في هالسالفه... فاطمه أنا متاكده أن سعيد يحبني...
فاطمه:- ظبيوه إنتي لازم تقولين حق سعيد..ز وتشوفين ردة فعله إذا هو شارنج صدق وايريدج بيسوي المستحيل علشانج... وإذا هو لعاب بيتعلث بأي شي وبيقولج ما بيدي حيله...
يلست ظبيه تفكر برمست فاطمه... وقررت أنها تتصل بسعيد ...
سعيد:- مرحبا ملايين... حبيبتي حرام عليج هذا الي تسوينه فيني...
ظبيه:- هلا سعيد...
ظبيه:- هلا سعيد؟!! هذا إلي طلع منج بذمتج؟ اسبوع ما أكلمج وتقولين هلا سعيد... ما كنت أتوقع أن قلبج قاسي لهالدرجه...
ظبيه:- حرام عليك سعيد... بس إنته ما تعرف إلي استوالي وإلا جان عذرتني...
سعيد:- ليش إنتي عطيتيني فرصه عشان أعرف... ظبيه إنتي طنشتيني أسبوع كامل وأنا اتصل وأطرش لج مسجات وإنتي مب حاسه فيني... حتى هان عليج اتردين عليه أو حتى اطرشين مسج...
ظبيه:- سعيد إنته وين الحين؟!
سعيد:- عدرب سمحه بوظبي... ليش؟؟!
ظبيه:- أوكي... خلاص يوم توصل البيت دقلي...
سعيد:- ظبيه بلاج شو مستوي... تراج مب ظبيه إلي أعرفها
ظبيه:- سعيد في سالفه أريد ارمسك فيها... وما ينفع أني أرمسك وانته تسوق
سعيد:- والله تقولين... شو السالفه؟!
ظبيه:- سعيد يوم بترجع البيت بقولك...
سعيد:- ظبيه فلختيني شو السالفه؟!
سكتت ظبيه...
سعيد:- اوكي يالله رمسي وقفت السياره هاه شوه السالفه
ظبيه:- سعيد.
سعيد:- عيون وروح وحياة سعيد... آمري يا الغاليه.
ظبيه:- الاسبوع الماضي كنا مسوين عزيمه في بيتنا... وقالت ظبيه حق سعيد عن سالفة حمد... وسعيد يسمعها وهو ساكت ألين ما قالتله عن رمست أبوها...
سعيد:- وانتي ليش ما قلتيلي... ليش ما خبرتيني اول ما استوت السالفه الحين رمستي...
ظبيه:- سعيد أنا ما عرفت شوه اسوي... بعدين كنت اريد أني اقنع أبويه بس حميد مكبر راس بويه... آآآآآآآآه والله تعبت... ما أعرف .. ماأعرف شوه اسوي...


يلست ظبيه تصيح... مب قادره تمسك دموعها...
سعيد:- حبيبتي تصيحين؟! يخسي ألف ريال اينزل دمعه من عيونج... فديتج لا تصيحين.. فديتج.. دمعه من عيونج اشتريها بالف خاطر...
ظبيه:- مب قادره.. والله هذا مب بإيدي.. بس بس ورجعت تصيح...
سعيد:-فديتج ظبيوه لا تصيحين.. لو كنت غالي عليج صدق واتحبيني لا تصيحين.. ظبيوه.. تحبيني؟!
ظبيه:- بعد هذا كله انته عندك شك أني ما احبك... سعيد أنا احسن لي الموت ولا اكون لحد غيرك..
سعيد:- لا انشاء الله لا انشاء الله لا تقولين جيه وانشاء الله بتكونين لي حتى لو ادفع عمري فدوى علشانج...
ظبيه:- انزين سعيد... شوه بتسوي؟!
سكت سعيد شوي..
سعيد:- ما عليج.. انشاء الله ما يستوي إلا كل خير... بس انتي وعديني انج ما بتصيحين من عقب هاليوم..
ظبيه:- آآآآه ليت الافعال سهله شرات الاقوال.
سعيد:- حبيبتي.. اذا الله كاتبلنا اللقى... ما في انسان بيبعدنا واريدج تتاكدين من شي واحد اني ما حبيت ولا بحب حد غيرج..
ظبيه:- فديت روحك.. حتى انا احبك.. والله والله أحبك..
سكر سعيد عن ظبيه.. وهو مب عارف شوه يسوي.. شغل سعيد السياره وهو ضليج.. شغل الـ FM وسمع عبد الكريم يغني..( ودعتها والشوق بيني وبينها الشوق بيني وبينها بحور... ودعتها.. ودعتها.. رغم خوفي.. رغم خوفي والوله مجبور.. الحزن في ايدها قاسي يشدني.. كل درب عنها بعيد يصدني.. ما أدري المحبه ظيعتني وإلا أنا ظيعتها.. وإلا انا ظيعتها...)
وأول شي فكر فيه سعيد ربيعه علي فاتصل به على طول...
علي:- الو.
سعيد-ألو.. علي انت نايم؟
علي:- والله أنك ما تستحي متصل الساعه 3 الصبح وتتخبر اذا نايم.. اكيد نايم..
سعيد:- علي اريد ارمسك.. علي مب عارف شو اسوي..
علي:- عسى ما شر سعيد بلاك.. شي يعورك؟ تعبان؟
سعيد:- آه تعبان!! إلا بموت..
فقال سعيد حق علي عن الرمسه إلي قالتها ظبيه..
علي:- سعيد ترى البنت شارتنك وقسم بالله بتكون نذل اذا ما طلبتها..
سعيد:- بس بوها قرب بولد عمها..
علي:- سعيد لا تتعلث.. بعدين انته عندك خليفه وصدقني اذا خليفه حس انك تباها وهي تباك صدقني والله بيساعدك..
يلس سعيد يفكر فرمست علي طول الليل ألين ما اذن الصبح.. طلع سعيد من حجرته بيروح المسيد علشان يصلي.. لقى ابوه في الصاله
بو سعيد:- هاه سعيد ناش اليوم من الفير..
سعيد:- ناش؟! وين ناش أنا ما نمت من امس..
بو سعيد:- بلاك عسى ما شر؟!
سعيد:- لا ماشي بس .. بويه اريد ارمسك بسالفه..
بو سعيد:- خلنا نروح المسيد ونصلي وعقب انشاء الله بنرمس..
راح سعيد ويا ابوه المسيد وصلوا الصبح وفي درب الرده رمس سعيد بوه..
سعيد:- بويه اريد اعرس..
بو سعيد:- هذي الساعه المباركه.. حد في خاطرك وإلا تريد امك تتنقالك؟
سعيد:- بصراحه خاطريه فوحده..
بو سعيد:- منوه؟ حد من الي نعرفهم؟
سعيد:- هيه.. خت خليفه الظاهري ربيعي..
بو سعيد:- هيه هل فلي هزاع..
سعيد:- هيه وصلت..
بو سعيد:- انشاء الله يستوي خير.. برمس امك وبخليها تروح وتشوف البنت..
سعيد:- ما في داعي بويه أنا اريد الرياييل يروحون أول والحرمات بعدين..
انتبه بو سعيد انه في السالفه شي بس ما حب انه يضغط على سعيد.. اتصل سعيد بخليفه وقاله انهم بيونهم في البيت.. ففهم خليفه السالفه وعرف سبب رفض ظبيه لحمد..
ويوم سكر عن سعيد على طول راح صوب غرفة ظبيه..
خليفه:- ظبيه.. انصلبي اليوم سعيد الرميثي..
ظبيه أونها ما تعرف منوه سعيد الرميثي:- منوه هذا؟!!
خليفه:- منوه هذا؟! المهم الريال يباج ... وقالي انهم يريدون أحدد لهم يوم علشان ايون ويرمسون بويه.. انتي شو رايج..
ظبيه:- الشور شورك..
فرمس خليفه بوه بس ما قاله انهم يريدون ظبيه.. بو خليفه كان يتوقع انهم يايين حق سلامه.. فتحدد اليوم ووصل سعيد وبوه وعمه ورمسوا في السالفه انصدم بو خليفه يوم عرف انهم يبون ظبيه.. كان يريد يقوللهم ان ظبيه مخطوبه لولد عمها بس خليفه قاله ما يقول واول ما طلعوا من الميلس وركب سعيد سيارته اتصل بظبيه وقالها عن الي صار وقالها ان ابوها ما ياب طاري حمد.. ففهمت ظبيه انها حركة خليفه.. يلس خليفه يرمس أبوه ويقوله عن سعيد وقاله أن ظبيه ما تريد حمد والعرس مب بالغصب..
بو خليفه:- خليفه أنا عطيت كلمه لحمد وعمك وما اروم ارد في كلمتيه..
خليفه:- بويه بس انته ما شاورت ظبيه..
بو خليفه:- ومن متى البنات لهن شور؟ تراه ميثه بنت عمك يوم خطبناها حق حميد ما سوت هالسالفه كلها؟
خليفه:- بويه.ز ميثه تريد حميد بس ظبيه ما تبا حمد..
بو خليفه:- شوف انا ما برد في كلمتيه.. واذا حمد رخص ختك حينها بفكر بسعيد.. بس دامن حمد يباها سعيد ماله نصيب فيها..
راح خليفه صوب ظبيه وقالها عن الي صار وعن رمست بوها..
خليفه:- ظبيوه.. انتي تبين سعيد..
سكتتت ظبيه..
خليفه:- لا تسكتين قولي تبينه وإلا لا.. عشان اذا ما تبينه بتصل بالريال وبقوله مالك نصيب عندنا..
ظبيه : خليفه انا كما اعرف شو اقولك بس انا عايفه حمد..
خليفه:- ظهري حمد من السالفه.. اتبين الريال والالا؟
ظبيه:- اذا انته تشوف ان سعيد زين ويناسبني انا ما برده..
فهم خليفه قصد ظبيه.. اتصل خليفه بسعيد وقاله عن رمست ابوه.. ففهم سعيد ان ظبيه بتكون له اذا حمد رخصها..
خليفه:- سعيد انا برمس حمد وبردلك خبر انزين.ز
سعيدك- دخيلك خليفه لا تبطي عليه..
خليفه:- انشاء الله..
رمس خليفه حمد وقاله عن سالفة سعيد..
حمد اسمحلي خليفه.. هذي بنت عمي وانا اباها.. وإن بغيتوا بيكوم اليوم وبنملج..
اتصل خليفه بسعيد..
خليفه:- اسمحلي سعيد حمد ما رخص ظبيه.. وقال انه شارنها..
سعيد:- خليفه.. دخيلك رمسه قوله انا اباها حرام والله حرام..
خليفه:- سعيد.. انا ما رمتله حيله وهو مصر عظبيه ومب طايع حتى يرمس في السالفه حتى انه ما تخبر عنك.. كل الي قاله انا اريد بنت عمي وان بغينا الحين بيملج عليها..
سعيد:- اوكي خليفه.. عطني رقمه..
خليفه:- سعيد لا تتهور..
سعيدك- لا تحط في بالك بس انته عطني رقمه..
خليفه:- اوكي رقمه(...) سعيد اريد اقولك شي..
سعيد:- آمر..
خليفه:- تراه ظبيه تباك..
سكر سعيد عن خليفه وكله عزم عشان يكلم حمد..



يالله عاد طولت اعليكم لازم تنامون الحين هذا اذا مانمتو وانشاالله في يوم ثاني اكمل القه لكم



______________________________________بنت زايد______________________________-

لااااااااااااااااااااااااااااااا كملي عاد
شو هذا الحين ...مالي صبر ...بليييييييييز لا طولين علينا كملي
بلييييييييييز:(

مايصير عنوني بنوتت الامارات لازم حبه حبه


____________________________بنت زايد__________________________