لعب صغار......

تذكريا حبيبي هالمكان اللي وراك يسار
تذكر هالشجر هالعشب هالينبوع يالغالي

تذكر همسنا والضحك صوت الما رفيف اشجار
تذكر عصافير اول مسا والتايه التالي

تذكر هالمراجيح القديمه صوتها مع ضحك لعب اصغار
تذكر لالمحت اطفال قلت الحافظ الوالي

حبيبي تذكر اللي طاح وش حلوه وعقلك طار
حضنته بين ذرعانك تسمي قوم ياغالي

تسمي وتلتفت لي لابعد وتكثر التذكار
ذكرت الله ترددها كثير فصوتك العالي

تذكر يوم تطلبني اسولف والا اقول اشعار
تذكر لاانتهيت تردد الاشعار واقوالي

تذكر يوم انتثر ذاك الشعر فوق الجبين احتار
اسولف والااوقف والا اقوم اصرخ بموالي

شعرنا باول المشوار فرحه لااخر المشوار
ولاادري فنصف هالمشوار مادري وش تورالي

احس انك نسيت وقلت:اجيبك تذكر اللي صار
لقيتك ياآمل ضايع نسيت المر والحالي

نسيته؟ مانسيته! لانسيته. هالزمن دوار
نسيته؟؟ آه ياويلي ياهمي يابري حالي

مثل هالشجره اللي من وراك وكان فيها ازهار
ولاعادت تشيل اوراق ماتت!! غصنها بالي

تذكر؟ لاتذكر: لاوراك ولايمين ايسار
تذكر انك الماضي ولاتطري على بالي

،،،،،،،،،،،،وارث الطيب رحمه الله،،،،،،،،،،،،،،،،،،،،،،،،،،
للشاعر:
نمر بن منور السحيمي